عنایت احمد کاکوروی

مفتی عنایت احمد کاکوروی (پیدائش: 5 اکتوبر، 1813ء - وفات: 7 اپریل، 1863ء) تحریک آزادی ہند کے ممتاز مجاہد تھے۔ انھوں نے روہیل کھنڈ کے نواب بہادر خان کی تنظیمِ حریت کو مضبوط کرنے، انگریزوں کے خلاف جہاد کی موافقت میں اور نواب کی حکومت کی مالی امداد کے لیے فتویٰ دیا تھا۔ اس جرم کی پاداش میں ان پر مقدمہ چلا کر کالا پانی کی سزا دی کر جزیرہ انڈمان بھیج دیا۔

عنایت احمد کاکوروی
معلومات شخصیت
پیدائش	5 اکتوبر 1813ء   بارہ بنکی، اتر پردیش
تاریخ وفات	7 اپریل 1863ء (50 سال)
وجہ وفات	غرق
شہریت	برطانوی ہند
عملی زندگی
پیشہ	انقلابی ،  مصنف ،  منصف
تحریک	تحریک آزادی ہند

پیدائش

ان کا نام عنایت احمد اور خطاب خان بہادر تھا۔ وہ قریشی النسل تھے۔ اکتیسویں پشت میں نسب رسول کریم کے جدِ امجد عبد مناف سے مل جاتا ہے۔ مفتی عنایت احمد کے اجداد میں سے ایک شخص امیر حسام نے بغداد سے ہجرت کر کے دیوہ ضلع بارہ بنکی میں سکونت اختیار کی۔ یہیں دیوہ ضلع بارہ بنکی میں 9 شوال 1228ھ بمطابق 5 اکتوبر 1813ء کو مفتی عنایت احمد پیدا ہوئے۔

تعلیم

مفتی عنایت احمد نے ابتدائی تعلیم گھر پر حاصل کی۔ 1241ھ / 1825ء میں تیرہ برس کی عمر میں رام پور گئے، وہاں مولانا سید محمد بریلوی سے صرف و نحو کی تحصیل کی۔ پھر مولانا حیدر علی ٹونکی اور مولانا نور السلام سے دوسری درسی کتابیں پڑھیں۔ اس کے بعد دہلی کا سفر کیا جہاں مولانا شاہ اسحاق دہلوی سے حدیث کا درس لیا۔ دہلی سے علی گڑھ آئے، جہاں شاہ عبد العزیز دہلوی اور شاہ رفیع الدین کے نامور شاگرد مولانا بزرگ علی مارہروی سے قلعہ کی جامع مسجد میں معقولات و منقولات کا درس لیا۔

تدریس

مفتی عنایت احمد ابھی فراغت تعلیم کے بعد علی گڑھ ہی میں تھے کہ اسی دوران استاد مولانا بزرگ علی مارہروی کا انتقال ہو گیا۔ مفتی عنایت احمد کی ذہانت و فطانت کی بدولت مدرسہ کے ذمہ داران نے انھیں استاد کی جگہ پر تدریس کے لیے منتخب کر لیا۔ استاد کی روحانی اور مفتی عنایت احمد کے اہتمام و کوشش کی وجہ سے اس مدرسے نے مستند تعلیم گاہوں میں اپنا ایک وقار بنا لیا۔ علی گڑھ کے قیام کے دوران انھوں نے تدریسی خدمات کے ساتھ تحریری شغف بھی جاری رکھا اور ملازمت بھی اختیار کی۔ پہلے منصف و مفتی کے عہدے پر فائز ہوئے، کچھ ہی عرصہ بعد صدر امین کی حیثیت سے ان کا تبادلہ بریلی شہر ہو گیا۔ مفتی عنایت صدر امین کے عہدے سے ترقی کر کے 1856ء میں آگرہ کے صدر الصدور کے اہم عہدے پر مقرر ہوئے۔ ابھی سفر کی تیاری جاری تھی کہ ماہ مئی 1857ء میں انقلاب برپا ہو گیا اور اسی بنا پر وہ آگرہ نہ جا سکے، بریلی اور رام پور کے انقلابیوں کے ہمنوا اور معاون بلکہ سرپرست کی حیثیت سے سرگرم ہو گئے۔

مقدمہ

انھوں نے مجاہدین کے لیے مالی امداد و تعاون اور انگریزوں کے خلاف جہاد پر مشتمل ایک فتویٰ بریلی سے جاری کیا، اس فتویٰ اور انقلابی سرگرمیوں کی پاداش میں مفتی عنایت احمد کے خلاف انگریزوں نے مقدمہ چلایا اور رسمی و نمائشی عدالتی کارروائی کر کے انھیں حبسِ دوام کی سزا دے کر جزیرہ انڈمان (کالا پانی) بھیج دیا۔ جہاں وہ چار سال تک کسی طرح اپنے ایامِ اسیری کی مشقتیں جھیلیں۔ ایک انگریز نے تقویم البلدان کے ترجمہ کی خواہش ظاہر کی جسے انھوں نے قبول کیا اور دو سال کی مدت میں اسے پایہ تکمیل تک پہچایا۔ یہی علمی کام ان کی رہائی کا سبب بن گیا اور 1277ھ بمطابق 1860ء میں وہ جزیرہ انڈمان سے رہا ہو کر ہندوستان واپس آئے۔

تصانیف

کالا پانی میں مفتی عنایت احمد نے سیرت النبی پر ایک مختصر کتاب تواریخ حبیب الہٰ اور فن صرف کی کتاب علم الصیغہ تحریر کی جو آج بھی مدرسوں میں پڑھائی جاتی ہے۔ دوران قید ایک انگریز نے تقویم البلدان کے ترجمہ کی خواہش ظاہر کی جسے انھوں نے قبول کیا اور دو سال کی مدت میں اسے پایہ تکمیل تک پہچایا۔ یہی علمی کام ان کی رہائی کا سبب بن گیا اس کے علاوہ بھی انھوں نے لگ بھگ دو درجن کتابیں تالیف کی ہیں۔

مدرسہ فیض عام

جزیرہ انڈمان سے رہائی کے بعد مفتی عنایت احمد کاکوری نے کانپور کو اپنی دینی و علمی مستقر بنایا اور مدرسہ فیض عام قائم کر کے درس و تدریس میں ہمہ تن مصروف ہو گئے۔ اپنے مدرسہ فیض عام کانپور کی کچھ خدمت کر کے انھوں نے حج و زیارت حرمین شریفین کی نیت سے شوق وارفتگی کے ساتھ حجاز مقدس کے سفر پر بذریعہ بحری جہاز روانہ ہوئے۔

وفات

اثنائے سفر ایک سخت چٹان سے ان کا جہاز ٹکرایا اور شدت ضرب سے پاش پاش ہو گیا۔ 17 شوال 1279ھ بمطابق 7 اپریل 1863ء کو وہ مع قافلہ حجاج شہید ہو گئے۔