اطلاعاتی ٹیکنالوجی

اطلاعاتی ٹیکنالوجی (انگریزی: Information Technology) جس کا اوائل کلمات IT کہا جاتا ہے ٹیکنالوجی کا ایک ایسا شعبۂ علم ہے جو معلومات و اطلاعات کی تجزیہ کاری سے متعلّق ہوتا ہے۔ اس کو اطلاعاتی و ابلاغی ٹیکنالوجی (انگریزی: Information and Communication(s) Technology) بھی کہا جاتا ہے اور اس کا اوائل کلمات ICT کیا جاتا ہے۔ اس کے علاوہ ایشیا میں اس کے لیے Infocomm کا لفظ بھی دیکھنے میں آیا ہے۔

عملی طور پر؛ اطلاعاتی ٹیکنالوجی (انفارمیشن ٹیکنالوجی) کی اصطلاح میں وہ تمام ٹیکنالوجی آجاتی ہیں جو معلومات کی مختلف اقسام (تحریری حقائق / written data، صوتی روابط، عکس متحرک و عکس ساکن، کثیرواسطی نمائش اور وہ جو ابھی نامعلوم ہیں) کی تخلیق، ذخیرہ گری، تبادلہ و نقل اور استعمال سے متعلق ہیں۔ عموماً اس لفظ میں ٹیلیفون اور کمپیوٹر دونوں کا مفہوم آتا ہے۔کچھ ممالک میں اسے اطلاعیات (Informatics) بھی کہا جاتا ہے۔