کےایل سہگل

پیدائش:اپریل 1904

کے ایل سہگل

انتقال:18 جنوری 1947

سہگل جموں کشمیر میں پیدا ہوئے۔ آج ہندوستانی فلمی سنگیت کی جو شکل ہے اس میں سب سے زیادہ حصہ کے ایل سہگل کا ہی ہے۔ وہ مقبول فلمی ستاروں اور گلوکاروں کے باوا آدم تھے۔ ہر جگہ یہ لکھا جاتا ہے کہ انھوں نے ہندوستانی فلمی موسیقی کی گرامر ترتیب دی۔

سہگل کے فلمی کیریئر کا آغاز انیس سو بتیس میں ہوا جب انھیں نیو تھئیٹر میں سٹیج پر اور فلموں میں اداکاری اور گائیکی کے لیے دو سو روپے ماہانہ تنخواہ پر ملازم کیا گیا ان کی پہلی فلم کا نام محبت کے آنسو تھا۔ لیکن انیس سو پینتیس تک دیوداس نے انھیں شہرت کے اس آسمان پر پہنچا دیا ۔

پندرہ برس میں سہگل نے چھتیس فلموں میں کام کیا اور دو سو سے زیادہ گیت اور کئی غزلیں گائیں۔ یہ وہ زمانہ تھا جب ریڈیو اور ریکارڈز کی بدولت پہلی مرتبہ ہندوستانی موسیقی شرفاء کے گھروں میں آدھمکی جو اس سے پہلے صرف رئیسوں کے گھروں پر گائیکوں کو ملازم رکھ کر موقع پر سنی جاتی تھی۔

اس میں کوئی شک نہیں کہ سہگل نے ایک زمانے تک لوگوں کے دلوں پر راج کیا۔ اور وہ برصغیر کے بہت سے گلوکاروں پر اثر انداز ہوئے۔ کشور، مکیش، کے علاوہ افغانستان کے گلوکار ناشناس نے بھی ان کی راہ پر چلنے کی کوشش کی۔ سہگل نے ہندی آمیز گیتوں کو بھی خوب گایا اور خالص اردو غزلوں کو بھی خوبصورتی سے آواز کا جامہ پہنایا۔ ان کی اداکاری اور صداکاری دونوں اپنی مثال آپ رہے۔