گوگل+

گوگل+
	گوگل+ کا شارہ
	گوگل+ کا سرورق
سائٹ کی قسم	سماجی نیٹ ورک / شناختی خدمت
دست‌یاب	40 سے زیادہ
مالک	گوگل+
ویب سائٹ	plus.google.com
تجارتی	ہاں
اندراج	گوگل کھاتہ کے حامل تمام افراد کے لیے
آغاز	28 جون 2011ء
موجودہ حیثیت	آن لائن

گوگل+ (Google+ / G+:)، جس کا تلفّظ گوگل پلس (Google Plus) اور بعض اوقات اِسے اِسی طرح تحریر بھی کیا جاتا ہے، دراصل گوگل+ کے تحت کام کرنے والی ایک سماجی نیٹ ورکی (social networking) اور شناختی خدمت (identity service) ہے۔

اِس خدمت کو 28 جون 2011ء کو آزمائشی مرحلے میں شروع کیا گیا، یہ آزمائشی مرحلہ صرف دعوتی تھا یعنی فقط وہ لوگ اِس میں حصّہ لے سکتے تھے جن کو دعوت دی جاتی تھی۔ اگلے روز، اِس پر موجود تمام صارفین کو اپنے اٹھارہ سال سے زیادہ عمر والے دوستوں کو گوگل پلس پر دعوت دینے کی اجازت دی گئی۔ یہ اجازت بھی دوسرے روز منسوخ کردی گئی کیونکہ گوگل پلس کھاتوں کی مانگ بہت زیادہ ہو گئی تھی۔ 6 اگست کو ہر گوگل پلس رُکن کے پاس 150 لوگوں کو دعوت دینے کا اختیار تھا، تاہم 20 ستمبر 2011ء کے دِن اٹھارہ سال اور اِس سے زیادہ عمر والے افراد کے لیے خدمت بغیر دعوت کی ضرورت کے کھول دی گئی۔

گوگل پلس میں کچھ سماجی خدمات جیسے گوگل نمایہ جات (Google Profiles) اور گوگل بَز (Google Buzz) کو مندمج کر دیا گیا ہے اور ساتھ ہی ساتھ کچھ نئی خدمات مثلاً حلقات، گپ گاہیں اور شرارات وغیرہ کے نام سے متعارف کرائی گئی ہیں۔ گوگل پلس بطورِ موقع ویب اور محمول اطلاقہ (mobile application) کی شکل میں دستیاب ہے۔

بڑھوتری ترميم

14 جولائی 2011ء کو، خدمت کے شروع ہونے کے صرف دو ہفتے بعد، گوگل نے اعلان کیا کہ گوگل پلس پر صارفین کی تعداد ایک کروڑ تک پہنچ چکی ہے۔ ایک ماہ عمل میں رہنے کے بعد، اِس کے صارفین کی تعداد دو کروڑ پانچ لاکھ ہو گئی۔

خدوخال ترميم

حلقات (Circles) کے ذریعے صارفین اپنے روابط کو گروہوں میں تقسیم کرسکتے ہیں۔ اگرچہ دوسرے صارفین کسی صارف کے روابط کی فہرست دیکھ سکتے ہیں لیکن وہ اِن حلقوں کے نام نہیں دیکھ سکتے۔ نجیّتی ترتیبات (privacy settings) اِس بات کی اِجازت دیتی ہیں کہ صارف اپنے حلقوں میں موجود روابط کے ساتھ ساتھ اُن صارفین کو جن کے پاس یہ صارف حلقے میں ہے، چھپاسکتا ہے۔ حلقات کی نظامت ایک گھسٹ و ٹپک (drag-and-drop) مواجہت کے ذریعے بہت آسانی سے کی جاسکتی ہے۔ نیز، صارف اپنے حلقوں کا دوسرے صارفین کے ساتھ اشتراک بھی کر سکتا ہے۔
گپ گاہیں (hangouts) ایسی جگہیں ہیں جہاں منظری گپ شپ (video chat) کی سہولت ہوتی ہے (بیک وقت ایک گپ گاہ میں زیادہ سے زیادہ 10 افراد شریک ہوسکتے ہیں)۔ گپ گاہ میں گپ شپ کے دوران یوٹیوب کی کوئی ویڈیو بھی تمام شریک افراد ایک ساتھ دیکھ سکتے ہیں۔ اِس کے علاوہ کسی گپ گاہ کے منظر کو بعد میں دیکھنے کے لیے محفوظ بھی کیاجاسکتا ہے۔ کچھ دِنوں بعد گپ گاہوں میں شرکاء ایک دوسرے کے ساتھ دستاویزات اور اپنا شمارندی پردہ (computer screen) بھی شریک کرنے کے قابل ہوں گے۔
شرارات (sparks) صارف کو اُس کی دلچسپی کے موضوعات کے بارے میں باخبر رکھتے ہیں۔ یہ دراصل گوگل+ تلاش کا ایک حصّہ ہے جس میں صارفین ایسے موضوعات داخل کرتے ہیں جن کو وہ دوسرے صارفین کے ساتھ شریک کرنے میں دلچسپی رکھتے ہیں۔
سلسلہ (stream) میں صارف دوسرے صارفین کی طرف سے دی گئی خبروں یا اشاعتوں کو دیکھ سکتا ہے۔ ادخالی بکسہ (input box) میں صارف اپنی طرف سے خبریں، خیالات یا اشاعات کے ساتھ ساتھ تصویریں اور منظرات شامل کرکے دوسرے صارفین کے ساتھ شریک کر سکتا ہے۔ سلسلہ میں صرف مخصوص حلقوں کی طرف سے آنے والی خبروں اور موضوعات کو دیکھنے کے لیے اس کی تقطیر کی جاسکتی ہے۔
العاب (games) (سماجی لعبہ گری) میں پہلے 16 لعبہ جات شامل تھے جن کی تعداد اَب بڑھ کر 21 ہو گئی ہے۔ فیس بک کے برعکس گوگل پلس پر لعبہ جات ایک الگ لوحہ (tab) کے تحت ہیں، جس کے سبب ان سے متعلق اطلاعات صارف کی باقی ماندہ اطلاعات سے الگ ہوتی ہیں۔
+1 بٹن کے ذریعے کسی موقع یا اس کے کسی حصّہ کو دوسرے صارفین کے ساتھ شریک کیا جاسکتا ہے۔ گوگل نے حال ہی میں اعلان کیا کہ متعارف ہونے کے بعد اِس بٹن کو دِن میں 5 ارب مرتبہ استعمال کیا جا رہا ہے۔
ڈیٹا خلاصی (data liberation) کے ذریعے کوئی بھی صارف اپنے سارے مشتملات (content) کو گوگل پلس سے اپنے کمپیوٹر پر اُتارسکتا ہے۔
گوگل+ صفحات (Google+ Pages) کی خدمت 7 نومبر 2011ء کو شروع کی گئی۔ اِس خدمت کو استعمال کرتے ہوئے کسی تنظیم کے بارے میں نمایہ (profile) مرتّب دیا جاسکتا ہے جہاں اُس تنظیم کے متعلق معلومات اور خبریں وغیرہ لگائی جاسکتی ہیں۔

زبانیں ترميم

گوگل+ کا انٹرفیس (interface) فی الحال 60 زبانوں میں دستیاب ہے جن میں اُردو، عربی اور فارسی شامل ہیں۔

نیز دیکھیے ترميم

گوگل مواقع (Google sites)
سماجی نیٹ ورکی مواقع کی فہرست (list of social networking websites)

بیرونی روابط ترميم

گوگل پلس کا موقع