ہرناز سندھو

ہرناز کور سندھو (پیدائش 3 مارچ 2000) ایک ہندوستانی ماڈل اور مقابلہ حسن کی فاتح ہے جسے مس یونیورس 2021 کا تاج پہنایا گیا۔ ہرناز سندھو کو اس سے قبل مس دیوا یونیورس 2021 کا تاج پہنایا گیا تھا اور وہ مس یونیورس کا مقابلہ جیتنے والی تیسری ہندوستانی دوشیزہ ہیں۔ اس سے پہلے ہرناز کو 2019 میں فیمینا مس انڈیا پنجاب کا بھی تاج پہنایا گیا تھا اور فیمینا مس انڈیا 2019 میں وہ سیمی فائنلسٹ تھیں۔

ابتدائی زندگی اور تعلیم

ہرناز کور سندھو کی پیدائش اور پرورش چندی گڑھ ، پنجاب میں جاٹ ذات کے سکھ خاندان میں ہوئی۔ انھوں نے شیوالک پبلک اسکول اور پوسٹ گریجویٹ گورنمنٹ کالج فار گرلز، چندی گڑھ سے تعلیم حاصل کی۔ مس یونیورس بننے سے پہلے، وہ پوسٹ گریجویٹ گورنمنٹ کالج آف گرلز، سیکٹر 42 چنڈی گڑھ سے پبلک ایڈمنسٹریشن میں ماسٹرز کی ڈگری حاصل کر رہی تھیں۔

مقابلے اور کامیابیاں

ہرناز سندھو نے نوعمری میں ہی مقابلہ جات حسن میں حصہ لینا شروع کر دیا تھا، مس چندی گڑھ 2017 اور مس میکس ایمرجنگ سٹار انڈیا 2018 جیسے اعزازت جیتے۔ فیمینا مس انڈیا پنجاب 2019 کا خطاب جیتنے کے بعد، سندھو نے فیمینا مس انڈیا میں حصہ لیا، جہاں وہ بالآخر ٹاپ 12 میں شمار ہوئیں۔

مس دیوا 2021

16 اگست 2021 کو، ہرناز کو مس دیوا 2021 کے ٹاپ 50 سیمی فائنلسٹ میں سے ایک کے طور پر منتخب کیا گیا۔ بعد ازاں 23 اگست کو، ان کی تصدیق ٹاپ 20 فائنلسٹوں میں سے ایک کے طور پر کی گئی جنھوں نے ٹیلی ویژن پر مس دیوا مقابلے میں حصہ لینا تھا۔

مس یونیورس 2021

مس دیوا 2021 کی فاتح طور پر، ہرنازسندھو کو مس یونیورس 2021 میں ہندوستان کی نمائندگی کا موقع ملا۔ یہ مقابلہ 12 دسمبر 2021 کو ایلات، اسرائیل میں منعقد ہوا۔ ہرناز 80 مدمقابل دوشیزاؤں کے ابتدائی پول سے کامیاب ہوتی ہوئی ٹاپ سولہ میں پہنچ گئیں،پھر بعد میں ٹاپ ٹین، ٹاپ فائیو اور ٹاپ تھری میں جا پہنچیں، اور بالآخر اس مقابلے کی فاتح ٹھہریں اور مس یونیورس کا تاج ان کے سر پر سجا دیا گیا۔ وہ 1994 میں سشمیتا سین اور 2000 میں لارا دتہ کے بعد مس یونیورس کا تاج پہننے والی تیسری ہندوستانی دوشیزہ بن گئیں۔