اردشیر دوم (ساسانی)

اردشیر دوم سے مغالطہ نہ کھائیں۔

اردشیر دوم ساسانی سلطنت کا گیارہواں بادشاہ تھا۔ اس کا عہد حکومت چار سالوں پر مشتمل تھا۔ 383ء میں اس کو تخت سے اتار دیا گیا تھا۔ اس کا ایم کارنامہ رعایا پر تمام ٹیکس ختم کرنا ہے جس کی وجہ سے اس کا لقب اردشیر نیکوکار بھی پڑ گیا تھا۔

اردشیر دوم (ساسانی)
معلومات شخصیت
تاریخ پیدائش	310ء کی دہائی
تاریخ وفات	سنہ 383 (67–68 سال)
شہریت	ساسانی سلطنت
والد	ہرمز دوم
خاندان	خاندان ساسان
مناصب
ساسانی سلطنت کا بادشاہ
برسر عہدہ 379  – 383
شاپور دوم  شاپور سوم
دیگر معلومات
پیشہ	مقتدر اعلیٰ

تخت نشینی

شہنشاہ اعظم شاہ پور دوم کی وفات کے بعد اس کا معمر بھائی اردشیر بن ہرمز دوم 379ء میں تخت نشین ہوا۔ اردشیر ساسانی سلطنت کا گیارہواں شہنشاہ تھا۔ اس نے ارشیر دوم کے نام سے شہرت پائی۔

اردشیر نیکوکار

شہنشاہ اردشیر دوم نے اپنے عہد حکومت میں رعایا کی ترقی کے لیے ہر ممکن کوشش کی۔ اردشیر نے اپنے عہد حکومت میں رعایا پر لگے ہوئے تمام ٹیکس معاف کر دیے تھے۔ اس اقدام کی وجہ سے شہنشاہ اپنی عوام میں اردشیر نیکوکار کے لقب سے پکارا جانا لگا تھا۔

آرمینیا

شاہ پور دوم کے عہد حکومت میں آرمینیا کے حکمران پارہ کو ایک رومی سردار نے قتل کر دیا تھا۔ شہنشاہ اردشیر بن ہرمز دوم نے آرمینیا کا حکمران ایک امیر ورتازد کو مقرر کیا لیکن حکومت کا اصل اقتدار ایک اور امیر کو سونپا جس کا نام موشیخ تھا۔ آرمینیا کے حاکم درتازد کو موشیخ کا اقتدار کانٹے کی طرح کھٹکتا تھا۔ چنانچہ درتازد نے مکمل منصوبہ بندی کرکے ایک دعوت کے موقع پر موشیخ کو قتل کروا دیا۔ موشیخ کے بھائی مینوئل کو اپنے بھائی کے قتل کا سب سے زیادہ صدمہ لگا تھا۔ مینوئل نے پارہ کی بیوہ اور اس کے دو بیٹوں کے نام کا علم حکومت بلند کیا جس میں اسے کامیابی ملی۔ اس کو یقین تھا کہ قیصر روم اس کی مخالفت کرے گا اس لیے اس نے اپنا سفیر شاہ ایران اردشیر دوم کے پاس بھیجا۔ مینوئل نے سفیر کے ذریعے شاہ ایران کو خراج دینے کا عہد کیا تھا اور ساتھ میں حکومت کا اختیار حاصل کرنے کی استدعا کی تھی۔ شہنشاہ ایران اردشیر دوم نے مینوئل کی استدعا قبول کر لی اور ساتھ میں ایک سپہ سلار کو دس ہزار فوج دے کر بھیجا تا کہ وہ مینوئل کے ساتھ مل کر حکومت چلائے۔ اردشیر دوم کی دوعملی زیادہ دیر نہ چل سکی تھی۔ آرمینیا کے حکمران مینوئل کو جب شبہ ہوا کہ ایرانی اسے گرفتار کرنا چاہتے ہیں تو اس نے ایرانی فوج پر حملہ کر دیا جس کے نتیجے میں وہ تہ تیغ ہو گئے۔ مینوئل اس کے بعد جب تک زندہ رہا آرمینیا پر حکومت کرتا رہا۔

دستبرداری

اردشیر دوم ایک کاہل شہنشاہ تھا لیکن اس کے باوجود اس کو امرائے سلطنت کا اقتدار کھٹکتا تھا۔ جب اردشیر نے امرا کا اقتدار کم کرنا چاہا تو انہیں شہنشاہ اردشیر کی مخالفانہ سرگرمیاں ناگوار گذری۔ امرائے سلطنت نے سازش کر کے شہنشاہ اردشیر دوم کو 383ء میں تخت سے اتار دیا۔ اس کے بعد شاہ پور دوم کے بیٹے شاہ پور سوم تخت نشین کر دیا گیا۔