البیقونی

البیقونی، جو عمر (یا طحہٰ) بن محمد بن فتوح البیقونی ، دمشقی شافعی (متوفی 1080ھ / تقریباً 1669ء ) وہ علمِ مصطلح الحدیث کے ماہر تھے اور مشہور کتاب "المنظومۃ البیقونیہ" کے مصنف ہیں جو علمِ حدیث کے اصول و قواعد پر مبنی ہے۔

البیقونی
(عربی میں: عمر (أو طه) بن محمد بن فتوح البيقوني)
معلومات شخصیت
پیدائشی نام	عمر أو طه
اصل نام	عمر (أو طه) بن محمد بن فتوح البيقوني
تاریخ پیدائش	سنہ 1600ء
تاریخ وفات	سنہ 1669ء (68–69 سال)
رہائش	دمشق
عملی زندگی
مؤلفات	منظومة البيقونية

البیقونیہ کا نسخہ، سنٹرل لائبریری آف اسلامک مینو اسکرپٹس، جنرل نمبر 605، مصر۔

حالات زندگی

بیقونی کے متعلق زیادہ معلومات دستیاب نہیں ہیں، یہاں تک کہ علامہ زرقانی نے اپنی شرح "المنظومۃ البیقونیہ" کے آخر میں لکھا: "میں ان کے نام، حالاتِ زندگی، یا ان کی کسی اور نسبت کے بارے میں کچھ نہیں جان سکا۔" تاہم، بعض علما نے ان کی سیرت کے چند پہلو بیان کیے ہیں۔ اجهوری نے زرقانی کی شرح پر اپنے حاشیہ میں ذکر کیا: "ایک نسخے کے حاشیے پر، جس پر ناظم (بیقونی) کا خط تھا، یہ لکھا ہوا پایا گیا: ان کا نام شیخ عمر بن شیخ محمد بن فتوح الدمشقی الشافعی تھا۔" اسی طرح، بدرالدین الحسنی نے اپنے بیقونیہ کی شرح "الدرر البهية" [مخطوطہ] کے آخر میں لکھا: "[بیقونی] کی نسبت پر اکثر علما نے توقف کیا ہے، تاہم بعض نے ذکر کیا ہے کہ یہ 'بیقون' نامی ایک گاؤں کی طرف نسبت ہے، جو آذربائیجان کے علاقے میں کردوں کے قریب واقع ہے۔"

آثار بیقونی

بیقونی کے چند معروف آثار کا ذکر علامہ زِرکلی نے کیا ہے، جن میں سے قابلِ ذکر درج ذیل ہیں:

• . البيقونية:

یہ ان کی مشہور ترین تصنیف ہے، جو علمِ مصطلح الحدیث کے اصول و قواعد پر ایک منظوم رسالہ ہے۔ اس پر کئی علما نے شروحات لکھی ہیں، جن میں محمد عثمان المیرغنی کا نام خاص طور پر قابلِ ذکر ہے۔

• . فتح القادر المغيث:

زِرکلی نے اس کتاب کو بھی بیقونی کی تصنیف قرار دیا ہے، لیکن ایک اور عالم کے ذریعے بیقونیہ کی شرح کے طور پر اس نام کی ایک اور کتاب کا وجود پایا گیا ہے۔ اس بنیاد پر یہ خیال کیا جاتا ہے کہ زِرکلی نے اس کتاب کو غلطی سے بیقونی سے منسوب کر دیا ہے۔