ام حبیبہ بنت عباس

ام حبیبہ بنت عباس
معلومات شخصیت
شوہر	اسود بن سفیان
اولاد	لبابہ ، زرقاء (بیٹیاں)
والد	عباس بن عبد المطلب
والدہ	لبابہ بنت حارث
بھائی	فضل ابن عباس ، عبد اللہ بن عباس ، عبید اللہ بن عباس ، قثم بن عباس

تعارف

آپ کا نام کسی بھی کتب تاریخ میں نہیں ملتا آپ ام حبیب یا ام حبیبہ کے نام سے مشہور ہیں۔ آپ عم رسول (صلی اللہ علیہ وآلہ وسلم) حضرت عباس بن عبد المطلب کی بیٹی ہیں۔ آپ کی والدہ ام المومنین میمونہ کی بہن ام الفضل لبابہ بنت حارث تھیں۔ آپ حضرت عباس بن عبد المطلب کی زوجہ ام فضل سے اکلوتی بیٹی تھیں۔ آپ کے حقیقی بھائیوں میں حضرت فضل بن عباس ، عبد اللہ بن عباس ، عبید اللہ بن عباس ، قثم بن عباس ، عبد الرحمن بن عباس اور معبد بن عباس شامل تھے۔

سلسلہ نسب

آپ کا والد کی جانب سے سلسلہ نسب یہ ہے:

• ام حبیبہ بنت عباس بن عبد المطلب بن ہاشم بن عبد مناف

والدہ کی جانب سے سلسلہ نسب یہ ہے

• ام حبیبہ بنت لبابہ بنت حارث بن حزن

حدیث میں ذکر

حضرت عبد اللہ بن عباس سے روایت ہے رسول اللہ صلی اللہ علیہ وآلہ وسلم نے ام حبیب بنت عباس کو اپنے سامنے ہاتھوں چلتے دیکھا تو فرمایا : اگر یہ بالغ ہو گئی اور میں زندہ رہا تو (اپنے چچا کی خوشی کے لیے) اس سے نکاح کر لوں گا۔ رسول اللہ آپ کے بالغ ہونے سے قبل وفات پا گئے تھے۔

رسول اللہ نے ام حبیبہ بنت عباس بن عبد المطلب سے نکاح کا پیام دیا مگر بعد میں معلوم ہوا کہ آپ اور حضرت عباس دودھ شریک بھائی ہیں کیونکہ دونوں نے ثوبیہ کا دودھ پیا تھا۔

شادی

آپ سے اسود بن سفیان بن عبد الاسد نے نکاح کیا تھا جس سے آپ کی دو بیٹیاں لبابہ اور زرقاء پیدا ہوئیں۔ آپ لوگ مکہ میں ہی قیام پزیر تھے۔