فتح پور(جلہ جیم)

فتح پور (Fateh pur) جنوبی پنجاب، پاکستان میں ضلع وہاڑی، تحصیل جلہ جیم میں ایک یونین کونسل اور ایک قصبہ ہے۔

قصبہ
ملک	پاکستان
صوبہ	پنجاب
تحصیل	جلہ جیم
بلندی	133 میل (436 فٹ)
آبادی (2023)
• کل	17،153
منطقۂ وقت	پاکستان کا معیاری وقت (UTC+5)

زبان

مقامی زبان ہریانوی ہے، اردو قومی زبان ہونے کی وجہ سے ہر جگہ بولی اور سمجھی جاتی ہے۔

تاریخ

فتح پور ، ضلع وہاڑی اور تحصیل جلہ جیم کا یہ قصبہ دریائے ستلج کے کنارے جلہ جیم کے جنوب مشرق کی طرف 5کلومیٹر کے فاصلے پر واقع ہے۔ شہنشاہ اکبر کے زمانے میں ستلج دریا کے اس علاقے پر جوئیہ خاندان کی حکومت تھی اور فتح پور بھی اسی ریاست ہکارہ(جلہ جیم) کا حصہ تھا، جسے فتح خاں جوئیہ نے آباد کیا تھا۔ اسی کے نام پر اس کا نام فتح پور مشہور ہوا۔ مغلوں کے عہد میں ریاست کو پرگنہ(تحصیل) کی حیثیت حاصل تھی۔ یہاں فتح خاں کا تعمیر کردہ ایک قلعہ بھی تھا جو رفتہ رفتہ اپنا نام و نشان اور آثار کھوتا جا رہا ہے۔ بادشاہی مسجد اور دیگر تاریخی مساجد فن تعمیر کا نادر نمونہ ہیں۔ یہاں کے زیادہ گھر چھوٹی اینٹ کے بنے ہوئے ہیں۔ گلیاں تنگ اور ٹیڑھی ہیں۔ اس کے بانی فتح خاں جوئیہ کا مزار بھی یہاں موجود ہے۔ یہ مقبرہ چھوٹی اینٹ کا بنا ہوا ہے۔ اس کی تعمیر میں نقش و نگار والی اینٹیں استعمال ہوئی ہیں اور یہ گنبد نما ہے۔ مقبرے کے احاطے میں دو قبریں اور بھی ہیں جن کے بارے میں کہا جاتا ہے کہ وہ فتح خاں جوئیہ کے دو بھائیوں محمد خاں جوئیہ اور علی محمد جوئیہ کی ہیں۔ احاطے کے باہر دیگر قبریں بھی ہیں۔ رفتہ رفتہ یہ مقبرہ شکستہ ہوتا جا رہا ہے۔ یہاں کھجور کے درخت عام ہیں۔ لوگ کھجی کاوان، صفاں اور مُصلے بناتے ہیں۔ طلبہ و طالبات کے لیے اسکول اور صحت کی سہولتیں موجود ہیں۔

متعلقہ مضامین

• ضلع وہاڑی
• تحصیل جلہ جیم
• پاکستان کے شہر