بندش پا

بندش پا چین کی ایک رسم تھی جس میں نوخیز بچیوں کے پاؤں کو کس کر جکڑ دیا جاتا تھا تاکہ ان کے قدم خوب صورت اور اس کی جسامت متناسب ہو جائیں۔ یہ رسم تانگ خاندان کے عہد حکومت سے بیسویں صدی عیسوی تک رائج رہی اور اس عرصے میں اسے ذی حیثیت خواتین کی علامت نیز خوب صورتی کی نشانی بھی سمجھا جاتا تھا۔ بندش پا کا عمل خاصا تکلیف دہ اور عموماً طبقہ اشرافیہ کے خاندانوں تک ہی محدود رہا؛ بسا اوقات اس عمل سے گزرنے والی بچیاں دائمی طور پر معذور بھی ہو جاتی تھیں۔ تاہم جو پاؤں اس عمل کی بدولت خوب صورت شکل اختیار کر لیتے انھیں کنول نما پاؤں کہا جاتا۔

بندش پا
ایک چینی خاتون اپنے پیروں کی نمائش کرتے ہوئے، تصویر از Lai Afong 1870s
روایتی چینی	纏足
سادہ چینی	缠足
انتساخ ماندرین - ہانیو پنین chánzú - وادے-جائلز ch'an2-tsu2 - IPA [tʂʰǎn.tsǔ] کینٹونیز (یو) - جیوٹپنگ cin4-zuk1 - IPA [[Help:IPA/Cantonese|[[[:سانچہ:C-yue]]سانچہ:C-yueسانچہ:C-yueسانچہ:C-yueسانچہ:C-yue]]] - Yale Romanization chìhn-jūk
متبادل (من) چینی نام
روایتی چینی	縛跤
سادہ چینی	缚跤
انتساخ من - ہوکین POJ pa̍k-kha

غالباً دسویں صدی عیسوی میں پانچ خاندانوں اور دس بادشاہتوں کے عہد کی درباری رقاصاؤں سے اس رسم کا آغاز ہوا اور بعد ازاں تانگ خاندان کے عہد حکومت میں اشرافیہ کے درمیان یہ رسم رائج ہوئی اور چنگ خاندان کے عہد حکومت تک بتدریج تمام سماجی طبقات میں پھیل گئی۔ بندش پا کی مختلف شکلیں مروج تھیں جن میں سب سے زیادہ تکلیف دہ شکل سولہویں صدی عیسوی میں سامنے آئی۔ ایک تخمینہ کے مطابق انیسویں صدی تک چالیس سے پچاس فیصد چینی خواتین اور چینی اشرافیہ کی سو فیصد خواتین اس عمل سے گذر چکی تھیں۔ تاہم ملک کے مختلف حصوں میں اس رسم کی مختلف شکلیں رائج رہیں۔

چنگ عہد حکومت میں اس رسم کے خاتمہ کی متعدد کوششیں ہوئیں۔ چنانچہ منچو شہنشاہ کانگ شی نے سنہ 1664ء میں اس رسم پر پابندی عائد کرنا چاہا لیکن اسے ناکامی ہوئی۔ انیسویں صدی کے اواخر میں چینی مصلحین نے بھی اس رسم کے خلاف آواز اٹھائی لیکن خاطر خواہ کامیابی نہیں ملی۔ بالآخر بیسویں صدی میں بندش پا مخالف مہموں کی مسلسل کوششوں نے اس رسم کا خاتمہ کیا۔ تاہم اب بھی کچھ ایسی بوڑھی خواتین مل جاتی جن کے پاؤں جکڑے ہوئے نظر آتے ہیں۔