کانگ شی

کانگ شی (اصل نام شانگ سو) چنگ خاندان کا تیسرا شہنشاہ تھا جس نے چین پر 61 سال حکومت کی۔ اس کے دور میں مسیحیوں کو کچھ کامیابیاں ملیں۔ اس کا شمار چین کے عظیم شہنشاہوں میں ہوتا ہے۔

کانگ شی
(منچو میں: ᡝᠯᡥᡝ ᡨᠠᡳᡶᡳᠨ)،(منچو میں: ᠠᠮᠤᠭ᠋ᠤᠯᠠᠩ ᠬᠠᠭᠠᠨ)
معلومات شخصیت
پیدائشی نام	(چینی میں: 玄燁)،  (منچو میں: ᡥᡳᠣᠸᠠᠨ ᠶᡝᡳ)
پیدائش	4 مئی 1654ء   بیجنگ
وفات	20 دسمبر 1722ء (68 سال)  قدیم گرما محل
وجہ وفات	چیچک
شہریت	چنگ سلطنت
مناصب
شہنشاہ چین
برسر عہدہ 5 فروری 1661  – 20 دسمبر 1722
در	چنگ سلطنت
دیگر معلومات
پیشہ	خطاط
مادری زبان	مانچو زبان
پیشہ ورانہ زبان	چینی زبان ،  مانچو زبان

تخت نشینی

شانگ سو اپنے والد شون ژی کی وفات کے بعد تخت نشین ہوا۔ اس وقت اس کی عمر صرف آٹھ سال تھی۔ اس نے اپنے لیے کانگ شی کا لقب اختیار کیا۔ چھ سال بعد جب اسے تمام امور کی سمجھ بوجھ ہو گئی تو تمام امور وہ خود جانچنے لگا۔

ووسان کوی کی بغاوت

ووسان کوی مفتوح خاندان منگ کے دور حکومت میں وزیر تھا اور اس نے ہی چنگ خاندان کو حملے کی دعوت دی تھی۔ کانگ شی نے اسے مغربی اضلاع کا صوبہ دار مقرر کیا تھا۔ وہ خود کو اس قدر خود مختار سمجھتا تھا کہ شہنشاہ کی کچھ حقیقت نہیں سمجھتا تھا۔ شہنشاہ نے اس کی اطاعت آزمانے کے لیے اسے دربار میں بلا بھیجا۔ اس کو بھی شک پیدا ہوا اس لیے اس نے آنے سے انکار کر دیا۔ اس کے معنی کھلم کھلا بغاوت تھی۔ اس بغاوت کو کچلنے کے لیے کانگ شی کو مشکلات درپیش آئی۔ ان مشکلات کی ایک وجہ پیکن میں شدید زلزلہ تھا جس کی وجہ سے بہت زیادہ جان و مال کا نقصان ہوا۔ اس نقصان میں شاہی محل بھی شامل تھا جو گر کر تباہ ہو گیا تھا۔ اس کے علاوہ کانگ شی کو بغاوت ختم کرنے میں اس لیے بھی مشکل درپیش آئی کہ چینیوں کی ہمدردی ووسان کوی کے ساتھ تھی۔ بالآخر بہت مشکلات کے بعد کانگ شی نے ووسان کوی کی بغاوت فوجی کارروائی سے کچل دیا۔

نئے احکامات

کانگ شی نے اپنے دور حکومت میں ایک مقدس حکم نامہ شن بُو کے نام سے جاری کیا جس میں سولہ اصول بتائے گے۔ اس کے علاوہ بھی شہنشاہ نے کئی نئے قانون نافذ کیے جن میں سے چند یہ تھے۔

1. عورتوں کی پاؤں باندھنے کی رسم بد کے خلاف احکامات جاری کیے گئے۔
2. معززین کے جنازوں پر عورتیں کی قربانی کے خلاف احکامات جاری کیے گئے۔ (گذشتہ بادشاہ شون ژی کی محبوبہ کے جنازے پر 24 عورتیں ذبح کی گئی تھیں۔)
3. فوجی محصول لینے کے خلاف احکامات جاری کیے گئے۔
4. چین کے اس وقت پندرہ صوبے تھے شہنشاہ کانگ شی نے صوبوں کی تعداد کو بڑھا کر اٹھارہ کر دی۔

اہل روس کی کارروائیاں

اہل روس نے چینیوں پر دباؤ بڑھانے کے لیے دریائے آمور کے کنارے ایک قلعہ تعمیر کرنا چاہا۔ اس کام کے لیے انھوں نے دریائے آمور کے تمام حصوں کی چھان بین کی۔ بالآخر انھوں نے 1651ء میں ایک قلعہ دریائے آمور کے کنارے تعمیر کر دیا۔ قلعے کی تعمیر کے بعد روسیوں نے سوچا چینی دباؤ میں آ گئے ہو گئے اس لیے انھوں نے ایک سفارت بھیجی جو ناکام ثابت ہوئی۔ ایک پادری نے روسیوں کو مشورہ دیا کہ قلعہ بنا کر فوجی دباؤ سے کچھ فائدہ نہ ہو گا مناسب یہ ہوگا کہ فوجی دباؤ سے دست بردار ہو کر تجارتی مداخلت کا انتظام کیا جائے۔ چنانچہ 1689ء میں چین کے ساتھ ایک معاہدہ ہو گیا۔ ایک روسی ماہر جغرافیہ کو سائبریا کا نقشہ تیار کرنے کے لیے بھیجا گیا۔ اس روسی نے ایسا بندوبست کر لیا کہ وہ چینیوں کو ادب سے سلام کرے اور چینی اسے عزت سے جواب دیں۔ اس طرح اس نے نقشہ مکمل کر لیا۔ اسمائیلو نامی ایک روسی نے 1720ء میں پیکن کے اندر ایک تجارتی مرکز بنا لیا تھا اور آرتھوڈکس مسیحیت کی بنیاد بھی رکھ دی تھی۔

مسیحیوں کی کامیابیاں

کانگ سی کے زمانے میں مسیحیوں کے لیے خاصی رواداری کا بندوبست ہو گیا تھا۔ ایک مسیحی کو 1669ء میں جنتری کا نگران بنایا گیا۔ ایک مسیحی نے کونین کے ذریعے سے بادشاہ کے بخار کا علاج کیا۔ چند مسیحیوں نے مل کر 1708ء سے 1718ء تک چین کا پہلا نقشہ تیار کیا۔ بعد ازاں خود مسیحیوں نے اس روادری کو آپس میں پیدا ہونے والی نفرت کی وجہ سے تباہ کر دیا۔

یورپ کے مسیحی

یورپ کے مسیحیوں کو شروع شروع میں کانگ شی نے بہت سراہا کیونکہ وہ ریاضی، علم الافلاک، جغرافیہ اور طب کے ماہر تھے۔ ان کے مذہب کی طرف بھی چینیوں کا خیال اچھا ہوتا جا رہا تھا لیکن مسیحی مبلغین کی آپس کی نفرت نے کانگ شی کو ان کے خلاف کر دیا۔ چینی اجداد برستی کسی طرح نہ چھوڑنا چاہتے تھے۔ ایک مسیحی فرقہ کہتا کہ چینی اس کے باوجود مسیحی مذہب اختیار کر سکتے ہیں جبکہ دوسرا فرقہ اس کے مخالف تھا۔ اس میں سب سے بڑی بحث یہ تھی کہ خدا کو چینی زبان میں طین (آسمان ملا یا اعلے) یا طین چو (آسمانی حاکم) یا شانگ طی (حاکم مطلق) کہے۔ ان ناموں میں سے جو شہنشاہ نے منتخب کیا وہ نام پوپ نے نامنظور کر دیا۔ اس پر شہنشاہ کو غصہ آ گیا۔ اس کی وجہ یہ تھی کہ شہنشاہ کے نزدیک چینی زبان کے متعلق پوپ کا دخل بے معنی تھا اور دوسرا جب بغیر مسیحی ہوئے پوپ کو اتنے اختیارات تھے جب شہنشاہ عیسائی ہو جاتا تو تمام اختیارات پوپ کے پاس چلے جاتے۔ اس قسم کی فضول بحث کی وجہ سے چینی حکومت عیسائی نہیں ہوئی ورنہ وہ بالکل تیا ر تھی۔

پیشن گوئی

شہنشاہ کانگ شی چین کے مستقبل کے بارے میں مطمعن نہیں تھا۔ 1717ء میں ایک موقع پر اس نے کہا مجھے خطرہ ہے کہ آنے والی صدیوں میں سمندر پار سے مغرب سے آنے والی فوجیں چین کے حصے بکھیر کر کے کھا جائیں گی۔

آخری سالگرہ

شہنشاہ کانگ شی نے اپنے عہد کے ساٹھویں سالگرہ ایک عجیب انداز سے منائی۔ اس نے 1722ء میں ملک کے تمام ساٹھ سال سے اوپر کے لوگوں کو دار السلطنت بلایا اور ان کے ساتھ مل کر ایک شان دار جشن منایا۔

وفات

شہنشاہ کانگ شی نے 1722ء میں وفات پائی۔ اس کے دور حکومت علم و ادب کو بہت ترقی حاصل ہوئی۔ اس کے دور حکومت پہلے سالوں میں بغاوتیں ہوئیں لیکن آخری تیس سال امن و امان کے سال تھے۔ اس کا شمار چین کے عظیم شہنشاہوں میں ہوتا ہے۔