تفسیر ثنائی

تفسیر ثنائی ابوالوفاء ثناء اللہ امرتسری کی تفسیر ہے، جو معروف اہل حدیث عالم مناظر تھے۔ تفسیر ثنائی ایک آسان، مختصر اور مخالفین اسلام کے اعتراضات کے جواب پر مشتمل تفسیر ہے، جو 8 جلدوں پر مشتمل ہے۔ اس تفسیر کی تکمیل میں 36 سال کا عرصہ لگا۔

اس تفسیر کی پہلی جلد 1895ء اور آخری جلد 18 فروری 1931ء کو شائع ہوئی۔ اس تفسیر میں ثناء اللہ امرتسری نے اس زمانہ میں مخالفین کی طرف سے اسلام کے خلاف جو شبہات پیش کیے جاتے تھے ان کا علمی اور تحقیقی جواب دیا ہے اور اسلام کی حقانیت کو ٹھوس دلائل سے ثابت کیا ہے۔ اس تفسیر کے لکھنے کا محرک مولانا کے ایک عزیز نے تفسیر ثنائی کے شروع میں نقل کیا ہے۔

آیات کا ترجمہ سہل انداز میں کیا گیا ہے۔ تفسیر مختصر مگر جامع ہے۔ عام طور سے مصنف نے متشابہ آیات کی تفسیر اور بعض نزاعی مسائل میں سلف یعنی متقدمین علما کے مسلک کو راجح قرار دیا ہے؛ البتہ بعض مقامات پر جمہور علما کے مسلک سے انحراف بھی کیا ہے۔ اس لیے ان کے معاصر علما نے اس تفسیر پر تنقید بھی کی ہے۔ قرآن مجید کی اردو تفاسیر میں تفسیر ثنائی کو خاص اہمیت حاصل ہے۔ اس تفسیر میں قادیانیت اور نیچریت کا رد کیا گیا ہے۔ تفسیر ثنائی اردو زبان میں ہے اور اس کی تفصیل یہ ہے:

جلد	صفحات	سورۃ
اول	148	سورہ فاتحہ تا سورہ بقرہ
دوم	162	آل عمران تا النساء
سوم	184	سورۃ المائدہ تا سورۃ الاعراف
چہارم	206	سورۃ الانفال تا سورۃ النمل
پنجم	200	سورۃ الاسرا تا سورۃ الفرقان
ششم	200	سورۃ الشعرآء تا سورۃ یٰس
ہفتم	202	سورۃ الصافات تا سورۃ النجم
ہشتم	184	سورۃ القمر تا سورۃ معوذتین