شقران صالح

شقران صالح رسول اللہ کی خدمت پر مامور حبشہ کے غلام صحابی تھے۔ تقریباً تمام غزوات نبوی صلی اللہ علیہ وسلم شامل تھے ۔

شقران صالح
معلومات شخصیت
پیدائش	590ء کی دہائی  ایتھوپیا
وفات	650ء کی دہائی  بصرہ
شہریت	خلافت راشدہ
پیشہ ورانہ زبان	عربی
عسکری خدمات
لڑائیاں اور جنگیں	غزوۂ بدر

نام ونسب

صالح نام، شقران لقب اور والد کا نام بھی تھا، یہ عبدالرحمن بن عوف کے حبشی نژاد غلام تھے، لیکن اس غلامی میں بھی سیادت مقدر تھی ، رسول خدا ﷺ نے ان کو اپنی خدمت گزاری کے لیے پسند فرمایا اور عبد الرحمن کو قیمت دے کر خرید لیا، بعض روایتوں سے ظاہر ہوتا ہے کہ انھوں نے بلا معاوضہ نذر کیا تھا۔

غزوات

غزوات میں عموماً مالِ غنیمت اور قیدیوں کی حفاظت پر مامور ہوتے تھے اور غنیمت میں حصہ پانے کی بجائے جن کے قیدیوں کی نگرانی کرتے تھے، وہ بطور خود معاوضہ دیتے تھے، چنانچہ غزوۂ بدر میں ان کو اس قدر معاوضہ ملاکہ مالِ غنیمت میں حصہ پانے والوں سے بھی زیادہ نفع میں رہے۔

خدمت رسول

آنحضرت ﷺ ان کے خدمات سے اس قدر خوش تھے کہ وفات کے وقت آپ نے مخصوص طور سے ان کے ساتھ حسنِ سلوک کی وصیت فرمائی، شقران رسول اللہ ﷺ کی تجہیز وتکفین میں اہل بیت کے ساتھ شریک تھے، غرض یہ آخری خدمت تھی جو اس غلام جانثار نے اپنے شفیق آقا کے لیے انجام دی۔

وفات

اس میں اختلاف ہے کہ آنحضرت ﷺ کے بعد شقران نے مدینہ میں سکونت اختیار کی یا بصرہ میں اقامت گزین ہوئے، کیونکہ ان کا ایک مکان میں بصرہ میں بھی تھا۔ اسی طرح جائے وفات اور زمانہ بھی متعین نہیں۔ ان کی نسل ہارون رشید کے عہد میں ختم ہوئی۔