مرقیون

مرقیون دوسری صدی عیسوی کے ایک مشہور بدعتی شخص تھے۔ وہ شمال مشرقی ایشائے کوچک میں پنطُس کے ایک امیر و کبیر شخص تھے۔ جن کے پاس متعدد جہاز تھے۔ وہ 140ء میں روم آئے۔ کچھ عرصہ تک وہ راسخ الاعتقاد كليسیا کے سرگرم رکن رہے لیکن پھر اُنہیں قریباً 144ء میں جماعت سے خارج کر دیا گیا۔ اُنہوں نے راسخ الاعتقاد کلیسیا کے مقابلے میں اپنے پیروکاروں کو منظم کیا۔ اُنہوں نے رومی سلطنت کے مختلف حصوں میں متعدد کلیسیا قائم کیے جو تعداد اور اثر و رسوخ کے لحاظ سے دو صدیوں تک کافی مؤثر رہے۔

مرقیون
(قدیم یونانی میں: Μαρκίων)
یوحنا رسول (بائیں) اور مرقیون (دائیں)۔
معلومات شخصیت
پیدائش	سنہ 85
وفات	سنہ 160 (74–75 سال)  روم
عملی زندگی
پیشہ	الٰہیات دان،  فلسفی
پیشہ ورانہ زبان	قدیم یونانی
شعبۂ عمل	فلسفہ

تعلیمات

مرقیون نے مسیحیت کو یہودیت سے بالکل علاحدہ پیش کیا۔ اُن کی تعلیم کے مطابق عہد نامہ قدیم کا عہد نامہ جدید سے، اِسرائیل کا کلیسیا سے اور یہاں تک کہ عہد نامہ قدیم کے خدا کا (جسے وہ دیوتا تصور کرتے تھے) عہد نامہ جدید کے یسوع مسیح کے باپ خدا سے کوئی تعلق نہیں۔ اُن کے مطابق حقیقی خدا جس کا علم مسیح کے تجسم سے پیشتر کسی کو علم نہیں تھا، اسے ظاہر کرنے کے لیے مسیح دنیا میں آئے۔ عہد نامہ قدیم کا خدا ایک کمتر ہستی ہے جس نے مادی دنیا کو پیدا کیا اور کنٹرول کرتا ہے۔ اگرچہ وہ بُری ہستی نہیں تو بھی وہ یسوع مسیح کے خدا اور باپ کی سی اچھی ہستی نہیں جو محبت اور فضل کا خدا ہے۔

تحریر

مرقیون پولس رسول سے کافی متاثر تھے۔ اُن کے خیال کے مطابق انہوں نے اپنی تعلیم کو پولس سے اخذ کیا تھا۔ اُن کی پاک نوشتوں کی فہرست میں پولس رسول کے دس خطوط (ان میں پاسبانی خطوط اور عبرانیوں کا خط شامل نہیں) اور لوقا کی انجیل شامل تھی۔ ان میں سے اُنہوں نے اپنی تعلیم کے خلاف تمام باتوں کو نکال دیا۔ مثلاً خطوط میں سے ان تمام حوالوں کو نکال دیا جو خدا باپ کو خالق بتاتے ہیں اور لوقا کی انجیل سے مسیح کی پیدائش کے بیان کو ہٹادیا۔ اُن کی تعلیم متعدد اجتماعِ ضدین پائے جاتے تھے، مثلاً شریعت اور انجیل کی خوشخبری؛ جسم اور روح وغیرہ۔ اُن کی تحریرات اب ناپید ہیں، لیکن اُن کی تعلیمات کے زیادہ تر حصے طرطولیان کے اقتباسات سے اور آبائے کلیسیا، خاص طور پر ایزینیس کی اُن تحریرات سے جو اُنہوں نے اُس کے رد میں لکھیں جمع کرسکتے ہیں۔ اُنہوں نے پولس رسول کے جو تعارف لکھے وہ راسخ الاعتقاد كليسیا کے لاطینی بائبل کے مسودوں میں ہیں اور یوں وہ محفوظ رہ گئے۔

غناسطیت

اکثر علما کے درمیان اِس بات پر اختلاف پایا جاتا ہے کہ آیا مرقیون غناسطی تھے یا نہیں۔ مگر کچھ علما کے مطابق وہ جن باتوں پر ضرور دیتے ہیں وہ یقیناً غناسطیت سے تعلق رکھتی ہیں۔ وہ خاص طور پر پر جسم اور مادی دنیا کے بارے میں اپنے منفی رویہ، دوقیت سے متاثر اپنے علم المسیح اور زہد و ریاضت پر تعلیم کے باعث غناسطی سمجھے جاتے ہیں۔

حوالہ جات

• مرقیون۔ دائرۃ المعارف بریطانیکا۔ اخذ کردہ بتاریخ 29 جولائی 2017ء
• مرقیون انسائکلوپیڈیا ڈاٹ کام۔ اخذ کردہ بتاریخ 29 جولائی 2017ء