ورجینیا وولف

ورجینیا وولف لندن میں پیدا ہوئیں۔ اُن کے والد Leslie Stephen ایک ادیب تھے۔ گھر میں خوش حالی تھی اور وَرجینیا اور اُنکے بہن بھائیوں نے کسی اسکول جانے کی بجائے گھر پر ہی تعلیم حاصل کی، جس کے لیے قابل اساتذہ باقاعدہ گھر آیا کرتے تھے۔ وہ 13 برس کی تھیں کہ اُن کی والدہ کا انتقال ہو گیا اور وہ پہلی مرتبہ ایک بڑے نفسیاتی بحران سے دوچار ہوئیں۔ اُس کے کچھ ہی عرصے بعد وہ جنسی زیادتی کا نشانہ بنیں اور یہ واقعہ عمر بھر کے ایک روگ کی شکل اختیار کر گیا۔

ورجینیا وولف
(انگریزی میں: Virginia Woolf)
معلومات شخصیت
پیدائشی نام	(انگریزی میں: Adeline Virginia Stephen)
پیدائش	25 جنوری 1882ء   ہائیڈ پارک گیٹ ،  لندن
وفات	28 مارچ 1941ء (59 سال)  لویس
طرز وفات	خود کشی
شہریت	مملکت متحدہ (12 اپریل 1927–28 مارچ 1941) متحدہ مملکت برطانیہ عظمی و آئر لینڈ (25 جنوری 1882–12 اپریل 1927) مملکت متحدہ
شریک حیات	لیونارڈ وولف (10 اگست 1912–28 مارچ 1941)
ساتھی	ویٹا سیک وِل - ویسٹ
والد	لیسلی اسٹیفن
والدہ	جولیا سٹیفن
بہن/بھائی	وینیسا بیل ،  تھوبی اسٹیفن ،  ایڈرین اسٹیفن ،  جارج ہربرٹ ڈک ورتھ ،  سٹیلا ڈک ورتھ ،  جیرالڈ ڈک ورتھ ،  لورا سٹیفن
عملی زندگی
مادر علمی	کنگز کالج لندن
پیشہ	ناول نگار ،  مضمون نگار ،  آپ بیتی نگار ،  افسانہ نگار ،  روزنامچہ نگار ،  ادبی نقاد ،  ناشر ،  مصنفہ ،  حقوق نسوان کی کارکن ،  مصنفہ
مادری زبان	انگریزی
پیشہ ورانہ زبان	انگریزی
شعبۂ عمل	مضمون
کارہائے نمایاں	خود کا ایک کمرہ
مؤثر شخصیات	جارج ایلیٹ ،  ڈینیل ڈیفو ،  والٹر اسکاٹ ،  ایملی برونٹی
تحریک	بلومزبری گروپ
دستخط
	IMDB پر صفحہ

ادبی زندگی کا آغاز

تاہم یہ مایوسیاں اُن کی زندگی کا صرف ایک رُخ ہیں۔ دوسرا رُخ یہ ہے کہ شروع میں وہ جریدے ٹائمز کے لیے باقاعدگی کے ساتھ مضامین لکھتی رہیں، اُن کا گھر اُس وقت کے اہم ادیبوں کے مل بیٹھنے کے ایک مرکز کی شکل اختیار کر گیا اور اِن ادبی مباحث میں اُس دَور کی سیاست، ادب اور فنون پر بھرپور طریقے سے اظہارِ خیال کیا جاتا تھا۔ اِن محفلوں میں وَرجینیا خود کو ایک زندہ دِل شخصیت کے طور پر پیش کرتی تھیں لیکن اندر سے وہ دُکھی تھیں۔

شادی

1913ء میں معروف ادبی نقاد Leonard Woolf کے ساتھ شادی کے چند ہی مہینے بعد انھوں نے خودکشی کی پہلی کوشش کی۔ تاہم ادب تخلیق کرنے کے سلسلے میں اُن کی رفتار بدستور تیز رہی۔

ناول نگاری

1912ء ہی میں اُن کا پہلا ناول The Voyage Out شائع ہو چکا تھا۔ اِس کے بعد کے برسوں میں اُن کے کئی ناول شائع ہوئے، جن میں انسان کے شعوری تانے بانے کو بیان کرنے کی کوششیں کی گئی تھیں۔

اگرچہ اُن کے ناول آج بھی اہم ادبی تخلیقات میں شمار ہوتے ہیں لیکن اُن کی اصل وجہِ شہرت اُن کے بعد کے دَور کے مضامین ہیں۔ 1929ء میں اُن کا مضمون شائع ہوا تھا، A Room of One's Own۔ اِس میں انھوں نے ادب تخلیق کرنے والی خواتین کے خراب حالات کی طرف متوجہ کیا تھا۔ انھوں نے لکھا تھا کہ سال میں پانچ سو پاؤنڈ ادا کیے جائیں اور رہنے کے لیے ایک الگ کمرہ دیا جائے تو خواتین کو بھی ویسی ہی کامیابی مل سکتی ہے، جیسے کہ مرد ادیبوں کو۔ تاہم ادب کے میدان میں اُن کی کامیابیاں اُن کی خراب نفسیاتی حالت کو بہتر نہ بنا سکیں۔

حقوق نسواں

اس کے علاوہ وہ خاص طور پر مغربی دُنیا میں حقوقِ نِسواں کی تحریک کی بانی شخصیات میں شمار ہوتی ہیں۔ اُن کی یہ پہچان اتنی زیادہ نمایاں ہے کہ کبھی کبھی اُن کا ایک بے مثل ادیبہ ہونا پس منظر میں چلا جاتا ہے۔

انتقال

اُن پر بار بار مایوسی کے دَورے پڑتے تھے، انھیں آوازیں سنائی دیتی تھیں اور وہ کئی کئی روز تک کام نہیں کر سکتی تھیں۔ دوسری عالمی جنگ کے دوران میں 1940ء میں جرمن جنگی طیاروں نے اُن کے لندن کے گھر کو تباہ کر دیا۔ 28 مارچ سن 1941ء کو انھوں نے ایک ندی میں چھلانگ لگا دی اور ڈوب کر اپنی مایوسیوں سے ہمیشہ کے لیے نَجات پا گئیں۔ مغربی دُنیا میں وہ غالباً پہلی ادیبہ ہیں، جس نے خواتین پر زور دیا کہ وہ محض مرد ادیبوں کی نقالی کرنے کی بجائے اپنے الگ تخلیقی راستے تلاش کریں۔