اردو تھیسارس (ویب سائٹ)

اردو تھیسارس اردو زبان کی ایک موبائل اینڈرائیڈ ایپلی کیشن اور ویب سائٹ ہے، جو اردو زبان کے تقریباً 40 ہزار الفاظ مع مترادفات پر مشتمل ہے۔ اس کا اجرا 16 جولائی 2016ء کو کیا گیا۔ اس آن لائن اردو لغت کو لاہور کے معروف مترجم مشرف علی فاروقی نے شروع کیا، جو اس سے قبل طلسم ہوش ربا اور داستان امیر حمزہ کو اردو سے انگریزی میں ترجمہ کر چکے ہیں۔

اردو تھیسارس

اردو تھیسارس کا لوگو
سائٹ کی قسم	لغت
دست‌یاب	اردو
مالک	مشرف علی فاروقی
ایڈیٹر	مشرف علی فاروقی
ویب سائٹ	urduthesaurus.com
تجارتی	نہیں
آغاز	2016ء (2016ء اینڈروائیڈ ایپ)
موجودہ حیثیت	فعال

منصوبہ

اس تھیسارس کو شروع کرنے والے پاکستانی مترجم مشرف علی فاروقی ہیں جو قبل ازیں داستان امیر حمزہ اور طلسم ہوش ربا کا انگریزی زبان میں ترجمہ کر چکے ہیں۔ اس کا اجرا جولائی 2016ء میں ہوا، جب کہ اس پر کام 5 سال قبل شروع کیا گیا تھا۔ ماہرین اردو ادب و لسانیات جناب ڈاکٹر تحسین فراقی، ڈاکٹر معین نظامی، محمد سلیم الرحمان اور ڈاکٹر مظہر محمود شیرانی اس علمی منصوبے میں بطور مشیر و مدیر شریک رہے ہیں۔ اردو زبان اور الفاظ کے ایک ماخذ کے طور پراس کو بہتر بنانے کا عمل مسلسل جاری ہے۔ اپنی موجودہ حالت میں یہ محض مترادفات کے ایک حصے پر مشتمل ہے، لیکن مستقبل میں اُردو اور ذولسانی لغات کے علاوہ، اس میں متضادات، محاورات اور ضرب الامثال کا اضافہ بھی کیا جائے گا۔

خصومیات

• مترادفات: اردو تھیسارس میں ہر تلاش کردہ لفظ کے مترادفات (اگر کوئی ہوں) پہلے درج کیے گئے ہیں۔
• متعلقہ مترادفات: تلاش کردہ لفظ جہاں جہاں کسی دوسرے لفظ کے مترادف کے طور پر آیا ہے، تو وہ لفظ اور اُس لفظ کے تمام مترادفات بھی تلاش کردہ لفظ کے ’متعلقہ مترادفات‘ کے طور پر اُس کے اصل مترادفات کے نیچے دیے گئے ہیں۔ اُس دوسرے لفظ کی نشان دہی کے لیے اُسے جلی حروف میں لکھا گیا ہے۔

جہاں کسی تلاش کردہ لفظ کے مترادفات مہیا نہیں وہاں صرف ’متعلقہ مترادفات‘ دیے گئے ہیں۔ ویب گاہ اور ایپ کے ذریعے اُردو تھیسارس کے موجودہ ورژن میں چالیس ہزار سے زائد الفاظ اور بیس ہزار سے زائد مترادفات کے مجموعے ڈھونڈے جا سکتے ہیں۔

مزید دیکھیے

• آن لائن اردو لغات کی فہرست
• اردو لغت تاریخی اصول پر
• اردو لغات

بیرونی روابط

• اردو تھیسارس کی باضابطہ ویب گاہ
• گوگل پلے اسٹور پر اینڈرائیڈ ایپلی کیشن