ام عمارہ

نسیبہ بنت کعب ام عمارہ کنیت، قبیلہ خزرج کے خاندان نجار سے تھیں۔

ام عمارہ/نسيبہ بنت كعب نسيبة بنت كعب الأنصارية
نسيبہ بنت كعب بن عمرو بن عوف بن مبذول بن عمر بن غنم بن مازن بن نجار خزرجيہ انصاریہ
معلومات شخصیت
مقام پیدائش	مدینہ منورہ
تاریخ وفات	سنہ 634ء
مدفن	جنت البقیع
شوہر	زيد بن عاصم انصاری غزيہ بن عمرو انصاری
اولاد	حبيب بن زيد عبد الله بن زيد تميم بن زيد ضمرہ بن غزيہ
عملی زندگی
نسب	بنو خزرج
پیشہ ورانہ زبان	عربی
عسکری خدمات
لڑائیاں اور جنگیں	غزوہ احد ،  فتنۂ ارتداد کی جنگیں ،  غزوہ بنی قریظہ ،  غزوہ خیبر ،  غزوہ حنین ،  جنگ یمامہ

نام و نسب

نسیبہ نام، اُم ُعمارہ کنیت، قبیلہ خزرج کے خاندان نجار سے ہیں، نسب نامہ یہ ہے : اُمّ۔ ُعما۔ َرہ بنت کعب بن عمرو بن عوف بن مبذول بن عمرو بن غنم بن مازن بن نجار۔

اسلام

غزِیہ بن عمرو کے ساتھ بیعتِ عقبہ میں شرکت کی۔ بیعتِ عقبہ میں 73 مرد اور دو عورتیں شامل تھیں، اُمّ عمارہ کا بھی انہی میں شمار ہوتا ہے۔

نکاح

پہلا نکاح زید بن عاصم سے ہوا، پھر۔ غزِیہ بن عمرو کے عقدِ نکاح میں آئیں۔

غزوات میں شرکت

غزوہ احد میں شریک ہوئیں اور نہایت پامردی سے لڑیں، جب تک مسلمان فتحیاب تھے، وہ مشک میں پانی بھر کر لوگوں کو پلا رہی تھیں، لیکن جب شکست ہوئی تو آنحضرتﷺ کے پاس پہنچیں اور سینہ سپر ہوگئیں، کفار جب آپ پر بڑھتے تھے تو تیر اور تلوار سے روکتی تھیں۔ آنحضرتﷺ کا خود بیان ہے کہ میں اُحد میں ان کو اپنے دائیں اور بائیں برابر لڑتے ہوئے دیکھتا تھا۔ ابن قمیئہ جب درّاتا ہوا آنحضرتﷺ کے پاس پہنچ گیاتو اُمّ عمارہ نے بڑھ کر روکا۔ چنانچہ کندھے پر زخم آیا اور غار پڑ گیا، انھوں نے بھی تلوار ماری لیکن وہ دوہری زرہ پہنے ہوئے تھا اس لیے کارگر نہ ہوئی۔ بعض روایتوں میں ہے کہ انھوں نے ایک کافر کو قتل کیا تھا، اُحد کے بعد بیعتِ الرضوان، خیبر اور فتح مکہ میں بھی شرکت کی۔ ابوبکرکے عہد میں یمامہ کی جنگ پیش آئی، مسیلمہ کذّاب مدعی نبوّت سے مقابلہ تھا۔ اُمّ عمارہ اپنے ایک لڑکے (حبیب) کو لے کر خالدکے ساتھ روانہ ہوئیں اور جب مسیلمہ نے ان کے لڑکے کو قتل کر دیا تو انھوں نے منت مانی کہ ’’یا مسیلمہ قتل ہوگا یا وہ خود جان دے دیں گی۔ ‘‘ یہ کہہ کر تلوار کھینچ لی اور میدان جنگ کی طرف روانہ ہوئی اور اس پامردی سے مقابلہ کیا کہ 12 زخم کھائے اور ایک ہاتھ کٹ گیا، اس جنگ میں مسیلمہ بھی مارا گیا۔

وفات

اس کے بعد معلوم نہیں کب تک زندہ رہیں۔

اولاد

وفات کے وقت چار اولادیں یادگار چھوڑیں، حبیب، عبد اللہ (پہلے شوہر سے) تمیم، خولہ (دوسرے شوہر سے)۔

فضل وکمال

چند حدیثیں روایت کی ہیں، جوعباد بن تمیم (پوتے) لیلے(کنیز) عکرمہ، حارث، ابن کعب اور ام سعد بنت سعد بن ربیع سے مروی ہیں۔

حالات زندگی

اخلاق: آنحضرتﷺ سے ان کو جو محبت تھی اس کا اصلی منظر تو غزوۂ اُحد میں نظر آتا ہے لیکن اور بھی چھوٹے چھوٹے واقعات ہیں۔ ایک مرتبہ آنحضرتﷺ ان کے مکان میں تشریف لائے تو انھوں نے کھانا پیش کیا ارشاد ہوا: ’’تم بھی کھاؤ،‘‘ بولیں : میں روزہ سے ہوں۔ آنحضرتﷺ نے کھانا نوش فرمایا اور فرمایا کہ روزہ دار کے پاس اگر کچھ کھایا جائے تو اُس پر فرشتے درود بھیجتے ہیں۔ ام عمارہ نے کہا کہ یا رسول اﷲﷺ! آپ ﷺدعا فرمائیے کہ اﷲ تعالیٰ ہم لوگوں کو جنت میں آپ ﷺ کی خدمت گزاری کا شرف عطا فرمائے اس وقت آپ ﷺ نے ان کے لیے اور ان کے شوہر اور ان کے بیٹوں کے لیے اس طرح دعا فرمائی کہ۔

اَللّٰھُمَّ اجْعَلْھُمْ رُفَقَائِیْ فِی الْجنَّۃِ۔
یااﷲعزوجل! ان سب کو جنت میں میرا رفیق بنا دے۔ بی بی ام عمارہ زندگی بھر علانیہ یہ کہتی رہیں کہ رسول اﷲﷺ کی اس دعا کے بعد دنیا میں بڑی سے بڑی مصیبت بھی مجھ پرآجائے تو مجھ کو اس کی کوئی پروا نہیں ہے۔ ≥