تذکرۃ الواقعات

تذکرۃ الواقعات یا ہمایوں نامہ کتاب ہمایوں کے ملازم جوہر آفتابچی نے اکبر کے حکم پر سنہ 995ھ / 1586ء یا 1587ء میں لکھی۔ جوہر آفتابچی برسوں تک ہمایوں کی خدمت میں رہے، اس لیے یہ کتاب ہمایوں کے متعلق معلومات کی مستند تاریخ سمجھی جاتی ہے۔ اس کتاب میں آفتابچی نے آنکھوں دیکھے واقعات اور ہمایوں کی زندگی کے حالات درج کیے ہیں۔ انھوں نے یہ کتاب فارسی زبان میں لکھی تھی۔ گوروں کی آمد سے قبل برصغیر میں فارسی زبان کو درباری امور کے لیے اور تحریری زبان کے طور پر استعمال کیا جاتا تھا۔ اسے افغانستان میں دری کہا جاتا ہے، کیونکہ یہ دربار میں استعمال کی جانے والی زبان تھی۔ اس میں مالدیو سے ملنے کے لیے ہمایوں کی کوششوں اور مارواڑ، بیکانیر اور جیسلمیر کے صحرائی علاقہ میں ہمایوں کو پیش آنے والی دشواریوں اور سختیوں کو بھی بیان کیا گیا ہے۔

مصنف

تفصیلی مضمون کے لیے جوہر آفتابچی ملاحظہ کریں۔

تذکرۃ الواقعات کے مولف جوہر آفتابچی تاریخی دنیا میں کوئی اہم شخص نہیں تھے۔ نہ وہ پختہ کار مورخ تھے۔ اسی وجہ سے ان کے حالاتِ زندگی نہیں ملتے۔ اس کتاب کے مندرجات سے معلوم ہوتا ہے کہ ایک معمولی خدمت پر مامور ہونے کے باوجود انھیں ہمایوں کا خاص اعتماد حاصل تھا۔ اور کتاب کے آخر میں یہ واقعہ ملتا ہے کہ ہمایوں نے ہندوستان کو دوبارہ فتح کرنے کے موقع پر خوہر کو پرگنہ ہیبت پور کا محصل مقرر کیا تھا۔