جنگ مجدو (609 قبل مسیح)

609 قبل مسیح میں لڑی جانے والی ایک جنگ جو مصر اور مملکت یہوداہ کے مابین لڑی گئی۔ اِس جنگ میں یہودیہ کا بادشاہ یوسیاہ قتل ہوا اور فرعون مصرنکوہ فاتح قرار پایا۔

جنگ مجدو
فرعون مصر نکوہ کا مجسمہ۔ بروکلائن عجائب گھر، نیویارک
تاریخ جون یا جولائی 609 قبل مسیح مقام مجدو، موجودہ (مجدو، اسرائیل) 32°35′N 35°11′E نتیجہ مملکت یہوداہ فرعون مصر کو خراج اداء کرنے لگا۔ مملکت یہوداہ مصر کی باجگزار بن گئی۔
مُحارِب
عہد متاخر قدیم مصر	مملکت یہوداہ
کمان دار اور رہنما
نکوہ دوم	یوسیاہ
طاقت
نامعلوم	نامعلوم
ہلاکتیں اور نقصانات
نامعلوم	کثیر التعداد

تاریخ

609 قبل مسیح میں فرعون مصر نکوہ نے مصر کے شمال میں واقع ممالک کی طرف لشکر کشی کی جس کی وجہ بادشاہِ سلطنت اشور کا مقابلہ کرنا تھا۔ فرعون مصر نکوہ کی اِس پیش قدمی کو روکنے کے لیے یوسیاہ، بادشاہِ یہوداہ مقابلے کے لیے نکلا۔ مجدو کے مقام پر مختصر سی جنگ کے بعد مصری تیراندازوں نے یوسیاہ کو قتل کر دیا اور وہ فوراً وہیں ہلاک ہو گیا۔ بائبل کی کتاب سلاطین دؤم اور کتاب تواریخ میں اختلاف ہے، کتاب سلاطین دؤم کے مطابق یوسیاہ کو فرعون مصر نکوہ نے دیکھتے ہی قتل کر دیا جبکہ کتاب تواریخ کے بیان کے مطابق یوسیاہ جنگ میں تیراندازوں کے تیر لگنے سے قتل ہوا۔ کتاب تواریخ دؤم کے بیانات سے بھی معلوم ہوتا ہے کہ فرعون مصر نکوہ بادشاہ سلطنت اشور سے مقابلے کو نکلا تھا اور راستے میں اُس کی مزاحمت کے لیے یوسیاہ، شاہ یہوداہ نکلا۔ نکوہ نے اُسے بذریعہ قاصد مطلع کیا کہ میرا تم سے کوئی جھگڑا ہے اور نہ ہی کوئی مزاحمت، سو یوسیاہ جنگ کے ارادے سے مجدو پہنچ گیا اور جہاں اُس کا مقابلہ نکوہ کی افواج سے ہوا اور تیر اندازوں سے اُسے تیر مارا جس سے اُس کی ہلاکت ہوئی۔ بہر حال یہ مسلمہ ہے کہ اس جنگ میں یوسیاہ قتل ہو گیا اور مملکت یہوداہ فرعون مصر نکوہ کو خراج اداء کرنے لگی۔

بائبل میں مذکور بیانات

بائبل کی کتاب سلاطین دؤم میں اس جنگ کا ذکر یوں کیا گیا ہے:

• یوسیاہ بادشاہ کے ایام سلطنت میں شاہ مصر نکوہ شاہِ اسور پر چڑھائی کرنے کے لیے دریائے فرات کو گیا۔ یوسیاہ بادشاہ جنگ میں اُس کا مقابلہ کرنے کے لیے نکلا لیکن نکوہ نے مجدو میں اُسے دیکھتے ہی قتل کر دیا۔ اور یوسیاہ کے ملازم اُس کی لاش کو ایک رتھ میں مجدو سے یروشلیم لے گئے اور اُسے اُس کی اپنی ہی قبر میں دفن کر دیا۔

کتاب تواریخ دؤم میں تھوڑے اختلاف کے ساتھ اِس جنگ کے حالات یوں درج ہیں:

• شاہ مصر نکوہ نے لڑنے کے لیے دریائے فرات کے کنارے کرکمیس پر حملہ کیا اور یوسیاہ اُس سے جنگ کرنے نکلا۔ لیکن نکوہ نے اُسے قاصدوں کے ذریعہ کہلا بھیجا کہ اے شاہِ یہوداہ، مجھے تجھ سے کیا غرض؟ وہ تو نہیں جس پر میں اِس وقت حملہ کرنے آیا ہوں۔ میں تو اُس خاندان پر حملہ کرنے آیا ہوں جس سے میری جنگ جاری ہے۔ خدا نے مجھے جلدی کرنے کے لیے کہا ہے۔ لہٰذا تو خدا کی جو میرے ساتھ ہے، مخالفت کرنا چھوڑ دے، ورنہ وہ تجھے ہلاک کر دے گا۔ یوسیاہ پھر بھی اُس کا مقابلہ کرنے سے باز نہ آیا بلکہ لڑائی میں اُسے اُلجھانے کے لیے اپنا بھیس بدل لیا۔ اور خدا کے حکم سے جو کچھ نکوہ نے کہا، اُسے نہ سنا اور مجدو کی وادی میں جا پہنچا تاکہ اُس کے ساتھ لڑائی کرے۔ اور تیراندازوں نے یوسیاہ بادشاہ کو تیر مارا اور اُس نے اپنے خادموں سے کہا کہ میں سخت زخمی ہو گیا ہوں۔ مجھے یہاں سے لے چلو۔ لہٰذا انھوں نے اُسے اُس کے رتھ میں سے نکال کر ایک دوسرے رتھ پر چڑھایا اور اُسے یروشلیم میں لے آئے، جہاں وہ وفات پاگیا اور اپنے باپ دادا کی قبروں میں دفن کیا گیا اور سارے یہوداہ اور یروشلیم نے اُس کے لیے ماتم کیا۔

مزید دیکھیے

• مملکت یہوداہ
• نکوہ
• سلطنت اشور
• کرکمیس