خالد علیگ

خالد علیگ پاکستانی مایہ ناز شاعر اور صحافی تھے۔ اُن کا اصل نام سید خالد احمد شاہ تھا۔ وہ 1925ء میں قائم گنج، ضلع فرخ آباد (اُتر پردیش) میں پیدا ہوئے تھے۔ انھوں نے علی گڑھ مسلم یونیورسٹی سے تعلیم حاصل کی اور قیام پاکستان کے بعد 1947ء میں پاکستان آ گئے۔ وہ پیشہ کے اعتبار سے سِول انجینئر تھے اور انھوں نے اپنی ملازمت کے سلسلے میں اوکاڑہ، لاہور، سکھر، میرپور خاص اور دیگر شہروں میں قیام کیا۔ 1960ء میں وہ مستقلاً کراچی آ گئے اور پھر تاعمر اسی شہر میں قیام پزیر رہے۔ خالد علیگ ہمیشہ انجمن ترقی پسند مصنّفین کی صف اوّل میں شامل رہے۔ انھوں نے اپنی صحافت کا آغاز لکھنؤ کے جریدے تنویر سے کیا تھا۔ ملازمت سے ریٹائرمنٹ کے بعد وہ ایک مرتبہ پھر صحافت کے شعبے سے وابستہ ہوئے اور کمیونسٹ پارٹی آف پاکستان کے جریدے منشور سے منسلک ہو گئے۔ بعد ازاں وہ روزنامہ مساوات کے عملہ ادارت میں شامل ہوئے اور اس کے مدیر کے عہدے تک پہنچے۔

خالد علیگ
معلومات شخصیت
پیدائش	سنہ 1925ء   قائم گنج
وفات	15 اگست 2007ء (81–82 سال)  کراچی
وجہ وفات	پھیپھڑوں کا سرطان
مدفن	لانڈھی
شہریت	پاکستان
عملی زندگی
مادر علمی	علی گڑھ یونیورسٹی
پیشہ	شاعر ،  صحافی
باب ادب

جناب خالد علیگ ایک خوش گوشاعر تھے۔ وہ ہمیشہ ترقی پسند نظریہ سے وابستہ رہے۔ انھوں نے ہر دور میں مزاحمتی شاعری کی جو ان کی شناخت بن گئی۔ ان کا شعری مجموعہ غزال دشت سگاں کے نام سے اشاعت پزیر ہوا تھا۔ وہ ہمیشہ سرکاری اعزازات سے دور بھاگتے رہے تاہم جب 3 جون 1999ء کو کراچی پریس کلب نے انھیں تاحیات اعزازی رکنیت پیش کر کے اپنے وقار میں اضافہ کرنا چاہا تو انھوں نے اسے رد نہ کیا۔ ان کا آخری قطعہ ملاحظہ ہو جو ان کی زندگی کا ماحاصل سمجھا جا سکتا ہے۔

دیوار بن کے ظلم کے آگے اڑے گا کون

ارباب جہل و جبر کے پیچھے پڑے گا کون

میں اپنی جنگ لڑ بھی چکا، ہار بھی چکا

اب میرے بعد میری لڑائی لڑے گا کون

پندرہ اگست 2007ء کو خالد علیگ کراچی میں وفات پاگئے۔وہ کراچی میں قبرستان مولا مدد، ریڑھی گوٹھ لانڈھی کے قبرستان میں آسودہ خاک ہیں۔