بطن حاد

بطنِ حاد، طب میں ایک نہایت تیزی سے نمودار ہونے والا درد بطن یا پیٹ کا درد ہوتا ہے جو فوری طبی امداد، کامل تشخیص اور موزوں ترین معالجہ کا طالب ہوتا ہے بصورت دیگر مریض کی کیفیت جان لیوا نوبت تک ابتر ہو سکتی ہے۔ اس کو انگریزی میں Acute abdomen کہا جاتا ہے اور طب میں اسے ایک طبی عاجلہ (medical emergency) کا درجہ دیا جاتا ہے۔

انسانی پیٹ کا ایک شکلیاتی اظہار؛ اندرونی اعضاء (یہاں لبلبہ، اثناعشری اور گردے) کو دوران میں تشخیص و علاج، پیٹ کی سطح سے ہی شناخت کرلینے کی خاطر سطحی نشانات کے وہ مقام دکھائے گئے ہیں جو ایک طبیب استعمال کرتا ہے۔ (شکل میں موجود انگریزی الفاظ کی تفصیل کے لیے بطن (انسان) دیکھیے)

• پیٹ کے درد پر عمومی مضمون کے لیے پیٹ درد دیکھیے۔

پیٹ میں درد کی ایسی کیفیت کہ جو اچانک نمودار ہوئی ہو ہمیشہ نہیں تو اکثر خاصی نازک صورت حال ہوتی ہے اور بعض اوقات اس کو جراحی کی فوری ضرورت ہوا کرتی ہے۔ اس قسم کے درد میں عموما دکھن (tenderness) اور سختی عضلات (muscular rigidity) کی علامات بھی ساتھ واقع ہوتی ہیں۔ اس کی نازک اور عاجل نوعیت کی وجہ سے اسے بطن جراحی (surgical abdomen) بھی کہا جاتا ہے۔

پہنچ

پہنچ (approach) سے مراد طب میں ایک طبیب کی مریض یا بالفاظ دیگر اس کی علامات کی و اشارات کی تشخیص کی جانب بڑھنے کی اور درست معالجے کا فیصلہ کرنے کی ہوتی ہے۔ بطن حاد کے سلسلے میں تاریخ (یعنی مریض کا طبیب تک پہچنے سے پہلے تک حال) اور جسمانی امتحان (physical examinnation) نہایت کلیدی کردار ادا کرتا ہے اور ایک طبیب ان دو طریقہ کار کے مہارت سے اطلاق کے بعد ہی ایک درست معالجہ مہیا کرنے کے قابل ہو سکتا ہے، بصورت دیگر ایک غیر مخصوص معالجہ (غلط معالجہ) نتیجے کے طور پر ظاہر ہوتا ہے اور اس قسم کے معملات کا ہونا بعید از قیاس نہیں۔

تاریخ (مریض)

تاریخ، طب میں مریض کی علامات و اشارات کا گذشتہ حال معلوم کرنے کو کہا جاتا ہے اور اسے طب میں ایک معراج فن کہا جاتا ہے جس کی وجہ سے معالجے کے اگلے مرحلے یعنی طبی امتحان اور پھر مناسب اختبارات کا انتخاب کرنے میں بہت مدد ملتی ہے۔ مثلا بطن حاد میں درد کا وقت آغاز، نوعیت آغاز (تیز یا sharp، کند یا dull اور قولنج یا colicky وغیرہ)، الحاق درد یعنی درد سے قبل / دوران میں / بعد آنے والی علامات، درد کو کم اور زیادہ کرنے والے عوامل اور جسم میں درد کا صحیح ترین مقام اور اس کی منتقلی کی سمت (اگر کوئی ہو) وغیرہ کے درست تجزیے سے خاصی صحت کے ساتھ درد کی مناسب تشخیص کے لیے پیشگوئی کی جا سکتی ہے۔

طبی امتحان

تاریخ کے بعد دوسرا اہم مرحلہ (اگر مریض کی حالت مستحکم ہو)، طبی امتحان (medical examination) کا آتا ہے جس میں ایک طبیب مریض کے جسم (بطور خاص تکلیف یا شکایت کے مقام کا) معائنہ کرتا ہے۔ ایک طبی امتحان کے چار مراحل ہوا کرتے ہیں۔

1. معائنہ (Inspection) --- یعنی نظر سے معائنہ کرنا
2. لمس (Palpation) --- یعنی چھو کر یا لمس سے معائنہ کرنا
3. قرع (Percussion) --- یعنی انگلی سے ٹھونک کر یا ضرب لگا کر آواز سے تشخیص کرنا
4. تسمع (Ascultation) --- یعنی آلہ بنام سماعہ (stethoscope) کی مدد سے اعضاء کی آوازیں سننا