نصیر کوٹی

نصیر اللہ خان المعروف نصیر کوٹی (پیدائش: 5 ستمبر 1936ء - 21 دسمبر 2016ء) پاکستان سے تعلق رکھنے والے اردو زبان کے ممتاز شاعر تھے۔ انھوں نے غزل اور نعت کی اصنافِ سخن میں طبع آزمائی کی۔

نصیر کوٹی
معلومات شخصیت
پیدائشی نام	(اردو میں: نصیر اللہ خان)
پیدائش	5 ستمبر 1936ء   فتح پور ضلع ،  اتر پردیش ،  برطانوی ہند
وفات	21 دسمبر 2016ء (80 سال)  کراچی ،  پاکستان
شہریت	برطانوی ہند پاکستان
عملی زندگی
پیشہ	شاعر
پیشہ ورانہ زبان	اردو
باب ادب

حالات زندگی

نصیر کوٹی 5 ستمبر 1936ء کو قصبہ کوٹ (ہسوہ)، ضلع فتح پور، اتر پردیش ، برطانوی ہندوستان میں پیدا ہوئے۔ ان کا نام اصل نام نصیر اللہ خان اور نصیر تخلص تھا لیکن نصیر کوٹی کے قلمی نام شہرت پائی۔ انٹرمیڈیٹ کی تعلیم مکمل کرنے کے بعد فاضل اردو کی سند حاصل کی۔ درس و تدریس کے پیشے سے وابستہ رہے۔ 1947ء میں شاعری ابتدا کی۔ حضرت بہار کوٹی کے شاگرد بنے۔ ان کا پہلا مجموعہ کلام لذتِ آزار کے نام سے 1982ء میں شائع ہوا۔ اس مجموعہ کی دوسرا ایڈیشن 1992ء میں شائع ہوا۔ بعد ازاں کچھ نئی غزلوں کے ساتھ انتخاب کے نام سے 2012ء میں اور نعتیہ شعری مجموعہ سیل تجلی شائع ہو چکے ہیں۔ نصیر کوٹی نے کراچی میں اپنے استاد حضرت بہار کوٹی کے نام پر ایک ادبی تنظیم بہارِ ادب کے نام سے قائم کر رکھی تھی جس کے زیرِ اہتمام شعری نشستوں اور بڑے مشاعروں کا بھی اہتمام ہوتا تھا۔

نمونۂ کلام

نعت

زندگانی کے بتائے جس نے دنیا کو اصول		محترم ہو سب کی نظروں میں نہ کیوں ایسا رسول
اُس کی عظمت کا تعین کس کے بس کی بات ہے		آسماں پر کہکشاں ہوجس کے نقشِ پا کی دھول
تھی دعا یکساں لبِ سرکار پر سب کے لیے		سنگ زن ہو یا کوئی برسانے والا اُن پہ پھول
کتنی غالب ہو گئی ہم پر محبت دہر کی		اپنے آقا کی ہدایت کو گئے ہم لوگ بھول
صرف اِک ہرزہ سرائی کے سوا کیا ہے نصیر		یہ عمل اور اِس پہ تیرا دعویِٰ عشقِ رسول

غزل

نہ کلیاں مسکراتی ہیں نہ پھولوں پر نکھار آئے		بڑی بے کیفیوں کے ساتھ ایام بہار آئے
کوئی قیمت نہیں ایسے وفا کے عہد و پیماں کی		مجھے جس پر یقیں آئے نہ ان کو اعتبار آئے
جہاں کے چپے چپے پر گماں ہوتا تھا منزل کا		مری منزل میں ایسے مرحلے بھی بے شمار آئے
حقیقت اس کے دل سے پوچھئے جذب محبت کی		سمجھ میں جس کے مفہوم نگاہ شرمسار آئے
نظام گلستاں ظرف تمنا سے عبارت ہے		ترے دامن میں پھول آئے مرے دامن میں خار آئے
مریض غم کے لب پر نام ان کا بار بار آیا		پھر اس کے بعد چارہ ساز آئے غم گسار آئے
نصیر آیا طواف کوئے جاناں راس کب دل کو		تمنائے سکوں لے کر گئے اور بیقرار آئے

وفات

نصیر کوٹی 21 دسمبر 2016ء کو 92 برس کی عمر میں کراچی، پاکستان میں انتقال کر گئے۔