گیندا لال ڈکشٹ

گیندا لال ڈکشٹ (انگریزی: Genda Lal Dixit، ہندی= गेंदालाल दीक्षित)، (پیدائش: 20 نومبر، 1888ء - وفات: 30 مارچ، 1930ء) ہندوستان کے انقلابی اور اسکول ٹیچر تھے۔ وہ تحریک آزادی ہند کے ان انقلابی کارکنان میں شامل تھے جنھوں نے اپنی سرگرمیوں سے برطانوی راج کو ناقابلِ تلافی نقصان پہنچایا۔ 1918ء میں مین پوری سازش کے جرم میں انھیں گرفتار کیا گیا اور مختلف جیلوں میں قید رہے۔ وہ مشہور انقلابی رام پرساد بسمل کے ساتھ بھی وابستہ رہے۔

گیندا لال ڈکشٹ
(ہندی میں: गेंदालाल दीक्षित)
معلومات شخصیت
پیدائش	30 نومبر 1888ء   مین پوری ضلع ،  اتر پردیش
وفات	21 دسمبر 1920ء (32 سال)  دہلی ،  برطانوی ہند
شہریت	برطانوی ہند
عملی زندگی
پیشہ	انقلابی

حالات زندگی

گیندا لال ڈکشٹ 20 نومبر، 1888ء کو موضع ٹبیسر، ضلع مین پوری، اتر پردیش، برطانوی ہندوستان میں پیدا ہوئے۔ انھوں نے میٹرک تک تعلیم حاصل کی۔ پیشے کے اعتبار سے اوریا کے ڈی اے وی اسکول میں استاد تھے۔ معلمی کے زمانہ میں ہی آریہ سماج اور محب وطن سیاسی کارکنوں سے متاثر ہو کر انھوں نے برطانوی حکومت سے ملک کو آزاد کرانے کے لیے شیواجی سوسائٹی کی تنظیم کی۔۔ دریائے چمبل اور دریائے جمنا کے بیچ کے علاقے میں دھاوا مارنے والے ڈاکؤں کے گروہ سے تعلق قائم کیا اور انھیں ملک کی آزادی کے لیے کام کرنے کی ترغیب دی۔ انقلابی سرگرمیوں کے لیے ان کی تنظیم کی اور سرکاری خزانوں اور دوسرے سرکاری مقامات پر حملوں کامنصوبہ بنایا۔ اپنے اصل مقصد سے حکومت کی توجہ ہٹانے کے لیے گوالیار کے ایک گاؤں پر حملے کی قیادت کی۔ ایک پولیس مخبر نے ان کا راز فاش کر دیا۔ پوری پارٹی کو گھیر لیا گیا اور اس کے 35 کارکنان پولیس مقابلے میں مارے گئے۔ باقی اراکین کو پکڑ لیا گیا جن میں گیندا لال بھی شامل تھے اور گوالیار، قلعہ آگرہ اور مین پوری کی جیلوں میں قید رہے۔ ان کی قائم کردہ ماتری دیدی انقلابی جماعت کے ممبروں نے ان کے چھڑانے کے لیے ایک ناکام کوشش کی۔ جیل میں وحشیانہ تشدد کے سبب سخت بیمار پڑ گئے اور بعد میں تپ دق ککا شکار ہو گئے۔ پولیس حکام کو ان کا مخبر بن جانے کی پیش کش کر کے دھوکا دیا اور جرات مندانہ طور پر بچ نکلنے کے موقع سے فائدہ اٹھایا۔ کئی مہینوں تک روپوش رہے۔ ان کے خاندان کے افراد کو پولیس نے دہشت زدہ کر کے تکلیفیں پہنچائیں مگر انھوں نے ہار نہیں مانی۔ خفیہ طریقے سے دہلی پہنچے اور ایک پیاؤ پر پانی پلانے والے نوکر کی حیثیت سے خدمت انجام دی۔ ان کی بیوی اور چھوٹا بھائی جب دہلی جا کر ان سے ملے تو انھیں معلوم ہوا کہ وہ پیچش کے مرض میں شدت سے مبتلا ہیں۔ پولیس کے پہچان لینے کے خوف کی بنا پر طبی امداد نہ ملنے سے ان کی حالت نازک ہو گئی۔ انھیں دہلی کے ارون ہسپتال لے جایا گیا اور فرضی نام سے داخلہ لیا۔ ایک نامعلوم آدمی کی حیثیت سے 21 دسمبر 1920ء کو انتقال کر گئے۔ پولیس ان کی لاوارث لاش لے گئی اور بعد میں انھیں شناخت کر لیا گیا۔