حضرت ابورافعؓ رضی اللہ عنہ (وفات: 35ھ) صحابی رسول صلی اللہ علیہ وسلم تھے۔ابو رافع رضی اللہ تعالیٰ عنہ نے غزوہ بدر سے پہلے اسلام قبول کر لیا تھا ۔غزوہ بدر کے بعد مدینہ ہجرت فرمائی۔غزوہ بدر میں شریک نہ ہو سکے ، غزوہ احد اور دیگر تمام غزوات نبوی میں شامل تھے۔حضرت علی رضی اللہ تعالیٰ عنہ کے ابتدائی دور خلافت میں وفات پائی ۔

ابو رافع
معلومات شخصیت

نام و نسب ترمیم

نام میں بہت اختلاف ہے، زیادہ مشہور اسلم اور ابورافع کنیت ہے نسبی شرف کے لیے یہ سند کافی ہے کہ سرکار دو عالم کی غلامی کا شرف رکھتے تھے اور حضور نے یہ کہہ کر اپنے خاندان میں شامل کر لیا تھا کہ مولی القوم من انفسھم [1] اس مرتبہ کے بعد خاندانی اور نسبی عظمت کا کون درجہ باقی رہ جاتا ہے۔

غلامی اور آزادی ترمیم

ابتدا میں ابورافعؓ حضرت عباس رضی اللہ تعالیٰ عنہ کے غلام تھے انھوں نے آنحضرت کو دے دیا تھا، آنحضرت نے حضرت عباسؓ کے اسلام کی مسرت پر آزاد کر دیا۔ [2]

اسلام ترمیم

حضرت ابورافعؓ ان لوگوں میں ہیں جن کے دل پر نبوت کاپر جلال چہرہ ہی دیکھ کر اسلام کا نقش بیٹھ گیا، ان کے اسلام کے متعلق ان کا بیان ہے کہ ایک مرتبہ مجھ پر قریش نے آنحضرت کے پاس کسی کام سے بھیجا،آپ کو دیکھتے ہی میرا دل اسلام کی طرف ہو گیا میں نے عرض کیا یا رسول اللہ ! صلی اللہ علیہ وسلم اب میں واپس نہ جاؤں گا، آپ نے فرمایا میں قاصد کو نہیں روکتا اور عہد شکنی نہیں کرتا اس وقت تم لوٹ جاؤ،اگر کچھ دنوں تک بدستور تمھارے دل میں اسلام کا جذبہ باقی رہا تو پھر چلے آنا؛چنانچہ اس وقت تو یہ واپس چلے گئے اورپھر دوبارہ حاضرہوکر مشرف باسلام ہوئے۔ [3]

ابتلا و آزمائش ترمیم

لیکن غزوہ بدر تک جبائرہ قریش کے خوف سے اسلام کا اعلان نہیں کیا ایک دن چاہِ زمزم کی چہار دیواری میں بیٹھے تیر درست کر رہے تھے، حضرت عباسؓ کی اہلیہ بھی پاس ہی بیٹھی ہوئی تھیں کہ اتنے میں ابو لہب آگیا اور حجرہ کی طناب کے پاس بیٹھا، اس کے بعد ابوسفیان آئے،ابولہب ان سے بدر کے حالات دریافت کرنے لگا اس نے کہا کیا پوچھتے ہو مسلمانوں نے ہماری ساری قوت تباہ کر دی ، بہتوں کو تہ تیغ کر ڈالا، کچھ لوگوں کو گرفتار کیا اس سلسلہ میں ایک واقعہ عجیب و غریب بیان کیا جاتا ہے کہ میدان جنگ میں آسمان سے زمین تک سفید پوش سوار بھرے ہوئے تھے اس پر ابو رافعؓ نے کہا کہ وہ فرشتے تھے، یہ سن کر ابو لہب نے ان کے منہ پر زور سے ایک طمانچہ مارا،یہ سنبھل کر لپٹ گئے ،مگر کمزور تھے، اس لیے ابولہب نے پٹک دیا اور سینہ پر چڑھ کر جہاں تک مارسکا مارا، حضرت عباس رضی اللہ تعالیٰ عنہ کی بیوی سے یہ ظلم نہ دیکھا گیا، انھوں نے ایک ستون اٹھا کر اس زور سے مارا کہ اس کا سرکھل گیا اور بولیں اس کا آقا موجود نہیں اس لیے کمزور سمجھ کر مارتا ہے۔ [4]

ہجرت ترمیم

حضرت ابورافع رضی اللہ تعالیٰ عنہ غزوہ بدر کے بعد ہجرت کرکے مدینہ گئے اور آنحضرت کے ساتھ مقیم ہوئے۔ [5]

غزوات ترمیم

غزوہ بدر کے علاوہ غزوہ احد اور غزوہ خندق وغیرہ تمام غزوات میں شریک ہوئے ، آنحضرت نے حضرت علیؓ کی امارت میں یمن کی طرف جو سریہ بھیجا تھا، اس میں یہ بھی تھے؛چنانچہ حضرت علیؓ نے اپنی عدم موجودگی میں سریہ کی نگرانی ان کے سپرد کی تھی۔ [6]

وفات ترمیم

حضرت ابورافع رضی اللہ تعالیٰ عنہ نے حضرت علی کے ابتدائی زمانہ خلافت میں وفات پائی۔ [7]

اولاد ترمیم

حضرت ابورافع رضی اللہ تعالیٰ عنہ کی وفات کے وقت 6 اولادیں تھیں، حسن، رافع، عبیداللہ، معتمر، مغیرہ اور سلمی۔ [8]

فضل و کمال ترمیم

اسلام نے غلاموں کو ہر قسم کی ترقی کے جو مواقع عطا کیے ہیں ، ابورافع رضی اللہ تعالیٰ عنہ اس کی بہترین مثال تھے،گویہ غلام تھے؛لیکن فضل وکمال میں آزادوں کے ہمسر تھے،ان کی 68 روایتیں حدیث کی کتابوں میں موجود ہیں، ان میں سے ایک میں بخاری اور 3 میں مسلم منفرد ہیں۔ [9] آزادی کے بعد بھی آستانہ نبوی کی خدمت گزاری کا فخر نہ چھوٹا،اس لیے ان کو معمولات نبوی کے متعلق بہت معلومات تھے، اوران کے بارہ میں اکابر صحابہ ان سے استفادہ کرتے تھے،ابن عباسؓ ان کے پاس ایک کاتب لے کر آتے تھے اور سوال کرتے تھے رسول اللہ نے فلاں فلاں دن کیا کیا کیا، یہ بیان کرتے جاتے تھے اور کاتب قلم بند کرتا جاتا۔ [10]

تلامذہ ترمیم

ان کے سرچشمہ فضل و کمال سے سیراب ہونے والوں کا دائرہ خاصہ وسیع تھا ؛چنانچہ ان کے لڑکوں میں حسن، رافع ، عبیداللہ ، معتمر، پوتوں میں حسن،صالح اور عام لوگوں میں عطاء بن یسار، ابوغطفان بن طریف، ابوسعید مقبری اور سلیمان بن یسار ان کے خوشہ چینوں میں تھے۔ [11]

عام حالات ترمیم

آنحضرت نے اگرچہ ابورافع کو آزاد کر دیا تھا ، مگر وہ بدستور آپ کی غلامی میں رہے ،آزادی کے وقت آنکھیں بے اختیار اشکبار ہوگئیں ،لوگوں نے کہا آزادی میں رونے کا کیا موقع ہے، کہا آج سے ایک اجر جاتا رہا،[12] اس کے بعد اگرچہ قانونا آزاد ہو گئے تھے؛لیکن خدمت گزاری کا شرف نہیں چھوڑا؛چنانچہ سفروغیرہ میں خیمہ یہی نصب کرتے تھے،[13] آقائے دو عالم کے ساتھ غلامی کی نسبت بہت محبوب تھی، ہمیشہ اپنے کو آنحضرت کا غلام کہتے تھے،عمرو بن سعیدبن عاص مدینہ کی امارت کے زمانہ میں اپنا غلام کہلانا چاہا ؛لیکن یہ برابر انکار کرتے رہے تاآنکہ سعید نے 500 کوڑے لگا کر زبردستی اپنا غلام کہلایا۔ [14]

حوالہ جات ترمیم

  1. (ابوداؤد:1/166)
  2. (ابن سعد،جز4،ق1،صفحہ:51)
  3. (ابوداؤد:1/273 ومستدرک حاکم،جلد3،صفحہ:598)
  4. (ابن سعد،جز4،ق1:51)
  5. (ابن سعد،جزء4،ق1:52)
  6. (مستدرک حاکم:3/598)
  7. (اسد الغابہ:5/191)
  8. (تہذیب التذہیب:12/92)
  9. (تہذیب الکمال:449)
  10. (اصابہ:4/96)
  11. (تہذیب التہذیب حوالہ مذکور)
  12. (مسند احمد بن حنبل:2/344)
  13. (مسلم:1/502)
  14. (تہذیب التہذیب حوالہ مذکور)