جنید بغدادی

حضرت الشیخ جنید بغدادی رحمۃ اللّٰہ علیہ

جنید بغدادی
(فارسی میں: جنید بغدادی)
معلومات شخصیت
پیدائش	سنہ 830  بغداد
وفات	13 اپریل 910 (79–80 سال)  بغداد
رہائش	بغداد
شہریت	دولت عباسیہ
عملی زندگی
استاذ	حارث محاسبی
تلمیذ خاص	حسین بن منصور حلاج،  ابوبکر شبلی
پیشہ	فلسفی،  شاعر
پیشہ ورانہ زبان	فارسی،  عربی

صوفیائے کرام کے سربراہ اور اس میدان کے شاہسواروں میں شامل ہیں۔

ولادت

جنید بغدادی کی ولادت تیسری صدی ہجری کے اوائل میں عراق کے عروس البلاد شہر بغداد میں ہوئی۔ ارباب سیرو تاریخ نے آپ کے سال ولادت کے بارے میں اختلاف کیا ہے بعض مؤرخین نے لکھا ہے کہ آپ کی ولادت 210ھ تا 220ھ کے درمیان ہوئی۔ جیسا کہ امام ذہبی کہتے ہیں: "صوفیائے کرام کے شیخ ہیں، آپکی پیدائش 220ھ کے کچھ ہی بعد ہوئی،

نام نسب

جنید بن محمد بن جنید ہے، ابو القاسم آپکی کنیت ہے اور پارچہ فروشی کے باعث آپکا لقب : "خزاز " تھا، آپکے والد شیشے کا کاروبار کرتے تھے اس نسبت سے آپ کو قواریری بھی کہا جاتا ہے، آپکا آبائی علاقہ نہاوند ہے، لیکن آپکی پیدائش و پرورش بغداد میں ہوئی۔

خطابات و القاب

آپ کے خطابات و القابات میں لسان القوم ’’طاؤس العلماء، سلطان المحققین’’عمدۃ المشائخ‘‘ ’’ماہر شریعت‘‘’’ چشمۂ انوار الٰہی‘‘ اور ’’منبع فیوض لا متناہی‘‘ سید الطائفہ اور امام الائمہ تھے۔

تعلیم تصوف

مشہور و معروف صوفی ہیں سری سقطی کے بھانجے،مرید اور شاگرد تھے۔ خطیب بغدادی کہتے ہیں: "انہوں نے بغداد میں رہتے ہوئے سماعِ حدیث کیا، علمائے کرام سے ملاقاتیں کی، ابو ثور سے فقہ پڑھی، متعدد نیک لوگوں کی صحبت اختیار کی جن میں حارث محاسبی اور سری سقطی شامل ہیں۔ اس کے بعد عبادت گزاری میں مشغول ہو گئے اور اسی کو اپنا مشغلہ بنا لیا اور بہت شہرت پائی، یہاں تک کہ علم الاحوال اور وعظ کے لیے اپنے وقت کے یگانہ روزگارشیخ بن گئے۔ آپکے واقعات بہت مشہور ہیں، انہوں نے حدیث حسن بن عرفہ کے واسطے سے بیان کی "

اہل علم کی رائے

اہل علم نے جنید بغدادی کے بارے میں اچھے الفاظ استعمال کیے ہیں: حافظ ابو نعیم کہتے ہیں: "جنید ان لوگوں میں شامل ہیں جنہوں نے شرعی علم کو مضبوط بنایا" ابن تیمیہ کہتے ہیں: "جنید بغدادی کتاب و سنت کے شیدائی تھے آپ اہل معرفت میں سے ہیں" حافظ ذہبی کہتے ہیں: "آپ اپنے زمانے کے شیخ العارفین اور صوفیا کے لیے نمونہ تھے، اپنے وقت کے نامور ولی تھے، اللہ تعالی کی آپ پر رحمتیں نازل ہوں۔

وصال

جس وقت ان کی موت کا وقت آیا تو قرآن مجید کی تلاوت کرنے لگے، تو انہیں کسی نے کہا: آپ تھوڑا آرام کر لیتے!، تو انہوں نے کہا: "اس وقت مجھ سے بڑھ کر کسی کو قرآن کی ضرورت نہیں ہے، یہ وہ لمحہ ہے جس لمحے میں میرا صحیفہ بند کر دیا جائے گا" آپ کا وصال بکمال 27رجب بروز جمعہ 297ھ 910ء میں ہوا،آپ کی نمازِ جنازہ آپ کے فرزندقاسم جنیدی نے پڑھائی۔ جنازہ میں لاکھوں افراد نے شرکت کی۔

سلسلہ شیوخ

سید الطائفه حضرت شیخ جنید بغدادی

• حضرت شیخ سری سقطی
• حضرت شیخ اسد الدین معروف کرخی
• حضرت شیخ ابوسلیمان داؤدطائی
• حضرت خواجہ ابو نصر حبیب عجمی
• حضرت خواجہ حسن بصری
• حضرت سیدناعلی بن ابی طالب رضی الله عنه
• خاتم النبین حضرت محمد صلی الله علیه وسلم

خلفاء

• حضرت شیخ ابوبکر شبلی
• حضرت شیخ احمد ابو علی رودباری
• حضرت شیخ کریم الدین ممشاد علو دینوری
• حضرت شیخ ابو محمد عبد الله مرتعش
• حضرت شیخ ابو محمد حریری