عبد اللہ بن طارق

عبد اللہ بن طارق غزوہ بدر میں شامل انصاری صحابی ہیں۔

عبداللہ بن طارق البلوی
معلومات شخصیت
نسل	عربي
والد	طارق بن عمرو البلوي
عملی زندگی
نسب	من بلي قبيلة من قضاعة بن معد بن عدنان
خصوصیت	صحابي
تاریخ قبول اسلام	1هـ
عسکری خدمات
لڑائیاں اور جنگیں	غزوہ بدر غزوہ احد

نام ونسب

عبد اللہ نام تھا،قبیلۂ بلی سے تھے اورانصار میں قبیلۂ ظفر کے حلیف تھے،سلسلۂ نسب یہ ہے،عبد اللہ بن طارق بن عمرو بن مالک، بعض لوگ ان کو ٖظفری کہتے ہیں، ابن سعد کے نزدیک ٖظفری اور بلوی دوجداگانہ اشخاص ہیں؛ لیکن صحیح یہ ہے ٖظفری اوربلوی دو الگ الگ شخص نہیں ؛بلکہ ایک ہی مسمیٰ کے دو نام ہیں، بلوی اپنے قبیلہ کی نسبت سے اور ظفری حلف کی نسبت سے مشہور تھے۔ والدہ کے نام معلوم نہیں،اتنا پتہ چلتا ہے کہ معتب بن عبید اور یہ دونوں اخیافی بھائی تھے۔

اسلام

ہجرت کے بعد مشرف بہ اسلام ہوئے۔

غزوات

بدر اور احد میں شرکت کی۔ 3ھ کے آخر میں آنحضرتﷺ نے جن 6 آدمیوں کو قبیلہ عضل و قارہ میں اشاعتِ اسلام کے لیے روانہ کیا تھا ان میں ایک عبد اللہ بن طارق بھی تھے یہ لوگ مقام رجیع پہنچے تو قبیلۂ ہذیل نے سرکشی کرکے ان کا محاصرہ کر لیا، مرثد بن ابی مرثد، خالد بن بکیر اور عاصم بن ثابت تین بزرگ وہیں لڑکر قتل ہوئے ،

شہادت

خبیب بن عدی ،عبد اللہ بن طارق اور زید بن دثنہ کفار کے ہاتھ آ گئے اور قید ہو گئے، کفار ان کو لے کر مکہ چلے تو ظہران نام ایک مقام پر پہنچ کر عبد اللہ نے اپنے کو قید و بند سے چھڑالیا اورتلوار کھینچ کر پیچھے ہٹے ،کفار نے یہ دیکھ کر ان کو پتھر مارنا شروع کیا، جس سے وہ جان بحق ہو گئے۔

فضل وکمال

قرآن وحدیث میں حضرت عبد اللہؓ کو جو دستگاہ تھی وہ اس سے ظاہر ہے کہ آنحضرتﷺ نے ان کو اشاعت اسلام کا کام سپرد فرمایا تھا وہ اشاعت اسلام کے ساتھ ساتھ نو مسلموں کو قرآن، مسائل دین اورارکان اسلام کی باقاعدہ تعلیم بھی دیتے تھے، صاحب اسد الغابہ لکھتے ہیں: بعثھم رسول اللہ لیفقھوھم فی الدین ویعلمو ہم القرآں وشرائع الاسلام یعنی ان کو رسول اللہ ﷺ نے اس لیے بھیجا تھا کہ مسائل دین کی تعلیم دیں ،قرآن پڑھائیں اوراسلام کی ضروری باتیں سکھائیں۔