حیرت الہ آبادی

سید مہدی حسن المعروف حیرت الہٰ آبادی (پیدائش: 28 اکتوبر 1926ء - 16 ستمبر 2006ء) پاکستان سے تعلق رکھنے والے اردو زبان کے نعت اور غزل، قطعہ کے ممتاز شاعر تھے۔ حیرت الہٰ آبادی 28 اکتوبر 1926ء کو ، الہ آباد، اتر پردیش ، برطانوی ہندوستان میں پیدا ہوئے۔ ان کا اصل نام سید مہدی حسن، تخلص حیرت تھا جبکہ حیرت الہٰ آبادی ان کا قلمی نام تھا۔ ان کے والدسید ظفر حسن عبرت الہٰ آبادی ایک کہنہ مشق شاعر تھے۔ حیرت ابتدائے عمر سے ادبی ذوق رکھتے تھے لیکن نام و نمود کے قائل نہیں تھے۔ انھوں نے انٹرمیڈیٹ تک تعلیم حاصل کی۔ تقسیم ہند کے بعد پاکستان آ گئے اور کرچی میں مقیم ہو گئے۔ پاکستان کسٹم میں ملازمت کی۔ ملازمت سے سبکدوش ہونے کے بعد فرنیچر کا کاروبار شروع کیا۔ جب تک زندہ رہے اپنے والد کی بنائی ہوئے ادبی تنظیم بزمِ تنظیمِ ادبِ قائم رکھے رہے۔انھوں نے ایک ادبی مجلہ بقلم خود بھی جاری کیا جس کے کئی شمارہ شائع ہوئے۔ ان کے شعری مجموعوں میں سترہ دن (قطعات، 1965ء)، کشکولِ وفا (مجموعہ غزل، 1989ء)، پتے کانٹے پھول (شعری مجموعہ)، آگ خون پانی (شعری مجموعہ)، منارۂ نور ( نعتیہ مجموعہ، 1989ء) اور نورِ بے مثال ( نعتیہ مجموعہ، 1997ء، ناشر: بزمِ عبرت کراچی) شامل ہیں۔ حیرت الہٰ آبادی 16 ستمبر 2006ء کو کراچی، پاکستان میں انتقال کر گئے۔

حیرت الہ آبادی
معلومات شخصیت
پیدائشی نام	(اردو میں: سید مہدی حسن)
پیدائش	28 اکتوبر 1926ء   الہ آباد ،  اتر پردیش ،  برطانوی ہند
وفات	16 ستمبر 2006ء (80 سال)  کراچی ،  پاکستان
شہریت	برطانوی ہند پاکستان
عملی زندگی
پیشہ	شاعر
پیشہ ورانہ زبان	اردو
ملازمت	پاکستان کسٹم
باب ادب

نمونۂ کلام

نعت

عطا ہو جو فضلِ خدا زندگی کو		تو پھر چاہیے اور کیا زندگی کو
تمنا یہی ہے، یہی آرزو ہے		محمد پہ کر دوں فدا زندگی کو
جہاں عظمتیں ہیں جہاں رحمتیں ہیں		اُسی در سے ہے واسطہ زندگی کو
رہے لب پہ نامِ محمد ہمیشہ		بنا دے کچھ ایسا خدا زندگی کو
مدینے سے ہرگز نہ جاؤں کا واپس		کہ اب تو ملا ہے مزا زندگی کو
عمل کر کے جب سے بتایا نبی نے		قرینہ سا اِک آ گیا زندگی کو
لگا دیجیے کشتیِ دل کنارے		کہ ہے آپ کا آسرا زندگی کو
دعا ہے یہ حیرت کی، آمین کہیے		خدا حق پہ رکھے سدا زندگی کو