موتی رام بھٹ

موتی رام بھٹ (نیپالی: मोतीराम भट्ट‎؛‏ 1866ء–1896ء) نیپالی شاعر اور ادیب تھے۔ نیپالی ادب کے لیے ان کی بے مثال خدمات ہیں۔ انھوں نے گویا نیپالی ادب میں نئی روح پھونکی۔ وہ موتی رام ہی تھے جنھوں نے نیپالی ادیب بھانو بھکت آچاریہ کی راماین کو شائع کر کے فروغ دیا اور نیپال بھر میں پھیلایا اور یوں نیپالی زبان اور ادب کا نیا عہد شروع ہوا۔

موتی رام بھٹ
(نیپالی میں: मोतिराम भट्ट)
معلومات شخصیت
پیدائش	8 ستمبر 1866ء   کھٹمنڈو
وفات	سنہ 1896ء (29–30 سال)  کھٹمنڈو
شہریت	سلطنت نیپال
عملی زندگی
پیشہ	شاعر ،  ناشر ،  مضمون نگار ،  سوانح نگار ،  گلو کار ،  ڈراما نگار
پیشہ ورانہ زبان	نیپالی ،  سنسکرت ،  اردو
باب ادب

سوانح

1866ء (مطابق 1923 وکرم سمبت) میں نیپال کے شہر کھٹمنڈو کے مقام بھوسیکو ٹولما (भोसिको टोलमा) میں پیدا ہوئے۔ ابتدائی تعلیم بنارس میں ہوئی جہاں انھوں نے سنسکرت، ہندی اور انگریزی کے علاوہ اردو اور فارسی بھی سیکھی۔ بعد میں وہ کھٹمنڈو کے دربار اسکول میں شریک ہوا اور انٹرنس امتحان کامیاب کرنے کے بعد کلکتہ کے ایک کالج میں داخلہ لیا۔ وہاں ان کی ملاقات ہندی کے ادیب بھارتیندو ہریش چندر سے ہوئی جو ان کے دوست اور رہبر بن گئے۔ بنارس میں وہ رام کرشن برما کے "بھارت جیون پریس" سے منسلک رہے اور وہیں سے "بھارت جیون" کے نام سے نیپالی میں ایک رسالہ نکالا۔ اس کے علاوہ انھوں نے وہیں سے بھانو بھکت آچاریہ کی راماین اور کئی کتابیں جن میں بھانو بھکت آچاریہ کی سوانح حیات بھی شامل ہے، شائع کیں۔ انھوں نے کئی کتابیں لکھیں جن میں شکنتلا، پریہ درشکا، گجندرمکش، پرہلادبھکتی کتھا، اوشاچرتر وغیرہ مقبول ہیں۔ 1896ء (مطابق 1953 وکرم سمبت) میں علالت کے بعد ان کا انتقال ہو گیا۔

موتی رام نے نیپال میں پہلا کتب خانہ قائم کیا تھا۔ بعد میں یہی کتب خانہ مطالعہ اور علمی گفتگو کے لیے مرکز اور شعور اجاگر کرنے کا فورم بنا۔ موتی رام ایک انقلابی مصنف تھے، ان سے قبل شعرا، مصنفین قدیم طرز تحریر اپناتے تھے۔ موتی عام نے اس روایت کو توڑا اور اس زبان میں لکھا جس کو تمام سمجھ سکیں۔ ترتیب اور آہنگ موتی رام کی نظموں کا معیاری فارمولا جیسا ہے۔ یہی طرز موتی رام کی پہچان ہے۔