حدیث قدسی

علم حدیث کی اصطلاح میں ’حدیث قدسی‘ رسول اللہﷺسے منسوب اس روایت کو کہتے ہیں جس میں رسول اللہﷺروایت کو اللہ تعالیٰ سے منسوب کرتے ہیں، یعنی اس کی سند اللہ تعالیٰ تک بیان کی جاتی ہے۔ حدیثِ قدسی میں اللہ تعالٰی کے لیے ”متکلّم“ کا صیغہ استعمال کیا جاتا ہے۔ احادیث ِ قدسیہ کی تعداد دو سو سے زیادہ نہیں ہے ۔

حدیث قدسی کی مثال:

﴿امام بخاری نے اپنی سند بیان کرتے ہیں کہ۔۔۔﴾

ہم سے(1)حمیدی نے بیان کیا » انھوں نے کہا ہم سے(2)سفیان بن عیینہ نے بیان کیا » انھوں نے کہا ہم سے(3) ابوالزناد نے بیان کیا » ان سے(4)اعرج نے » اور ان سے حضرت(5)ابوہریرہ ؓ نے بیان کیا کہ » (6)رسول اللہ ﷺ نے فرمایا کہ» اللہ تعالیٰ کا ارشاد ہے کہ » میں نے اپنے نیک بندوں کے لیے وہ چیزیں تیار کر رکھی ہیں، جنہیں نہ آنکھوں نے دیکھا، نہ کانوں نے سنا اور نہ کسی انسان کے دل میں ان کا کبھی خیال گذرا ہے۔ (پھر رسول اللہ ﷺ نے قرآن سے شہادت دیتے ہوئے ارشاد فرمایا) اگر جی چاہے تو یہ آیت پڑھ لو:- پس کوئی شخص نہیں جانتا کہ اس کی آنکھوں کی ٹھنڈک کے لیے کیا کیا چیزیں چھپا کر رکھی گئی ہیں۔{سورۃ الم سجدۃ، آیت#17}

حدیث قدسی اور قرآن میں فرق

حدیث قدسی اور قرآن میں فرق بہت واضح ہے، چند مشہور فروق میں شامل ہیں:

1. قرآن مجیدکے الفاظ اورمعانی دونوں اللہ تعالیٰ کی طرف سے ہوتے ہیں۔ جبکہ حدیث قدسی کے معانی اللہ کی جانب سے اور الفاظ رسول اکرم ﷺ کی جانب سے ہوتے ہیں۔
2. قرآن کی تلاوت بطور عبادت کی جاتی ہے، جبکہ حدیث قدسی کی تلاوت بطور عبادت نہیں کی جاتی۔
3. قرآن مجید کی تمام آیات متواتر حدیث ہیں، جبکہ حدیث قدسی احاد حدیث بھی ہو سکتی ہے۔
4. قرآن کے الفاظ معجز ہیں جبکہ حدیث قدسی میں اعجاز نہیں
5. قرآن صرف جبرائیل کے واسطے سے نازل ھوا ہے جبکہ احادیث قدسی بلا واسطہ بھی نازل ھوئی
6. قرآن میں تواتر شرط ہے جبکہ حدیث قدسی میں نہیں..
7. قرآن کی روایت بالمعنی جائز نہیں احادیث قدسی کی جائز ہے.
8. قرآن بلاطہارت چھونا اور حائضہ جنبی کے لیے تلاوت بھی جائز نہیں جبکہ احادیث قدسی کے لیے یە احکام علی اللزوم نہیں
9. نماز میں قرآن کی تلاوت ھوتی ہے حدیث قدسی کی تلاوت جائز میں
10. قرآن کی نسبت صرف اللہ ہی کی طرف جبکہ احادیث قدسی کی رسول اللہ کی طرف بھی ھوتی ہے
11. قرآن کی کتابت دور نبویﷺ میں ھوئی جبکہ احادیث کی بعد میں

الفاظ روایت

حدیث قدسی روایت کرنے والے راوی دو (2) طرح کے الفاظ استعمال کرتے ہیں:

1. بسا اوقات راوی حدیث قدسی روایت کرتے ہوئے کہتا ہے: ’’قال رسول اللہ فیما یرویہ عن ربہ‘‘‎ ​ یعنی رسول اللہ ﷺ نے اپنے رب سے روایت کرتے ہیں۔
2. بعض اوقات راوی حدیث قدسی کو اس طرح بیان کرتا ہے: ’’قال اللہ تعالیٰ فیما رواہ عنہ رسولہ‘‘‎ ​ یعنی اللہ تعالیٰ نے فرمایا جسے اس کے رسول ﷺ نے راویت کیا۔

حدیث قدسی سے متعلق مشہور تصنیف

اس ضمن میں عبد الروؤف المناوی کی "الاتحافات السنیۃ بالاحادیث القدسیۃ" تصنیف کی گئی ہے۔ اس میں انھوں نے 272 احادیث جمع کی ہیں ۔۔