ساجد مراد آبادی

پروفیسر سجاد احمد المعروف ساجد مراد آبادی (پیدائش: 15 مئی 1944ء - 7 فروری 2013ء) پاکستان سے تعلق رکھنے والے اردو زبان کے ممتاز نعت گو شاعر تھے۔ وہ قانون کے پروفیسر، ایڈوکیٹ ہائی کورٹ اور پروفیسر ایٹ لا بھی رہے۔

ساجد مراد آبادی
معلومات شخصیت
پیدائشی نام	(اردو میں: سجاد احمد)
پیدائش	15 مئی 1944ء   مراد آباد ،  اتر پردیش ،  برطانوی ہند
وفات	7 فروری 2013ء (69 سال)  کراچی ،  پاکستان
شہریت	پاکستان
عملی زندگی
مادر علمی	جامعہ کراچی
تعلیمی اسناد	ایم اے قانون ،  ایم اے
پیشہ	شاعر ،  وکیل ،  پروفیسر
پیشہ ورانہ زبان	اردو
ملازمت	بینک دولت پاکستان
اعزازات
طلائی تمغا
باب ادب

حالات زندگی

ساجد مراد آبادی 15 مئی 1944ءکو مراد آباد، اتر پردیش، برطانوی ہندوستان میں پیدا ہوئے۔ ان کا اصل نام سجاد احمد، ساجد تخلص جبکہ ساجد مراد آبادی قلمی نام تھا۔ انھوں نے فاضل اردو کا امتحان درجہ اول میں پاس کیا۔ ایم اے (معاشیات) اور ایم اے (صحافت) میں اول درجہ حاصل کیا۔ ایل ایل ایم کی سند امتیازی نمبروں سے پاس کر کے طلائی تمغا حاصل کیا۔ ایل ایل بی اور ایل ایل ایم کے ممتحن بھی رہے۔ پندرہ سال سے زاید عرسہ تک وفاقی اردو لا کالج میں تدریسی خدمات انجام دیں۔ ایڈوکیٹ سندھ ہائی کورٹ اور پروفیسر ایٹ لا بھی رہے۔ بینک دولت پاکستان ملازمت کی اور بحیثیت جوائنٹ ڈائریکٹر کے عہدے سے ریٹائر ہوئے۔ ان کی تصانیف میں پیغامِ حرا (سیرت طیبہ)، گردش رنگ، نعمتِ پاکستان (تاریخ و تحریک پاکستان)، حساس جذبے (شعری مجموعہ)، شہرِ مظلوم (شعری مجموعہ)، لوحِ محفوظ (قرآن کی شعری تفہیم 6 حصے)، سراپا نور ہے وہ ذاتِ اقدس (نعتیہ مجموعہ)، جام و مینا شراب کا موسم (شعری مجموعہ)، بچوں کی نظمیں ، اُن کو میرا خیال اب بھی ہے (شعری مجموعہ) اوراسلام اور اخلاقِ حسنہ اشاعت پزیر ہو چکی ہیں۔ انھیں چار مرتبہ نیشنل بک فاؤنڈیشن سے انعام اور توصیفی اسناد حاصل ہوئیں۔

نمونۂ کلام

نعت

وہ زینت کا حاصل ہیں، وہ درد کا درماں ہیں		وہ محسنِ اعظم ہیں، وہ محسنِ انساں ہیں
دنیا نے اُنہیں دیکھا، دنیا نے اُنہین پرکھا		وہ مہرِ منور ہیں، وہ ماہِ درخشاں ہیں
دنیائے مذاہب میں، دنیائے رسالت میں		وہ خیر کے حامل ہیں، وہ زیست کا عنواں ہیں
وہ رحمتَ عالم ہیں، لاریب، کہا سب نے		خالق نے جسے چاہا، وہ جلوۂ جاناں ہیں
لفظوں سے تراشو گے، کیا حسنِ محمد کو		وہ پھول کی خوشبو ہیں، وہ پھول بداماں ہیں
چھپتے ہیں کہاں ساجد! اوصاف محمد کے		وہ رہبرَ کامل ہیں، وہ محسنِ نسواں ہیں

وفات

ساجد مراد آبادی 7 فروری 2013ء کو کراچی، پاکستان میں انتقال کر گئے۔