پالگھر ہجومی تشدد، 2020ء

پال گھر ہجومی تشدد، 2020ء (انگریزی: 2020 Palghar mob lynching) بھارت میں واٹس ایپ سے جڑا ہجومی تشدد کا ایک سلسلہ ہے جو 16 اپریل 2020ء کو بھارت کی ریاست مہاراشٹر کے پالگھر ضلع کے گچین چلے نامی گاؤں میں پیش آیا جب 2 ہندو سادھووں اور ان کے ڈرائور کو ہجوم نے پیٹ پیٹ کر مار ڈالا۔ پولس نے اب تک 101 لوگوں کو گرفتار کیا ہے اور سب کے سب مقتول کے مذہب سے تعلق رکھتے ہیں۔

اصل واقعہ

ماضی قریب میں بھارت میں واٹس ایپ سے جڑےہجومی تشدد میں خطرناک حد تک اضافہ ہوا ہے جہاں واٹس ایپ میں غلط خبر کی بنا پر ایک ہجوم اکٹھا ہوتی ہے اور کسی بھی مشتبہ کو اپنے تشدد کا نشانہ بناتی ہے۔ غلط خبر (fake news) کی بنیاد پر سر پھرے غنڈے کسی کو بھی پکڑ لیتے ہیں اور پھر اغوا، قتل اور مار پیٹ جیسے واقعات رونما ہوتے ہیں۔ کلپاورکشاگری مہاراج (عمر 70 سال)، سشیل گری مہاراج (عمر 35 سال) نامی دو سادھو جو جونا اکھاڑا سے تعلق رکھتے تھے اپنے ڈرائیور نیلیش تیلگڑے (عمر 30 سال) کے ساتھ سورت ضلع کی طرف کسی جنازہ میں شرکت لے لیے جا رہے تھے۔ بھارت میں کورونا وائرس تالا بندی، 2020ء کی وجہ سے انھوں نے ممبئی سے شمال کی جانب 93 میل دور گچین چلے گاؤں کا راستہ لیا جہاں گاؤں والوں نے ان کی کار کو روک لیا۔ انھیں شبہ تھا کہ دونوں سادھو بچہ چور ہیں۔ چنانچہ انھوں نے آنا فانا میں ان پر لکڑیوں اور کلہاڑیوں سے حملہ کر دیا۔

17 اپریل کو شائع میڈیا خبروں کے مطابق پولس نے ہجوم کو روکنے کی کوشش کی مگر ہجوم نے انھیں بھی تشدد کا نشانہ بنایا۔

گرفتاریاں

20 اپریل کو خبر آئی کہ ممبئی پولس نے 3 ملزموں کو گرفتار کیا ہے اور مزید 100 لوگوں کو حراست میں لیا ہے جن میں 9 نابالغ بھی ہیں۔ حکومت نے 2 پولس اہلکاروں کو برخواست کر دیا ہے۔ اپریل 22، 2020ء کو مہاراشٹر کے وزیر داخلہ انیل دیشمکھ نے حراست میں لیے گئے 101 لوگوں کی فہرست جاری کرتے ہوئے کہا کہ “یہ 101 گرفتار کیے گئے ملزمین کی فہرست ہے۔ فہرست عام کرنے کا مقصد فرقہ ورانہ تشدد کو ہوا دینے والوں کو متنبہ کرنا بھی ہے۔“ انھوں نے مزید کہا کہ ملزمین میں سے کوئی بھی مسلمان نہیں ہے لہذا کسی مسلمان کی گرفتاری عمل میں نہیں آئی ہے جبکہ مہاراشٹر کی بی جے پی کی قیادت والی حزب اختلاف گروہ اسے ہندو مسلم بنانے کی فراق میں تھے۔ انھوں نے مزید کہا کہ مہاراشٹر سی آئی ڈی معاملہ کی مزید تحقیقات میں جٹی ہے۔

رد عمل

19 اپریل 2020ء کو ایک تماشائی ویڈیو عام ہوئی جس میں ایک پولس اہلکار ایک سادھو کو ایک عمارت سے نکالنے کی کوشش کررہا ہے۔ ہجوم نے سادھو پر حملہ کر دیا اور پولس اہلکار اسے بچانے کی کوشش بھی نہیں کر رہے ہیں۔ بعد میں ہجوم اسے دور لے گئی اور اس کا قتل کر دیا۔ اسی شام کو مہاراشٹر کے وزیر اعلیٰ ادھو ٹھاکرے نے بیان جاری کیا کہ تمام ملزمین کو قانونی کارروائی سے گذرنا پڑے گا۔ انھوں نے مزید کہا کہ وہ ملزمین کے خلاف سخت قدم اٹھائیں گے اور پورا معاملہ سی بی آئی کے حوالہ کر دیا گیا۔ ریاست کے وزیر داخلہ انیل دیشمکھ نے اعلان کیا کہ معاملہ کی تحقیقات کروائی جائے گی۔

ریاست کے سابق وزیر اعلیٰ دیویندر فرنویس اور اترپردیش کے وزیر اعلیٰ یوگی آدتیہ ناتھ نے حکومت سے اعلیٰ سطح کی تحقیقات کی مانگ کی۔ اپریل 20، 2020ء کو جونا اکھاڑا کے مہابلیشور نے ملزمین اور پولس کے خلاف جلد از جلد کارروائی کی مانگ کی۔ ادھو ٹھاکرے نے ملک کے وزیر داخلہ امت شاہ سے کہا کہ اس معاملہ کو فرقہ وارانہ رنگ دینے والوں کے خلاف سخت کارروائی کی جائے۔