بلوغ المرام

بلوغ المرام حدیث مبارکہ کی ایک کتاب کا نام ہے۔ اس کتاب کا پورا نام بلوغ المرام من ادلۃ الاحکام ہے۔ اس کتاب میں کل 1358 احادیث موجود ہیں۔ بلوغ المرام میں شامل ہر حدیث کے آخر میں حافظ ابن حجر عسقلانی نے اس ذریعے کا حوالہ دیا ہے جس ذریعے سے وہ حدیث جمع کی گئی۔

بلوغ المرام احكام و مسائل پر مشتمل مختصر اور آسان ترین کتابوں میں سے ایک ہے۔ جس کے مؤلف بلند پایہ امام حافظ ابن حجر عسقلانی ہیں۔ بلوغ المرام کو جہاں مدارس دینیہ کے ابتدائی طلبہ کے لیے بطور نصاب مقرر کیا گیا وہیں عوام میں بھی اسے بہت پزیرائی سے نوازا گیا۔

شروح بلوغ المرام

کتاب کی افادیت کو دیکھتے ہوئے عالم اسلام کی ممتاز شخصیت شیخ صفی الرحمن مبارکپوری (جوعالمی انعام یافتہ کتاب ”الرحیق المختوم “کے مصنف ہیں۔) نے اس کی عربی میں مختصر سی شرح(اتحاف الکرام شرح بلوغ المرام) بھی کی اور انھیں نے اس کتاب کا اردو ترجمہ بھی کیا جس کے مطالعے سے ہم کو نماز، روزہ، حج اور زکوۃ سے لے کر نکاح و جہاد تک رسول اکرم صلی اللہ علیہ و آلہ وسلم کی صورت میں قرآن کریم کی عملی تفسیر دیکھنے کو ملتی ہے۔

مآخذ

بلوغ المرام میں اکثر احادیث حدیث کی دیگر کتب مثلاً، صحیح بخاری، صحیح مسلم، سنن ابی داؤد، صحیح ترمذی، سنن نسائی، سنن ابن ماجہ اور مسند احمد بن حنبل سے لی گئی ہیں۔