رشید عطرے

رشید عطرے (انگریزی: Rasheed Attre) (پیدائش: 15 فروری 1919ء — وفات: 18 دسمبر 1967ء) پاکستان کے نامور فلمی موسیقار تھے۔ انھیں فلم سات لاکھ ، نیند اور شہید پر بہترین موسیقار کا نگار ایوارڈ ملا۔

رشید عطرے
معلومات شخصیت
پیدائش	15 فروری 1919(1919-02-15)ء امرتسر، صوبہ پنجاب
وفات	18 دسمبر 1967(1967-12-18) (عمر  48 سال) لاہور
قومیت	پاکستانی
عملی زندگی
پیشہ	موسیقار
وجہ شہرت	موسیقار
صنف	فلمی موسیقی
اعزازات
نگار ایوارڈ
	IMDB پر صفحات

حالات زندگی

رشید عطرے 15 فروری، 1919ء کو امرتسر، صوبہ پنجاب میں ربابی خاندان کے بلند پایہ ہارمونیم نوز خوشی محمد امرتسری کے گھر پیدا ہوئے۔ ان کا پورا نام عبد الرشید عطرے تھا۔ انھوں نے موسیقی کی ابتدا اپنے والد ہی سے حاصل کی اور پھر اپنے عہد عظیم گائیک استاد فیاض علی خان کے شاگرد ہو گئے۔ موسیقی کے شوق میں جلد ہی انھوں نے کلکتہ کا رخ کیا جہاں اس وقت کے مشہور بنگالی موسیقار آر سی (رائے چند) بورال کے ساتھ کام کرنے کا موقع میسر آیا، یوں انھوں نے اپنے عہد کے عظیم ترین میوزک ڈائریکٹر کے ساتھ بحیثیت اسٹنٹ اپنے فلمی کیریئر کا آغاز کیا۔

1942ء میں رشید عطرے کو پہلی مرتبہ فلم مامتا کی موسیقی بنانے کا موقع میسر آیا، اس وقت ان کی عمر صرف 23 برس تھی۔ 1947ء تک انھوں نے 8 فلموں کی موسیقی دی جن میں 4 فلموں کے وہ تنہا موسیقار تھے۔ تقسیم ہند کے بعد وہ لاہور آ گئے جہاں انھوں نے فلم بیلی کی موسیقی ترتیب دی، یہ فلم باکس آفس پر ناکام رہی۔ فلم بیلی کی ناکامی کے بعد رشید عطرے راولپنڈی چلے گئے جہاں انھوں نےریڈیو پاکستان سے وابستگی اختیار کرلی۔ آزادیٔ کشمیر کے حوالے سے گایا جانے والا مشہور نغمہ مرے وطن تری جنت میں آئیں گے اک دن ان کے اسی زمانے کی یادگار ہے۔

1953ء میں ہدایت کار و اداکار نذیر کے اصرار پر وہ ایک مرتبہ فلمی دنیا میں واپس لوٹ آئے اور فلم شہری بابو کی موسیقی ترتیب دی۔ اس فلم کے گیتوں نے پورے پاکستان میں دھوم مچا دی۔ اس کے بعد رشید عطرے نے پلٹ کر نہیں دیکھا اور ہر فلم میں متواتر یادگار نغمات کی موسیقی ترتیب دیتے رہے۔ انھوں نے اپنے پاکستانی کیریئر میں مجموعی طور پر 55 فلموں کی موسیقی ترتیب دی جن میں 48 فلمیں اردو میں اور 7 فلمیں پنجابی زبان میں بنائی گئی تھیں۔

بطور موسیقار مشہور موسیقی

• شیریں فرہاد 1945ء
• بیلی 1950ء
• شہری بابو 1953ء
• روہی 1954ء
• لیلیٰ مجنوں 1957ء
• وعدہ 1957ء
• سات لاکھ1957ء
• نیند 1958ء
• چنگیز خان 1958ء
• جانِ بہار1958ء
• انارکلی 1958ء (بہ اشتراک ماسٹر عنایت حسین
• مکھڑا 1958ء* سلمیٰ 1960ء* شام ڈھلے 1960ء
• شہید 1962ء
• موسیقار 1962ء
• قیدی 1962ء
• فرنگی1964ء
• جی دار 1964ء
• انسان 1966ء
• پائل کی جھنکار 1966ء
• چٹان 1967ء
• مرزا جٹ 1967ء
• ظالم 1968ء
• محل 1968ء
• زرقا 1969ء
• بہشت 1974ء (وفات کے بعد ریلیز ہوئی)

مشہور نغمات

نغمہ	فلم	سال	گلوکار
آئے موسم رنگیلے سُہانے جیا نہیں مانے	سات لاکھ	1957ء	زبیدہ خانم
بھاگاں والیو نام جپو مولا نام	شہری بابو	1953ء	عنایت حسین بھٹی
گھونگھٹ نکالوں کہ گھونگھٹ اُٹھا لوں	سات لاکھے	1957ء	زبیدہ خانم
جب تیرے شہر سے گزرتا ہوں	وعدہ	1957ء	شرافت علی
اے مردِ مجاہد جاگ ذرا اب وقتِ شہادت ہے آیا، اللہ اکبر	چنگیز خان	1958ء	عنایت حسین بھٹی
تیرے در پر صنم چلے آئے	نیند	1958ء	میڈم نور جہاں
اُس بے وفا کا شہر ہے اور ہم ہیں دوستو	شہید	1961ء	نسیم بیگم
گائے گی دنیا گیت میرے	موسیقار	1962ء	میڈم نور جہاں
مجھ سے پہلی سی محبت مرے محبوب نہ مانگ	قیدی	1962ء	میڈم نور جہاں
دلا ٹھہر جا یار دا نظارا لین دے	مکھڑا	1958ء	منیر حسین
لٹ اُلجھی سُلجھا جا رے بالم	سوال		میڈم نور جہاں
جُگ جُگ جیو مہاراج رے	موسیقار	1962ء	میڈم نور جہاں
سو بار چمن مہکا سو بار بہار آئی	شام ڈھلے	1960ء	نسیم بیگم
حسن کو چاند جوانی کو غزل کہتے ہیں	پائل کی جھنکار	1966ء	سلیم رضا

اعزازات

نمبر شمار	فلم	انعام	سال
1	سات لاکھ	نگار ایوارڈ	1957ء
2	نیند	نگار ایوارڈز	1959ء
3	شہید	نگار ایوارڈز	1961ء

وفات

رشید عطرے 18 دسمبر، 1967ء کو 48 سال کی عمر میں انتقال کر گئے۔