سہیل احمد ندوی

سہیل احمد ندوی (1962–2023ء) ایک ہندوستانی دیوبندی عالم دین اور قلمکار تھے۔ وہ امارت شرعیہ کے نائب ناظم، دار العلوم الاسلامیہ امارت شرعیہ پھلواری شریف، پٹنہ اور امارت ٹیکنیکل انسٹی ٹیوٹ کے سکریٹری تھے۔

مولانا سہیل احمد ندوی
ذاتی
پیدائش	سہیل احمد 5 جون 1962ء بَگَہی دیوراج، ضلع مغربی چمپارن، بہار، بھارت
وفات	25 جولائی 2023(2023-70-25) (عمر  61 سال) کٹک، اڈیشا، بھارت
مدفن	بگہی دیوراج، ضلع مغربی چمپارن میں عدالت حسین اسکول کے پاس
مذہب	اسلام
قومیت	ہندوستانی
مدرسہ	دار العلوم دیوبند دار العلوم ندوۃ العلماء
بنیادی دلچسپی	تصوف، شریعت اسلامی، قضا، حدیث،

ولادت و خاندان

سہیل احمد ندوی 2 محرم 1382ھ بہ مطابق 5 جون 1962ء بہ روز منگل مغربی چمپارن کے خطہ دیوراج کی بستی بگہی میں محمد شکیل کے یہاں پیدا ہوئے۔ ان کے دادا وکیل حسین خدمت قوم کے جذبے کی وجہ سے سر سید ثانی کے نام سے معروف تھے، ان کے پردادا عدالت حسین جالیا عظیم مجاہدِ آزادی تھے، دینی ملی سماجی اور سیاسی خدمات میں اس خاندان کا اہم کردار رہا ہے۔

تعلیم و تربیت

سہیل احمد ندوی کی ابتدائی تعلیم مکتب میں ہوئی اور حفظ قرآن کی تکمیل انھوں نے 1976ء میں جامعہ اسلامیہ قرآنیہ سمرا سے کی، فارسی اور عربی کی ابتدائی تعلیم جامعہ اسلامیہ بتیا میں حاصل کی۔

اعلی تعلیم کی غرض سے 1979ء میں بہ صد شوق مشہور دینی درس گاہ دار العلوم دیوبند کا رخ کیا اور دیوبند کی علمی فضا سے خود کو معطر کیا؛ لیکن اجلاس صد سالہ کے بعد جب اسٹرائیک ہوا اور پی اے سی کے ذریعے احاطۂ دار العلوم دیوبند کو خالی کرایا گیا، تو وہ بھی وطن واپس لوٹ آئے۔

منت اللہ رحمانی کے مشورے سے دار العلوم ندوۃ العلماء، لکھنؤ میں بیچ سال سے ثانویہ رابعہ میں سماعت کی اور آئندہ سال باضابطہ عالیہ اولی میں داخلہ لیا اور 1987ء میں دار العلوم ندوۃ العلماء سے امتیازی نمبرات کے ساتھ فراغت حاصل کی۔

امارت شرعیہ سے وابستگی

فراغت کے بعد مجاہد الاسلام قاسمی، سید نظام الدین قاسمی ان کو لے کر امارت شرعیہ آئے اور سید منت اللہ رحمانی نے ان کو دفتر نظامت میں مبلغین کی کارروائی کو قابل اشاعت بنا کر ہفت روزہ نقیب میں شائع کرنے کی ذمہ داری سونپی، پھر منت اللہ رحمانی ہی کے حکم سے نقیب میں بہ عنوان " اللہ اور رسول کی باتیں" مضامین لکھنے لگے، تین ماہ کی ہی مدت گذری تھی کہ ان کو دفتر نظامت میں کارکن کے عہدے پر بحال کیا گیا، بعد میں کئی اہم ذمہ داریاں ان کے سپرد کی گئیں۔ سب سے پہلے معاون ناظم، پھر نائب ناظم ،اس کے بعد ٹرسٹ کے سکریٹری بنائے گئے، مفتی جنید ندوی قاسمی کے بعد دار العلوم الاسلامیہ امارت شرعیہ کے بھی ناظم بنائے گئے۔

وفات

ان کا انتقال کٹک سے 120 کلومیٹر دور بالو گاؤں اڈیشا میں سفر کے دوران نماز ظہر کی سنت ادا کرتے وقت بہ حالت سجدہ 6 محرم 1445ھ بہ مطابق 25 جولائی 2023ء منگل کے دن ہوا۔ اگلے دن پہلی نماز جنازہ 26 جولائی 2023ء بہ روز بدھ احاطۂ امارت شرعیہ میں محمد شبلی القاسمی نے پڑھائی، بعدہ ان کے آبائی وطن بگہی دیوراج، ضلع مغربی چمپارن لے جایا گیا، وہاں دوبارہ نماز جنازہ محمد شمشاد رحمانی کی امامت میں ادا کی گئی اور وہیں اپنے آبائی وطن میں سپردِ خاک کیے گئے۔