محمود ہارون

محمود ہارون(1920 -6 نومبر2008ء) کراچی کے سیاست دان ،ڈان میڈیا گروپ کے صحافی ،اور دو مرتبہ صوبہ سندھ کے گورنر رہے۔ انھوں نے وزیر داخلہ پاکستان اور وزیر دفاع کا عہدہ بھی سنبھالا۔ وہ حاجی سر عبداللہ ہارون کے منجھلے بیٹے تھے جبکہ ان کے بڑے بھائی یوسف ہارون تحریک پاکستان کے سرگرم کارکن تھے۔

محمود ہارون
مناصب
وفاقی وزیر داخلہ
برسر عہدہ 5 جولا‎ئی 1978  – 18 نومبر 1984
وزیر دفاع پاکستان
برسر عہدہ 9 جون 1988  – 1 دسمبر 1988
گورنر سندھ
برسر عہدہ 6 اگست 1990  – 18 جولا‎ئی 1993
گورنر سندھ
برسر عہدہ 23 جنوری 1994  – 21 مئی 1995
معلومات شخصیت
پیدائش	سنہ 1920ء   کراچی
تاریخ وفات	6 نومبر 2008ء (87–88 سال)
شہریت	پاکستان
والد	عبداللہ ہارون
والدہ	نصرت عبداللہ ہارون
عملی زندگی
مادر علمی	سینٹ پیٹرک اسکول
پیشہ	سیاست دان
مادری زبان	اردو
پیشہ ورانہ زبان	اردو

پاکستان کے نامور سیاستدان، سابق وفاقی وزیر اور سندھ کے سابق گورنر، سابق مئیر کراچی۔ محمود اے ہارون تحریک پاکستان کے سرگرم رہنما سر عبد اللہ ہارون کے منجھلے صاحبزادہ تھے۔ وہ انیس سو بیس میں کراچی میں پیدا ہوئے۔

مسلم لیگ

ڈی جے سائنس کالج اور سی ایس شاہانی لا کالج سے فارغ ہونے کے بعد انھوں نے مسلم لیگ میں شمولیت اختیار کی اور سترہ سال کی عمر میں انھیں قائد اعظم محمد علی جناح کا اے ڈی سی بننے کا اعزاز حاصل ہوا۔ وہ مسلم لیگ گارڈ کے سالار اعلیٰ بھی رہے۔ بعد میں انھیں آل انڈیا مسلم لیگ نیشنل گارڈ کا ڈپٹی چیف بنادیا گیا اور انیس سو چوالیس کو وہ مسلم لیگ کراچی کے صدر نامزد ہوئے۔

سیاست

تین سال بعد انھیں سندھ بار ایسوسی ایشن کا صدر منتخب کیا گیا۔ اسی سال وہ سندھ اسمبلی کے رکن بھی منتخب ہوئے اور پاکستان کے قیام کے وقت وہ صوبائی اسمبلی کے رکن تھے۔ انیس سو چون میں محمود ہارون کراچی کے میئر بنے اور انھوں نے شہر کے پسماندہ علاقے لیاری پر خصوصی توجہ دی اور میونسپیلٹی کا نصف بجٹ اس کے لیے مختص کر دیا۔

انیس سو چھپن میں وہ مغربی پاکستان کی اسمبلی کے رکن منتخب ہوئے اور اسمبلیوں کی برطرفی تک ممبر رہے۔ انیس سو پینسٹھ کے عام انتخابات میں وہ کراچی سے قومی اسمبلی کے رکن منتخب ہوئے مگر بعد میں وہ مستعفی ہو گئے اور نواب آف کالا باغ کی کابینہ میں بطور وزیر خوراک شامل ہو گئے۔ انیس سو اڑسٹھ میں انھیں برطانیہ میں پاکستان کا ہائی کمشنر مقرر کیا گیا اور حکومت کی تبدیلی کے بعد انھوں نے یحیٰ خان کے قیادت میں وفاقی کابینہ میں شمولیت اختیار کی۔

جلاوطنی

انیس سو اکہتر میں مشرقی پاکستان کی علیحدگی کے بعد انھوں نے لندن میں جلاوطنی اختیار کرلی اور وہ انیس سو چوہتر میں اپنی ایک بیٹی کے انتقال پر کراچی واپس آئے۔ کچھ عرصے کے بعد وہ دبئی چلے گئے جہاں انھوں نے ڈیلی خلیج ٹائمز کی بنیاد رکھی۔ ڈان اخبار کی آزاد پالیسی اور ہارون خاندان کی سیاست میں موجودگی کی وجہ سے ایوب خان اور ذو الفقار علی بھٹو کے دور میں انھیں سختیوں کا سامنا کرنا پڑا۔

وزارت

انیس سو ستتر میں جب جنرل ضیاءالحق نے ذو الفقار علی بھٹو کی حکومت کا تختہ الٹ کر ملک میں مارشل نافذ کیا تو محمود ہارون وطن واپس آ گئے۔ انھوں نے جنرل ضیا الحق کی کابینہ میں شمولیت اختیار کی اور وہ انیس سو چوراسی تک وفاقی وزیر رہے۔

گورنر اور وزیردفاع

انیس سو اٹھاسی میں صدر غلام اسحاق خان کی صدارت میں وہ وزیر دفاع رہے اور انیس سو نوے میں جب پیپلز پارٹی کی حکومت کو برطرف کیا گیا تو انھیں سندھ کا گورنر بنادیا گیا۔ انیس سو چورانوے میں جب پیپلز پارٹی اقتدار میں آئی تو ان کا دوبارہ بطور گورنر تقرر ہوا۔

ڈان

وہ ملک کے سب سے بڑے اخبار ڈیلی ڈان کے مالک تھے۔6 نومبر 2008 کو اٹھاسی برس کی عمر میں انتقال کر گئے

سیاسی عہدے
ماقبل  اللہ بخش گبول	سٹی ناظم کراچی 1954–1955	مابعد  الحاج مالک باغ علی
ماقبل  انعام الحق خان	وزیر داخلہ پاکستان 1978–1984	مابعد  سردار ایف ایس خان لودھی
ماقبل  محمد خان جونیجو	وزیر دفاع پاکستان 1988	مابعد  بینظیر بھٹو
ماقبل  فخرالدین جی ابراہیم	گورنر سندھ 1990–1993	مابعد  حکیم محمد سعید
ماقبل  حکیم محمد سعید	دوسری دفعہ 1994–1995	مابعد  کمال الدین اظفر