صحیح (اصطلاح حدیث)

علم حدیث میں اس سے مراد وہ حدیث ہے جس کے تمام راوی عادل، ثقہ، معتبر، متقی، کامل الضبط اور قوت حافظہ کے مضبوط ہوں۔ اس حدیث کی سند متصل ہو، معلل و شاذ ہونے سے محفوظ ہو نیز کسی قوی حدیث کے مخالف نہ ہو۔

شرائط

• اتصال سند: یعنی سند کی ابتداءسے انتہاءتک ہر راوی نے دوسرے سے بلاواسطہ حدیث حاصل کی ہو اور کسی جگہ بھی کوئی راوی ساقط نہ ہو۔
• راویوں کا عادل ہونا: یعنی ہر راوی مسلمان ہو‘عاقل بالغ ہو اور اس میں فسق و فجور نہ پایا جائے بالفاظ دیگر پاکیزہ کردار کا شخص ہو۔
• راویوں کا حافظہ: راویوں میں ہر راوی کا حافظہ بہت پختہ اور مضبوط ہو‘ اور وہ حدیث کو یاد رکھنے میں کسی قسم کی غفلت یا بے احتیاطی کا مظاہرہ نہ کرتاہو
• حدیث میں کوئی علت نہ ہو یعنی منفی قسم کا عیب یا نقص نہ پایا جاتا ہو
• شاذ نہ ہو یعنی کوئی ثقہ راوی اپنے سے زیادہ ثقہ راوی کے خلاف روایت نہ کرے“

مثال :عبداللہ بن یوسف نے ہم سے بیان کیا ہے کہ انھیں مالک نے ابن شہاب سے یہ خبر دی ہے کہ ابن شہاب کو محمد بن جبیر نے اپنے والد مطعم بن جبیر سے روایت کی کہ: میں نے رسول اکرمﷺکومغرب کی نماز میں سورة طور پڑھتے سنا ہے۔ یہ حدیث صحیح ہے اور اس میں تمام شرائط موجود ہیں

صحیح حدیث کا حکم

صحیح حدیث پر عمل کرنا واجب ہے اور ایسی حدیث شرعی دلائل میں سے ایک دلیل ہے۔