حصین بن نمیر

حُصَین ‌بن نُمَیر سکونی بنو امیہ کی افواج کا ایک سپاہ سالار جو شمالی یمن کے قبیلے کندہ کے رؤسا میں سے تھا۔ وہ 9 قبل ہجرت یمن میں پیدا ہوا اور 66 ہجری کو جنگ خازر میں قتل ہوا۔ اس نے جنگ قادسیہ، جنگ صفین، معرکہ کربلا، واقعہ حرہ، محاصرہ مکہ، جنگ عین الورد اور جنگ خارز میں اہم کردار ادا کیا۔

حصین بن نمیر
معلومات شخصیت
پیدائشی نام	(عربی میں: الحُصَين بن نُمَير بن ناتِل السُّكُونِي)
پیدائش	7ویں صدی  جزیرہ نما عرب
وفات	6 اگست 686  دریائے خازر
وجہ وفات	لڑائی میں مارا گیا
طرز وفات	لڑائی میں ہلاک
شہریت	خلافت راشدہ (–661) سلطنت امویہ (661–)
مناصب
مقتدر اعلیٰ
برسر عہدہ 680  – 683
در	جند حمص
مالک بن ہبیرہ سکونی   نعمان بن بشیر
عملی زندگی
پیشہ	عسکری قائد ،  والی
مادری زبان	عربی
پیشہ ورانہ زبان	عربی
عسکری خدمات
وفاداری	سلطنت امویہ
لڑائیاں اور جنگیں	جنگ صفین ،  سانحۂ کربلا ،  واقعۂ حرہ ،  محاصرہ مکہ ،  معرکہ مرج راہط (684ء) ،  معرکہ عین الوردہ ،  جنگ خازر

خلیفہ اوّل کا دور

خلیفہ اوّل کے عہد میں اسے جنوبی عرب کے قبائل سے زکوٰة کی وصولی کے لیے حکومتی عامل مقرر کیا گیا۔

خلیفہ دوم کا دور

خلیفہ دوم کے عہد میں وہ جنگ قادسیہ اور سلطنت روم کے خلاف ہونے والے معرکوں میں شریک تھا۔ جنگ قادسیہ میں وہ سعد بن ابی وقاص کی سپاہ سالاری میں مسلم افواج کے گھڑ سوار دستے کا کمان دار تھا۔ اس جنگ اور فتح عراق کے بعد خلیفہ کے حکم پر چند دیگر افراد کے ہمراہ اسے شمالی عراق کی ایک چھاؤنی کا منتظم مقرر کیا گیا یہ مقام جنگ کے بعد قصبے سے ایک بڑے شہر کی شکل اختیار کر چکا تھا اور شہر کوفہ کہلاتا تھا اس کی وسعت کی بنا پر یہاں چھاؤنی قائم کی گئی تھی۔ وہ فتح فلسطین اور شام ( جو سلطنت روم کے مقبوضہ تھے ) میں بھی شریک رہا۔ منقول ہے جنوبی شام ( فلسطین ) کی زیادہ تر جنگوں میں شامل رہا اور بہت سے رومیوں کو قتل کیا اور فتح فلسطین کے موثر ترین کمان داروں میں سے تھا۔ معاویہ بن ابی سفیان کے والی شام بننے کے بعد وہیں بس گیا۔

جنگ صفین

جب علی ابن ابی طالب علیہ السلام خلیفہ منتخب ہوئے تو معاویہ نے ان کی بیعت نہ کی چنانچہ سپاہ شام اور سپاہ علی ابن ابی طالب میں جنگ ہوئی جسے جنگ صفین کہا جاتا ہے۔ حُصَین ‌بن نُمَیر جنگ صفین میں سپاہ معاویہ بن ابی سفیان کے بائیں بازو کے دستے کا کمان دار تھا۔ جنگ صفین کے بعد عمرو بن عاص کے ہمراہ مصر پر لشکر کشی کی اور فرمانروائے مصر محمد بن ابو بکر کو قتل کیا۔ معاویہ بن ابی سفیان کے دور اقتدار میں شام کے شہر حمص کا حاکم رہا۔

معرکہ کربلا

یزید بن معاویہ کے اقتدار میں آنے کے بعد امام حسین ابن علی ابن ابی طالب علیہ السلام کی سرکوبی کی نیت سے سپاہ ساتھ لے کر عازم کوفہ ہوا۔ معرکہ کربلا میں وہ سپاہ شام اور عمر بن سعد کے تیر اندازوں کا کمان دار تھا۔ منقول ہے کہ کربلا میں امام حسین علیہ السلام جب اپنے ہمراہیوں کی نماز میں امامت فرما رہے تھے تو حُصَین ‌بن نُمَیر کے حکم سے ان پر تیروں کی بارش کی گئی۔ اور حبیب بن مظاہر اسدی کو بھی حُصَین ‌بن نُمَیر نے شہید کیا تھا۔

واقعہ حرہ

معرکہ کربلا کے بعد دوسرا بڑا شرمناک سانحہ واقعۂ حرہ ہے۔ یزید کے حکم پر مدینہ کے یزید مخالفین کی سرکوبی کے لیے مسلم بن عقبہ کی کمان میں ایک فوج کے ساتھ مدینہ پر حملہ آور ہوا۔ سپاہ شام اور اہل مدینہ کے مابین شہر سے باہر جنگ ہوئی جس میں اہل مدینہ شکست کھا گئے اور مسلم بن عقبہ اور حُصَین ‌بن نُمَیر یزیدی افواج کے ہمراہ شہر میں داخل ہو گئے اور مدینہ منورہ کی اینٹ سے اینٹ بجا دی۔

کعبہ پر حملہ

واقعہ حرہ کے بعد مسلم بن عقبہ کی موت ہو گئی اور یوں یزیدی افواج کی سربراہی حُصَین ‌بن نُمَیر کو مل گئی۔ وہ ایک لشکر جرار لے کر عبد اللہ بن زبیر کو گرفتار کرنے مکہ روانہ ہوا، سپاہ حُصَین ‌بن نُمَیر اور عبد اللہ بن زبیر کے حامیوں کے درمیان میں شہر مکہ سے باہر جنگ ہوئی لیکن عبد اللہ بن زبیر کے بہت آدمی اس لڑائی میں کام آئے تو عددی کمی کی وجہ سے وہ مکہ میں پناہ گزین ہو گئے اور یوں لشکر حُصَین ‌بن نُمَیر نے مکہ شہر کا محاصرہ کر لیا۔ دو ماہ سے طویل اس محاصرے میں میں حُصَین ‌بن نُمَیر نے خانہ کعبہ پر منجنیقوں سے پتھر برسائے اور آگ کے گولے پھینکے جس سے غلاف کعبہ جل گیا۔ اس محاصرے کا اختتام ماہ ربیع‌الثانی سال 64 ھ میں اس وقت ہوا جب حُصَین ‌بن نُمَیر اور اس کے ساتھیوں کو یزید کی موت کی خبر ملی۔

موت

بالآخر ؁ 66 یا 67 ہجری میں ابن‌زیاد اور ابراهیم بن اشتر و شریک بن جدیر تغلبی کے مابین ہونے والی جنگ میں اپنے انجام کو پہنچا۔کچھ اقوال کے مطابق اسے مختار ثقفی نے قتل کیا تھا

ماخذات

1۔ دانشنامہ جهان اسلام، بنیاد دائرة المعارف اسلامی، مقالہ «حصین بن نمیر»، شمارہ 6293

2۔ خبرگزاری فارس۔ «زمانی کہ خدا با صاعقہ مکہ را از حملہ یزید نجات می‌دهد»۔

3۔ تاريـخ الطـبـري ج3 ص 360