ارطغرل

ڈرامے کے لیے، ارطغرل غازی (سیزن) ملاحظہ فرمائیں۔

امیر غازی ارطغرل بن سلیمان شاہ قایوی ترکمانی (عثمانی ترک زبان: ارطغرل) (وفات: 1280ء) ترک اوغوز کی شاخ قائی قبیلہ کے سردار سلیمان شاہ کے بیٹے اور سلطنت عثمانیہ کے بانی عثمان اول کے والد تھے۔ ولادت کا زمانہ سنہ 1191ء کے آس پاس کا ہے جبکہ سنہ وفات 1281ء بتائی جاتی ہے اور مدفن اناطولیہ کے شہر سوغوت میں واقع ہے۔ ارطغرل غازی ایک بہادر، نڈر، بے خوف، عقلمند، دلیر، ایماندار اور بارعب سپاہی تھے۔ وہ ساری عمر سلجوقی سلطنت کے وفادار رہے۔ سلطان علا الدین کیقباد اول نے ارطغرل کی خدمات سے متاثر ہو کر ان کو سوغوت اور اس کے نواح میں واقع دوسرے شہر بطور جاگیر عطا کیے اور ساتھ ہی "سردار اعلیٰ" کا عہدہ بھی دیا۔ اس کے بعد آس پاس کے تمام ترک قبائل ان کے ماتحت آگئے تھے۔

ارطغرل
(عثمانی ترک میں: ارطُغرُل غازى)
معلومات شخصیت
پیدائش	اخلاط
وفات	سنہ 1281ء   سوغوت
مدفن	مقبرہ ارطغرل غازی
شہریت	سلاجقہ روم
زوجہ	حلیمہ خاتون
اولاد	عثمان اول ،  ساجی بیگ
والد	سلیمان شاہ
والدہ	حائمہ خاتون
بہن/بھائی	دوندار بے
دیگر معلومات
پیشہ	ریاست کار ،  عسکری قائد

غیر معتبر تاریخی حوالوں سے معلوم ہوتا ہے کہ ارطغرل کا تعلق غز ترک قبائل کی شاخ قائی قبیلہ سے تھا اور ان کا خاندان بیگ (سردار) کہلاتا تھا۔

ارطغرل ترک زبان کا لفظ ہے اور دو لفظوں ”ار“ اور ”طغرل“ سے مل کر بنا ہے، ”ار“ کے معنی آدمی، سپاہی یا ہیرو کے ہیں جبکہ ”طغرل“ کے معنی عقاب پرندے کے آتے ہیں، جو مضبوط شکاری پرندہ کے طور پر مشہور ہے، یوں ”ارطغرل“ کے معنی عقابی شخص، عقابی سپاہی یا شکاری ہیرو وغیرہ کے ہوں گے۔

سوانح حیات

تاریخ کی کتابوں میں ارطغرل کی زندگی کے احوال اور ان کی سرگرمیوں سے متعلق پختہ معلومات نہیں ملتیں، البتہ ان کے بیٹے عثمان اول کے ڈھالے ہوئے سکوں سے تاریخی طور پر ان کے وجود کی تصدیق ہوتی ہے۔ ان سکوں میں عثمان اول نے اپنے والد کا نام ارطغرل نقش کروایا تھا۔تاریخ دانوں کو اُن کے حالات زندگی کے حوالے سے اُن لوک کہانیوں پر انحصار کرنا پڑتا ہے، جو اُن کی وفات کے سو سال بعد سلطنت عثمانیہ میں مقبول ہوئیں۔ ان لوک داستانوں کی درستی پر بھی کئی طرح کے شبہات ظاہر کیے جاتے ہیں۔

عثمانی روایات کے مطابق ارطغرل اپنے والد سلیمان شاہ کی وفات کے بعد) اپنے رفقا کو لے کر سلاجقہ روم کے پاس گئے اور ان سے زمین کا مطالبہ کیا۔ چنانچہ انھوں نے سوغوت (ترکی: Söğüt) کی زمین ارطغرل کے حوالے کر دی جو اس زمانے میں بازنطینی سلطنت کی سرحد پر واقع تھا اور ارطغرل کو اس کا سردار بھی مقرر کر دیا۔ بعد ازاں اس سرزمین پر کچھ ایسے واقعات پیش آئے جو آگے چل کر سلطنت عثمانیہ کی بنیاد کا سبب بنے۔

اسلام کی سربلندی کی خاطر ارطغرل اور دیگر عثمانی سلاطین کی مجاہدانہ سرگرمیوں کی بنا پر عموماً ان کے ناموں کے ساتھ "غازی" کا لقب لگایا جاتا ہے۔ ارطغرل غازی عمر بھر سلجوقی سلطنت کے وفادار رہے لیکن ان کی زندگی کے آخری ایام میں سلجوقی سلطنت اپنی آخری سانسیں لے رہی تھیں اور منگول سلطنت نے پورے اناطولیہ (موجودہ ترکی) پر قبضہ کر لیا تھا جو ان کے لیے سخت تشویش کا باعث تھا اور ان کی آرزو تھی کہ ایک عظیم اسلامی سلطنت کا قیام عمل میں آئے۔ چنانچہ ارطغرل کے سب سے چھوٹے بیٹے غازی عثمان اول نے ان کا یہ خواب پورا کیا اور ایک عظیم الشان سلطنت عثمانیہ کی بنیاد رکھی۔

وفات

وفات کے وقت ارطغرل کی عمر 90 سال سے زیادہ تھی۔ وہ ترکی کے شہر سوغوت میں مدفون ہیں۔ ان کی درست تاریخ وفات میں مؤرخین میں اختلاف ہے:

• مشہور ہے کہ ارطغرل غازی کی وفات قائی قبیلے کی سرداری اپنے بیٹے عثمان اول کے سپرد کرنے کے بعد، سوغوت شہر میں 1281ء یا 1282ء میں ہوئی۔
• بعض دوسرے ذرائع سے پتہ چلتا ہے کہ ان کی وفات 1288ء یا 1289 میں ہوئی تھی۔

مقبرہ

تفصیلی مضمون کے لیے مقبرہ ارطغرل غازی ملاحظہ کریں۔

ارطغرل غازی سے منسوب ایک قبر سوغوت شہر کے باہر واقع ہے لیکن اس پر کوئی قدیم تحریر موجود نہیں۔ مقبرہ پر موجودہ تحریر کی تاریخ سلطان عبد الحمید ثانی کے سابقہ مقبرے کی بحالی عمل کے وقت کی ہے جو 1886–1887 کی ہے۔

مقبرہ کی تعمیر کی تاریخ کا تعین نہیں ہے لیکن یہ تیرہویں صدی کے آخر میں موجود تھا:

• اس کو پہلے عثمان اول نے مجرد قبر کے طور پر تعمیر کیا تھا۔
• بعد میں سلطان محمد اول کے دور میں اس قبر کو مقبرے میں تبدیل کر دیا گیا۔
• مصطفٰی ثالث کے دور میں، دوبارہ تعمیر کیا گیا اور اصل عمارت کی ہیت تبدیل کردی گئی۔
• 1886ء میں سلطان عبدالحمید دوم نے اسے بحال کیا اور وضو کرنے کے لیے اس میں پانی کا چشمہ شامل کیا گیا۔

نمونۂ مقبرہ

قبر کا نمونہ مسدس شکل کا ہے، جس پر ایک گنبد بنا يا گیا ہے، اس کے اندر ارطغرل کا مقبرہ ہے جس کے دونوں اطراف مستطیل دروازوں سے پہنچا جاتا ہے۔ مقبرے کی دیواریں پتھروں اور اینٹوں کی دو قطاریں تھیں۔ مزار کے اندر جنوب مغرب اور جنوب مشرقی دیواروں پر کھڑکیاں ہیں۔ مقبرے کو 360° پر آن لائن دیکھا جا سکتا ہے۔

• ارطغرل کے مقبرے کو اندر سے 360 ° امیجنگ ٹیکنالوجی کے ساتھ ملاحظہ کیا جا سکتا ہے، جہاں مقبرے کو اندر سے دیکھ سکتے ہیں اور پھر عمارت کے اندر داخلی دروازے سے تدفین والے حصے تک جا سکتے ہیں اور اس سے تدفین کے مقام کو متعدد جگہوں سے دیکھ سکتے ہیں۔۔

قبر أرطغرل غازي بمدينة سوغوت، الذي يوجد داخل مبنى سداسي الأضلاع فوقہ قبة۔

نموذج لضريح أرطغرل يوجد بالمدينة الترفيهية "تركيا المصغرة - مينياتورك" (MİNİATÜRK) باسطنبول۔
تصميم مبنى الضريح على شكل سداسي الأضلاع وفوقہ قبة تحتها قبر أرطغرل، ومدخل الضريح غرفة مستطيلة۔

ثقافتی عکاسی

19ویں صدی میں عثمانی بحریہ نے اپنے ایک جنگی جہاز کا نام ارطغرل رکھا، جو 1890ء کے ایک بحری سفر میں، جاپان کے قریب حادثے کا شکار ہو گیا تھا۔ اس کے علاوہ، 1998ء میں ترکمانستان نے شہر اشک آباد میں مسجد ارطغرل غازی، نیلی مسجد کی طرز پر تعمیر کی گئی ہے۔ اس کے علاوہ ترکی سرکاری ٹی وی چینل ٹی آر ٹی1 پر 2014–2019 کے دوران میں ارطغرل غازی کے نام سے پانچ سیزن اب تک نشر ہو چکے ہیں، جس میں ارطغرل کا کردار انگین آلتان دوزیاتان نے ادا کیا۔ ارطغرل غازی کے بعد اس کا تسلسل عثمان غازی کی صورت میں جاری ہے، اس کے 2 سیزن میں ارطغرل کا کردار تیمر یغیت نے ادا کیا ہے۔

مزید دیکھیے

• اس صفحہ ”ارطغرل“ کے تبادلہ خیال پر بھی اہم معلومات موجود ہیں۔ پڑھنے کےلیے تبادلۂ خیال:ارطغرل پر کلک کریں۔
• قائی قبیلہ
• عثمانی خاندان

حوالہ جات

شاہی القاب
ماقبل  سلیمان شاہ	قبل ازسلطنت عثمانیہ 1230–1281	مابعد  عثمان اول