محمد ساجد کھجناوری

محمد ساجد کُھجناوَری (پیدائش: 15 اگست 1983ء) ایک ہندوستانی دیوبندی عالم دین، مفتی، قاری اور مصنف ہیں۔ وہ جامعہ اشرف العلوم رشیدی، گنگوہ کے استاذِ حدیث اور ماہنامہ صدائے حق، گنگوہ کے مدیرِ تحریر ہیں۔

محمد ساجد کھجناوری
معلومات شخصیت
پیدائش	15 اگست 1983ء (41 سال)  کُھجناوَر، ضلع سہارنپور، اتر پردیش، بھارت
شہریت	بھارت
عملی زندگی
مادر علمی	دار العلوم دیوبند مظاہر علوم سہارنپور مولانا آزاد نیشنل اردو یونیورسٹی
استاذ	سعید احمد پالن پوری
پیشہ	عالم ،  مفتی ،  کالم نگار ،  مضمون نگار ،  مصنف
پیشہ ورانہ زبان	اردو
باب ادب

ابتدائی و تعلیمی زندگی

محمد ساجد کُھجناوَری 6 ذی قعدہ 1403ھ مطابق 15 اگست 1983ء کو کُھجناوَر، ضلع سہارنپور، اترپردیش میں راؤ محمد ایوب اور سلمیٰ خاتون کے یہاں پیدا ہوئے۔

انھوں نے ابتدائی تعلیم اپنے علاقے کے مدرسہ عزیز القرآن، کُھجناوَر میں حاصل کی اور وہیں حفظ قرآن کی تکمیل بھی کی۔ 1999ء میں دار العلوم دیوبند کے شعبۂ تجوید و قراءت میں داخلہ لے کر عبد الرؤوف بلند شہری کے پاس دوسالہ نصاب مکمل کیا۔ انھیں کی تحریک پر الگ سے خارج اوقات میں فارسی کی کتابیں بھی پڑھیں، پھر 2001ء میں دار العلوم دیوبند میں عالمیت کے لیے امتحانِ داخلہ میں کامیابی حاصل کرکے عربی اول کے درجے میں داخل ہوئے اور سنہ 2008ء میں عالمیت کا نصاب مکمل کیا۔ ان کے اساتذۂ دار العلوم میں سعید احمد پالن پوری اور محمد سلمان بجنوری شامل ہیں۔

عالمیت کے بعد 2009ء میں انھوں نے مظاہر علوم سہارنپور سے ایک سالہ نصاب پڑھ کر سندِ افتا حاصل کی۔ ساتھ میں فاصلاتی طور پر مولانا آزاد نیشنل اردو یونیورسٹی سے بی اے (اردو) کیا۔

تدریسی زندگی

تعلیم کی تکمیل کے بعد 2010ء سے ہی مدرسہ اشرف العلوم رشیدی، گنگوہ میں تدریسی خدمات انجام دے رہے ہیں اور کتبِ فقہ و حدیث بشمول مشکاۃ المصابیح کا درس بھی ان سے متعلق ہے۔

قلمی و ادبی زندگی

محمد ساجد کُھجناوَری کے مطالعہ و کتب بینی کا سفر زمانۂ طالب علمی یعنی حفظِ قرآن کے زمانے ہی سے شروع ہو چکا تھا۔ نیز عربی کی تعلیم کے زمانے سے ہی مضمون نگاری اور اردو ادب سے ان کو خاص شغف رہا ہے۔ وہ ”ماہنامہ نقوش اسلام“، مظفرآباد، سہارنپور کے بانیوں میں سے ہیں اور اس کے پہلے مدیر بھی رہ چکے ہیں۔

اس وقت ماہنامہ ”صدائے حق“، گنگوہ اور سہ ماہی ”متاعِ کارواں“ کے مدیرِ تحریر ہیں۔ ان کے مضامین مذکورۂ بالا رسالوں کے علاوہ ”ماہنامہ دار العلوم“، ”ترجمانِ دیوبند“، ”محدثِ عصر“، ”ماہنامہ مظاہر علوم“، ”اذانِ بلال، آگرہ“، ”حِرا کا پیغام، مانک مئو“، سہ ماہی ”حُسنِ تحریر، دہلی“، ہفت روزہ ”الجمعیۃ“، سہ روزہ ”دعوت، دہلی“ جیسے رسائل اور مختلف روزناموں میں شائع ہوا کرتے ہیں۔

ندیم الواجدی کُھجناوَری کے بارے میں لکھتے ہیں:

”

مولانا ساجد کھجناوری نے ہر طرح کے مضامین لکھے ہیں، دینی بھی، علمی بھی، اصلاحی اور سیاسی بھی؛ مگر مرحوم شخصیات پر ان کی تحریروں میں جو بانکپن اور وارفتگی پائی جاتی ہے اس کی بات ہی کچھ اور ہے۔

“

اسی طرح حقانی القاسمی نے اس طرح سے اپنے خیالات کا اظہار کیا ہے:

مفتی ساجد کی کتاب ’’بزم رفتگاں‘‘ میں خیالات کی کہکشاں ہے جس میں خوشبو جیسے لوگوں کی زندگی کے شب و روز اور ان کی شبنمی کردار سے روبرو ہونے کا موقع ملتا ہے۔ یہ اس جہان روحانیت کی سیر کراتی ہے جہاں سے فکر کو نئی حرارت، احساس کو اشارت اور اظہار کو نئی عبارت ملتی ہے۔

کُھجناوَری اترپردیش اردو اکادمی، غالب اکیڈمی، بنگلور اور تسمیہ اکادمی، دہرادون کی طرف سے اعزازات سے نوازے جا چکے ہیں۔

تصانیف

کُھجناوَری کی تصانیف میں درج ذیل کتابیں شامل ہیں:

• بزمِ رفتگاں
• نقوشِ دوام