برہم باندھو اپادھیائے

برہم باندھو اپادھیائے ((بنگالی: ব্রহ্মবান্ধব উপাধ্যায়)‏) ‏(1 فروری 1861ء – 27 اکتوبر 1907ء) بنگال کے مشہور ماہر الہیات، صحافی اور مجاہد آزادی تھے۔ برہم باندھو رام کرشن پرم ہنس اور کیشب چندر سین کے دوست، سوامی ویویکانند کے ہم جماعت اور رابندرناتھ ٹیگور کے قریبی شناساؤں میں سے ایک تھے۔

برہم باندھو اپادھیائے
(بنگالی میں: ব্রহ্মবান্ধব উপাধ্যায়)
معلومات شخصیت
تاریخ پیدائش	1 فروری 1861
وفات	27 اکتوبر 1907 (46 سال)  کولکاتا
شہریت	برطانوی ہند
عملی زندگی
مادر علمی	اسکاٹش چرچ کالج ہوگلی کالجیٹ اسکول
پیشہ	مصنف،  مدیر
مادری زبان	بنگلہ
پیشہ ورانہ زبان	بنگلہ

ابتدائی زندگی

برہم باندھو اپادھیائے ایک ”کولین براہمن“ خاندان میں پیدا ہوئے، ان کا پیدائشی نام بھوانی چرن بادیوپادھیائے تھا۔ کولین کی اصطلاح ابتدائی برہمنی ہندو معاشرے کے اس رسم کی طرف اشارہ کرتی ہے جس کے تحت ایک مرد کو کئی بیویاں رکھنے کی اجازت تھی۔ برہم باندھو کے دادا کے متعلق مشہور تھا کہ ان کی چھپن بیویاں تھیں۔ ان کے والد دیوی چرن بادیوپادھیائے برطانوی راج میں پولیس افسر تھے۔ دیوی چرن کے تین بیٹے تھے۔ سب سے بڑا بیٹا ہری چرن کلکتہ میں معالج تھا، دوسرا بیٹا پربتی چرن وکیل اور تیسرا بھوانی چرن تھے۔ غیر منقسم بنگال کے ضلع ہوگلی میں واقع کھنیان گاؤں میں ان کی پیدائش ہوئی۔ جب وہ ایک برس کے تھے تو ان کی والدہ رادھا کماری وفات پاگئیں، چنانچہ ان کی پرورش ان کی دادی کے ہاتھوں ہوئی۔

بھوانی چرن نے کلکتہ کی مشہور تعلیم گاہوں اسکاٹش مشن اسکول، ہوگلی کالیجیٹ اسکول، میٹرپولیٹن انسٹی ٹیوشن (موجودہ ودیا ساگر کالج) اور جنرل اسمبلی انسٹی ٹیوشن (موجودہ اسکاٹش چرچ کالج) میں تعلیم حاصل کی۔ سنہ 1880ء کی دہائی میں جب وہ جنرل اسمبلی انسٹی ٹیوشن میں زیر تعلیم تھے اس وقت سوامی ویویکانند ان کے ہم جماعت تھے۔ برہم باندھو رابندر ناتھ ٹیگور کے بھی دوست تھے۔

جب وہ کالج میں زیر تعلیم تھے تو کیشب چندر سین اور رابندر ناتھ ٹیگور کے والد دیویندر ناتھ ٹیگور سے خاصے متاثر ہوئے اور برہمو سماج کی طرف راغب ہوئے۔ سنہ 1881ء میں انہوں نے برہمویت کو اختیار کر لیا اور اس کے مبلغ بن گئے۔ انہوں نے صوبہ سندھ کے قصبہ حیدرآباد میں موجود ایک برہمو اسکول میں بھی پڑھایا۔

بیرونی روابط

• Vidyajyoti College of Theologyآرکائیو شدہ بذریعہ vidyajyoti.in