ابو برزہ اسلمی
ابوبَرزہ اسلمی رضی اللہ عنہ (وفات: 60ھ) صحابی رسول، ان کی کنیت ہے اصل نام نضلہ بن عُبید تھا اصحاب صفہ سے تھے۔[1] نَضلہ نام ، کنیت ابوبرزہ، والد کا نام عُبید ، قبیلۂ بنو اسلم سے تعلق رکھتے ہیں۔ یہ اپنی کنیت ابوبرزہ سے مشہور ہیں۔ ابوبرزہ اسلمی قدیم الاسلام ہیں۔ انھوں نے غزوہ خیبر، فتحِ مکہ اور غزوہ حنین میں شرکت کی ہے۔ خود فرماتے ہیں! ’’غزوت مع رسول اللہ صلی اللہ علیہ وسلم ستاّ أوسبعاً ‘‘ میں رسول اللہ صلی اللہ علیہ وسلم کے ساتھ چھ یا سات غزوے میں شریک رہا ہوں۔ [2] انھوں نے ہی فتحِ مکہ کے موقع پر عبدالعزی بن خطل کو رسول اللہ صلی اللہ علیہ وآلہ و سلم کے حکم سے قتل کیا تھا۔ مدینہ منورہ میں رہنے کے بعد بصرہ چلے گئے اور خلیفہ وقت امیرالمومنین حضرت علی رضی اللہ تعالیٰ عنہ کی طرف سے جنگ جمل، جنگ صفین اور نہروان بھی لڑی صلح امام حسن کے بعد، ایک عرصہ تک بصرہ میں حضرت امیر معاویہ کے ساتھ رہے۔ ابن الکلبی کی روایت میں ہے کہ بصرہ میں سکونت اختیار کرلی۔ اور آخری عمر میں جہاد کے لیے خراسان گئے اور وہیں وفات پائی۔
| ابو برزہ اسلمی | |
|---|---|
 | |
| معلومات شخصیت | |
| مقام پیدائش | بصرہ |
| مقام وفات | مرو |
| عملی زندگی | |
| پیشہ | محدث |
| عسکری خدمات | |
| لڑائیاں اور جنگیں | غزوہ خیبر |
درستی - ترمیم  | |
نام ونسب
ترمیمنضلہ نام، ابوبرزہ کنیت، سلسلۂ نسب یہ ہے، نضلہ بن عبد اللہ بن حارث بن حبال بن ربیعہ بن وعبل بن انس بن خزیمہ بن مالک بن سلامان بن اسلم بن اقصی اسلمی۔ ابن سعد[3] نے ابو برزہ کے فرزند کے حوالے سے ان کا نام نضلہ بن عبد اللہ، خلیفہ بن خیاط[4] نے عبد اللہ بن نضلہ نقل کیا ہے۔ لیکن زیادر تر مصادر نے نضلہ بن عبید پر اتفاق کیا ہے۔[5] البتہ ان کے کئی اور نام دسترس میں ہیں۔[6]
نووی[7] کے بقول اسلام سے پہلے ان کا نام نضلہ بن نیاز (نیاز=شیطان) تھا۔ آنحضرت (ص) نے ان کا نام نضلہ بن عبد اللہ رکھ دیا۔[8] ان کی کنیت کے بارے میں کوئی اختلاف نہیں ہے۔ صرف شیخ طوسی نے انھیں اصحاب پیغمبر کے ضمن میں ابو بردہ[9] اور اصحاب امیر المومنین کے ذیل میں ابو برزہ ذکر کیا ہے۔[10] ایسا معلوم ہوتا ہے کہ اس میں کوئی غلطی پیش آئی ہے۔ نووی کا ماننا ہے کہ صحابی پیغمبر (ص) فقط وہ ہیں جن کی کنیت ابو برزہ تھی۔[11] [12]
اسلام و غزوات
ترمیمدعوت اسلام کے ابتدائی زمانہ میں اسلام لائے، اسلام کے بعد جس قدر غزوات ہوئے سب میں آنحضرت کے ہمرکاب رہے، [13] ان کا شمار ان اصحاب میں ہوتا ہے جو فتح مکہ، [14] غزوات حنین و خیبر[15] اور دیگر کئی دیگر غزوات میں تھے جن کی تعداد 6 یا 7[16] یا 9[17] ذکر ہوئی ہے۔ خود ان کے بقول: جب جنگ احد میں آنحضرت صلی اللہ علیہ وسلم زخمی ہو گئے تو وہ آپ کی دیکھ بھال میں لگ گئے۔ ٹھیک ہونے کے بعد پیغمبر صلی اللہ علیہ وسلم نے ان کے حق میں دعا کی۔[18]
فتح مکہ میں خون کا ایک قطرہ نہیں گرا تھا اور رحمت عالم ﷺ نے تمام دشمنانِ اسلام کے لیے عفوو درگزر کا اعلان فرمادیا تھا؛ البتہ چند معاندین جن کا عناد اورجن کی سرکشی حد سے بڑھی ہوئی تھی اس سے مستثنیٰ تھے اوران کا خون ہدر کر دیا گیا تھا، ان میں ایک عبد اللہ بن خطل تھا، یہ پہلے اسلام لاچکا تھا، مگر اپنے ایک مسلمان خادم کو قتل کر دیا اور اسلامی عدالت کے قانون قصاص سے ڈر کر پھر مرتد ہوکر مکہ بھاگ گیا، [19][20] اس کی دو کنیزیں تھیں جو بازاروں میں آنحضرت ﷺ کی ہجو گاتی پھرتی تھیں، [21] اس لیے جب مکہ فتح ہوا تو امان کے لیے خانہ کعبہ کا غلاف پکڑ کر لٹک گیا، آنحضرت ﷺ سے لوگوں نے کہا کہ وہ کعبہ کے غلاف کی پناہ میں ہے، آپ نے فرمایا اس کو قتل کردو، آقا کا اشارہ پاتے ہی ابو برزہ اس کے پاس گئے[22] تو دیکھا کہ وہ خانہ کعبہ کا پردہ پکڑے ہوئے تھا، انھوں نے رکن و مقام کے درمیان میں اس کی گردن اڑا دی۔[23] البتہ اکثر منابع ابن خطل کے قتل میں ان کے ساتھ سعید بن حریث مخزومی کو شریک قرار دیتے ہیں۔[24] اس کے ساتھ اس کی لونڈیوں کے قتل کا بھی حکم نافذ ہوا تھا۔ [25] [26]
خلفاء کے زمانے میں
ترمیمابوبرزہؓ آنحضرت ﷺ کی زندگی مبارک تک مدینہ میں رہے، حضرت عمرؓ کے زمانہ میں بصرہ میں رہنے لگے، جنگ صفین میں امیر المومنین حضرت علیؓ کے ساتھ تھے، جنگ نہروان میں خارجیوں کا مقابلہ کیا، پھر خراسان کی فتوحات میں مجاہدانہ شریک ہوئے۔[27]
نبرد عین شمس
ترمیمطبری کے مطابق، [28] سن 20 ہجری میں جب عین شمس کی جنگ (مصر کے شہر میں) پیش آئی، جس میں عمرو بن عاص کا سامنا مقوقس سے ہوا۔ اس وقت مسلمانوں کا ایک گروہ ڈر گیا اور اس نے سستی ظاہر کی تو اس وقت عمرو ابن عاص نے لشکر میں حاضر اصحاب پیغمبر سے نصرت طلب کی۔ ان میں سے جو لوگ پیش قدم ہوئے ان میں ابو برزہ رضی اللہ تعالیٰ عنہ بھی تھے۔ ان کے پیش قدم ہونے سے مسلمانوں میں قوت پیدا ہوئی اور انھوں نے کامیابی حاصل کی۔[29]
فتح بلخ و اصطخر
ترمیمسن 29ھ میں عبد اللہ بن عامر نے اصطخر، دارابگرد و اردشیر خورہ (قدیم فارس کے علاقہ) پر لشکر کشی کی تو ابوبرزہ فوج کے میمنہ کے سردار تھے۔ یہ جنگ ان علاقوں پر فتح کے ساتھ ختم ہوئی۔
اسی طرح سے وہ اس پچاس ہزار کے لشکر میں شامل تھے جس کے سردار ربیع بن زیاد تھے اور جس میں بلخ و قہستان پر (51ھ) مسلمانوں نے فتح حاصل کی۔[30]
فضل وکمال
ترمیمابوبرزہؓ اسلمی کو آنحضرت ﷺ کی صحبت سے فیضیاب ہونے کا کافی موقع ملا، اس لیے احادیث نبوی ﷺ کی متعدبہ تعداد ان کے حافظہ میں محفوظ تھی، ابو برزہ نے پیغمبر اکرم صلی اللہ علیہ و آلہ وسلم سے روایات نقل کی ہیں۔ان کی مرویات کی مجموعی تعداد 64 ہے، ان میں سے 27 متفق علیہ ہیں، ان کے علاوہ 2 میں بخاری اور 4 میں مسلم منفرد ہیں۔ [31]
احمد بن حنبل نے مسند میں[32] ان کے واسطہ سے 49 احادیث نقل کی ہیں۔ اسی طرح سے امام حسن (ع) سے منقول ان کی روایات امامیہ محدثین منجملہ کلینی شیخ کلینی[33] کی توجہ کا سبب قرار پائی ہے۔[34]
ابو برزہ کی روایات کے راوی
ترمیمان کے واسطے سے روایت نقل کرنے والوں اور ان کے تلامذہ کی تعداد بھی کافی ہے، ذیل کے نام قابل ذکر ہیں۔ مغیرہ، ابو منہال ریاحی، ارزق بن قیس، ابوعثمان نہدی، ابوالعالیہ ریاحی، کنانہ ابن نعیم ابو الزاع، رابسی، ابو الوضی، سعید بن عبد اللہ، ابو السوار عددی، ابو طالوت عبد السلام [35] وغیرہ جیسے سیار بن سلامہ، ابو الوازع اور عبد اللہ بن مطرف کے اسماء قابل ذکر ہیں۔[36]
زہد و عفاف
ترمیمحضرت ابوبرزہؓ میں زہد وعفاف کا رنگ بہت نمایاں تھا، نہ کبھی بیش قیمت کپڑا پہنا اور نہ گھوڑے پر سوار ہوئے، گیروے رنگ کے دوکپڑوں سے ستر پوشی کرتے تھے، ان کے ایک معاصر عائد بن عمرو بیش قیمت کپڑا بھی پہنتے اور گھوڑے پر بھی سوار ہوتے تھے، ایک شخص نے ان دونوں کے درمیان میں پھوٹ ڈلوانے کے خیال سے عائذ سے آکر کہا، ابو برزہ کو دیکھیے ، وہ لباس اور وضع قطع میں بھی آپ کی مخالفت کرتے ہیں، آپ خز (ایک بیش قیمت کپڑا) استعمال کرتے ہیں اور گھوڑے پر سوار ہوتے ہیں اور وہ ان دونوں چیزوں سے احتراز کرتے ہیں؛ لیکن صحابہ کی اخوت لباس اور طرز معاشرت کے اختلاف سے بلند تھی، جواب دیا، اللہ ابوبرزہ پر رحم کرے، آج ہم میں ان کے رتبہ کا کون ہے، مگر یہاں بھی وہی جواب ملا کہ خدا عائذ پر رحم کرے، ہم میں ان کا ہم مرتبہ کون ہے؟ [37]
مسکین نوازی
ترمیممسکین نوازی ان کاخاص شعار تھا، صبح و شام معمولاً فقراء و مساکین کو کھانا کھلاتے تھے، حسن بن حکیم اپنی ماں کی زبانی بیان کرتے ہیں کہ ابوبرزہؓ ایک کاسہ ثرید (ایک قسم کا عربوں کا مرغوب کھانا) صبح اور ایک کاسہ شام بیواؤں، یتیموں اور مساکین کو کھلاتے ہیں۔ [38]
احترامِ نبوت
ترمیمذات نبوی ﷺ کے ساتھ کسی قسم کا طنز تمسخر برداشت نہیں کرسکتے تھے، عبد اللہ بن زیاد کو حوض کوثر کے متعلق کچھ پوچھنا تھا، اس نے لوگوں سے پوچھا حوض کوثر کے متعلق کون بتا سکتا ہے، انھوں نے ابوبرزہ کا نام لیا، عبیداللہ نے ان کو بلا بھیجا، یہ گئے، اس نے آتے دیکھا تو بہ سبیل استہزاء کہا کہ تمھارے یہ محمدی ہیں ابوبرزہؓ نے برہمی سے جواب دیا، خدا کا شکر ہے کہ میں ایسے زمانہ تک زندہ رہا جس میں شرف صحبت پر عار دلایا جاتا ہے اوراس برہمی کی حالت میں تخت پر بیٹھ گئے، عبیداللہ نے اپنا سوال پیش کیا، انھوں نے جواب دیا کہ جو شخص اس (حوض کوثر) کو جھٹلائے گا، وہ نہ اس کے پاس جانے پائے گا اورنہ خدا اس کو اس سے سیراب کرے گا یہ کہا اور اٹھ کے چلے آئے۔ [39] [40]
یزید پر اعتراض
ترمیمجس وقت یزید بن معاویہ چوپ سے سر امام حسین (ع) کی توہین کر رہا تھا اور اس پر شراب ڈال رہا تھا۔ ابو برزہ نے اس پر اعتراض کیا تو یزید نے انھیں دربار سے باہر نکال دیا۔[41]
وفات
ترمیمزمانہ وفات میں اختلاف ہے، بعض60 اور بعض 65ھ بتاتے ہیں دوسری روایت زیادہ صحیح ہے؛ کیونکہ مروان اورابن زبیر کے ہنگاموں تک زندہ تھے اورکہتے پھرتے تھے ؛کہ یہ سب دنیا کے لیے جھگڑتے ہیں، [42] وفات کے بعد ایک لڑکا مغیرہ یادگار چھوڑا۔
حوالہ جات
ترمیم- ↑ حلیۃالاولیا ، ج 2 ص 32
- ↑ اسد الغابہ ج 5 ص 31
- ↑ ابن سعد، طبقات الکبری، دار صادر، ج4، ص298، ج7، ص366
- ↑ ابن خیاط، الطبقات، 1966م، ج2، ص829، ج1، ص241
- ↑ بخاری، التاریخ الصغیر، 1406ق، ج1، ص157، ص166؛ ابو زرعہ، تاریخ، 1400ق، ج1، ص477
- ↑ ابن اثیر، اسد الغابہ، دار الاحیاء، ج5، ص146-147؛ ذہبی، تاریخ، 1368ق، ج2، ص328؛ عبد الغنی، الکمال فی معرفت الرجال، ج1، ص167
- ↑ نووی، تہذیب الاسماء، ج2، ص180
- ↑ ابن حجر، الاصابہ، 1853م، ج6، ص237
- ↑ طوسی، رجال، 1380ق، ص 30
- ↑ ص 60
- ↑ نووی، تہذیب الاسماء، ج2، ص179
- ↑ سير أعلام النبلاء للذهبي آرکائیو شدہ 2017-07-19 بذریعہ وے بیک مشین
- ↑ (ابن سعد:1/4)
- ↑ ابن سعد، طبقات الکبری، دار صادر، ج4، ص298؛ ابن حجر، الاصابہ، 1353ق، ج6، ص237۔
- ↑ ابن حجر، الاصابہ، 1353ق، ج6، ص237؛ ابن اثیر، اسد الغابہ، دار الاحیاء، ج5، ص19۔
- ↑ احمد بن حنبل، مسند، دار صادر، ج4، ص423؛ بخاری، التاریخ الصغیر، 1406ق، ج1، ص158۔
- ↑ مزی، تحفہ الاشراف، 1397ق، ج9، ص9۔
- ↑ ابو نعیم، ذکر اخبار اصبہان، 1934م، ج2، ص39
- ↑ (زرقانی فتح مکہ)
- ↑ بلاذری، انساب الاشراف، 1959م، ج1، ص360۔
- ↑ (ابوداؤد کتاب الجہاد باب فی قتل الامیر صبرا)
- ↑ (ابوداؤد کتاب الجہاد باب فی قتل الامیر صبرا)
- ↑ واقدی، المغازی، 1404ق، ج2، ص859؛ ابن سعد، الطبقات الکبری، دار صادر، ج4، ص299؛ احمد بن حنبل، العلل، 1963م، ج1، ص359
- ↑ ابن ہشام، سیرہ النبی، 1972م، ج4، ص868؛ طبری، تاریخ، ج3، ص60؛ ابن اثیر، الکامل، ج2، ص249
- ↑ سیرة ابن ہشام 3/410، المغازی للواقدی 859، 860
- ↑ أسد الغابة لابن الأثير آرکائیو شدہ 2019-12-22 بذریعہ وے بیک مشین
- ↑ (اصابہ، جلد6، تذکرہ نضلہ)
- ↑ طبری، تاریخ، ج4، ص111
- ↑ ابن اثیر، الکامل، ج2، ص565
- ↑ ابن اثیر، الکامل، ج3، ص101، ص489؛ ابن خلدون، تاریخ، 1957م، ج3 (1)، ص30
- ↑ (تہذیب الکمال:406)
- ↑ احمد بن حنبل، مسند، دار صادر، ج4، ص419-426۔
- ↑ کلینی، الکافی، 1362ش، ج6، ص17۔
- ↑ خوئی، معجم رجال الحدیث، 1403ق، ج21، ص43۔
- ↑ (تہذیب التہذیب:1/446)
- ↑ احمد بن حنبل، مسند، ج4، ص419-426
- ↑ (ابن سعد، ق1، جز7:35)
- ↑ (ابن سعد، قسم1، جزو7:35)
- ↑ (ابن سعد، ق1، جزو7:35)
- ↑ "سير أعلام النبلاء (أبو برزة الأسلمى)"۔ 5 أبريل 2021 میں اصل سے آرکائیو شدہ
- ↑ بلاذری، انساب الاشراف، 1959م، ج3، ص416؛ طبری، ج5، ص390؛ ابن اثیر، اسد الغابہ، دار احیاء، ج5، ص20؛ ابن اثیر، الکامل، ج4، ص85
- ↑ (اصابہ، جلد6، تذکرہ نضلہ)