آل بویہ

خلافت عباسیہ کے عروج کے زمانے 247ھ تک اندلس اور مراکش کے چھوٹے ملکوں کو چھوڑ کر باقی ساری اسلامی دنیا موجودہ پاکستان اور فرغانہ لے کر قیروان تک عباسی خلافت کے تحت تھی لیکن عباسی خلافت کے زوال کے بعد اس اتحاد اور وحدت کا خاتمہ ہو گیا اور کئی خود مختار حکومتیں قائم ہوگئیں۔ ان حکومتوں میں تین بڑی اور قابل ذکر حکومتوں میں بنی بویہ کی حکومت بھی شامل تھی۔

آل بویہ آل بویِه Āl-e Buye
934–1062
359ھ/ 970ء میں آل بویہ کی سلطنت کی حدود کا نقشہ
دار الحکومت	شیراز (بویہ فارس, 934–1062) ری (بویہ جبال, 943–1029) بغداد (بویہ عراق, 945–1055)
عمومی زبانیں	فارسی (مادری زبان) عربی
مذہب	اہل تشیع (اس کے علاوہ اہل سنت, مسیحی, زرتشتیت, یہودیت)
حکومت	موروثی بادشاہت
امیر/شہنشاہ
• 934-949	عماد الدولہ
• 1048-1062	ابو منصور فولاد ستون
تاریخی دور	قرون وسطی
•	934
• عضد الدولہ "شہنشاہ" کا اعلان	978
•	1062
ماقبل مابعد دولت سامانیہ زیاری خاندان بنو الیاس سلطنت غزنویہ سلجوقی سلطنت آل کاکویہ عقیلی خاندان مروانی
موجودہ حصہ	ایران عراق کویت سلطنت عمان ترکیہ متحدہ عرب امارات

فائل:Buyids-004.png

آل بویہ کی حکومت

حکومت کا قیام

اس خاندان کا مورث اعلیٰ ابو شجاع بویہ تھا چونکہ اس خاندان کا تعلق ماژندران کے علاقے دیلم سے تھا اس لیے بنی بویہ کو دیالمہ بھی کہا جاتا ہے۔ یہ ایک ایرانی خاندان تھا۔ اس حکومت کے بانی تین بھائی علی، حسن اور احمد تھے جنھوں نے بالترتیب عماد الدولہ، رکن الدولہ اور معز الدولہ کے لقب اختیار کیے اور ایران اور عراق میں علاحدہ علاحدہ حکومتیں قائم کیں۔ عماد الدولہ ان کا مرکزی سربراہ تھا۔ اس کے بعد یہی حیثیت رکن الدولہ کو حاصل ہوئی اور اس کے بعد عضد الدولہ اور اس کی اولاد کو۔ بغداد پر اسی خاندان کے حکمران معز الدولہ نے 334ھ میں قبضہ کیا تھا۔ عراق کا پورا ملک اور خراسان چھوڑ کر باقی ایران بنی بویہ کے قبضے میں تھا۔ بغداد، اصفہان اور شیراز بویہی سلطنت کے بڑے شہر تھی۔ دولت سامانیہ کے زوال کے بعد رے پر بھی ان کا قبضہ ہو گیا

مشہور حکمران

بنی بویہ کا سب سے مشہور عضد الدولہ 366ھ تا 372ھ ہے۔ اس کے بعد بنی بویہ کی حکومت میں انتشار پیدا ہو گیا۔ عراق، رے اور فارس میں بویہی شہزادوں نے علاحدہ علاحدہ حکومتیں قائم کر لیں ان میں رے کی حکومت اس لحاظ سے مشہور تھی اس کے اس حکمران فخر الدولہ کو ایک بڑا قابل وزیر صاحب ابن عباد مل گیا تھا۔ صاحب نے 373ھ تا 385ھ تک 12 سال وزارت کی اور ایسی شہرت حاصل کی جیسی خلافت عباسیہ کے زمانے میں برامکہ نے حاصل کی تھی۔

خاتمہ

رے کی حکومت کی 420ھ میں غزنی کے حکمران محمود غزنوی نے خاتمہ کر دیا۔ اس کے بعد 447ھ میں سلجوقیوں نے بغداد پر قبضہ کرکے بنی بویہ کی سلطنت کا ہر جگہ سے خاتمہ کر دیا۔ بنی بویہ عقیدے کے لحاظ سے شیعہ تھے اور محرم کے مہینے میں تعزیہ نکالنے اور عاشورہ کی رسوم ادا کرنے کا آغاز انہی کے حکمران معز الدولہ کے زمانے سے ہوا۔

علم و ادب کی سرپرستی

بنی بویہ کے کئی حکمران اور وزیر علم و ادب کے بڑے سرپرست تھے۔ عضد الدولہ اور صاحب ابن عباد خاص طور پر اس لحاظ سے مشہور تھے۔ عربی زبان کا سب سے بڑا شاعر ابو الطیب متنبی 910ھ تا 965ھ اسی زمانے میں ہوا ہے ۔

مشہور طبیب اور فلسفی بو علی سینا 370ھ تا 428ھ اسی زمانے میں ہوا ہے ۔ رازی کے بعد ابن سینا سب سے بڑا مسلمان طبیب تھا۔ طب میں اس نے جو کتاب لکھی اس کا نام ”القانون“ ہے اور فلسفے کے موضوع پر جو سب سے بڑی کتاب لکھی اس کا نام ”الشفاء“ہے۔ یہ دونوں کتابیں کئی جلدوں میں ہیں اور عربی زبان میں ہیں۔ بعد میں ان کتابوں کا لاطینی اور یورپ کی دوسری زبانوں میں ترجمہ ہوا اور فرانس، جرمنی اور اٹلی کے مدرسوں میں کئی سال تک پڑھائی جاتی رہیں۔

اسی زمانے کے سائنس دانوں میں ابن الہیثم 348ھ تا 430 ھ بمطابق965ءتا 1039ءکا نام بھی قابل ذکر ہے۔ وہ بصرہ کا رہنے والا تھا اور ابن سینا کا ہم عصر تھا۔ اس نے علم طبیعیات اور سائنس سے متعلق کئی کتابیں لکھیں۔ یورپ کے محققین کا کہناہے کہ کیمرا جس نظریے کی بنیاد پر بنایا گیا وہ نظریہ سب سے پہلے ابن الہیثم نے ہی پیش کیا۔ اس کی کتاب ”کتاب المناظر“ جس میں اس نے یہ نظریہ پیش کیا تھا بارہویں صدی میں عربی سے لاطینی زبان میں ترجمہ کی گئی اور یورپ کے سائنس دانوں نے اس سے فائدہ اٹھایا۔ اس کے ان کمالات کی وجہ سے پاکستان میں نومبر 1969ء میں ابن الہیثم کا جشن ہزار سالہ منایا گیا۔ فلسفہ کی مشہور کتاب ”رسائل اخوان الصفا“ بھی اسی زمانے میں لکھی گئی۔

بنی بویہ کے ان کارناموں کے باوجود ان کا دور حکومت مسلمانوں میں عقائد کی کمزوری اور اخلاقی خرابی کا باعث ہوا۔ مذہبی تعصب اور فرقہ بندی نے چوتھی صدی ہجری میں مسلمانوں میں مضبوطی سے جڑیں پکڑلی تھیں اور عباسی دور کے برخلاف مختلف عقائد رکھنے والے علماءدست و گریباں نظر آتے تھے۔ بغداد فرقہ وارانہ فساد کا گڑھ بن گیا۔

امرائے بنی بویہ

فارس میں بویہ

• عماد الدولہ دیلمی (934ء–949ء)
• عضد الدولہ (949ء–983ء)
• شرف الدولہ (983–989)
• صمصام الدولہ (989–998)
• بہا الدولہ (998–1012)
• سلطان الدولہ (1012–1024)
• ابو کالیجار (1024–1048)
• ابو منصور پولاذ ستون (1048–1051)
• ابو سید خسرو شاہ (1051–1054)
• ابو منصور پولاذ ستون (1048–1051)

رے میں بویہ

• رکن الدولہ (935–976)
• فخر الدولہ (976–980)
• مؤید الدولہ (ابو منصور بویہ) (980–983)
• فخر الدولہ (restored) (984–997)
• ماجد الدولہ (997–1029)

عراق میں بویہ

• معز الدولہ (945–967)
• 'عز الدولہ (966–978)
• عضد الدولہ (978–983)
• صمصام الدولہ (983–987)
• شرف الدولہ (987–989)
• بہاء الدولہ (989–1012)
• سلطان الدولہ (1012–1021)
• مشرف الدولہ (1021–1025)
• جلال الدولہ (1025–1044)
• ابو کالیجار (1044–1048)
• المالک الرحیم/بونصر خسرو فیروز/ملک رحیم (1048–1055)