ترکیہ

مغربی ایشیا کا ایک ملک جس کا کچھ حصہ جنوب مشرقی یورپ میں واقع ہے
  

ترکیہ یا ترکی‎ (ترکی زبان: Türkiye)، سرکاری طور پر جمہوریہ ترکیہ (ترکی زبان: Türkiye Cumhuriyeti،تلفظ:تُرکیہ جُمہُورِیِتییوریشیائی ملک ہے جو جنوب مغربی ایشیا میں جزیرہ نما اناطولیہ اور جنوبی مشرقی یورپ کے علاقہ بلقان تک پھیلا ہوا ہے۔

ترکیہ
ترکیہ
ترکیہ
پرچم ترکی  ویکی ڈیٹا پر (P163) کی خاصیت میں تبدیلی کریں
ترکیہ
ترکیہ
نشان

 

شعار
(ترکی میں: Yurtta sulh, cihanda sulh ویکی ڈیٹا پر (P1451) کی خاصیت میں تبدیلی کریں
ترانہ:  استقلال مارشی  ویکی ڈیٹا پر (P85) کی خاصیت میں تبدیلی کریں
زمین و آبادی
متناسقات 39°N 36°E / 39°N 36°E / 39; 36  ویکی ڈیٹا پر (P625) کی خاصیت میں تبدیلی کریں[1]
بلند مقام
پست مقام
رقبہ
دارالحکومت انقرہ[2]  ویکی ڈیٹا پر (P36) کی خاصیت میں تبدیلی کریں
سرکاری زبان ترکی[3]  ویکی ڈیٹا پر (P37) کی خاصیت میں تبدیلی کریں
آبادی
گھرانے
حکمران
طرز حکمرانی وحدانی ریاست،  صدارتی نظام  ویکی ڈیٹا پر (P122) کی خاصیت میں تبدیلی کریں
اعلی ترین منصب رجب طیب ایردوان (28 اگست 2014–)  ویکی ڈیٹا پر (P35) کی خاصیت میں تبدیلی کریں
سربراہ حکومت رجب طیب ایردوان (24 جون 2018–)  ویکی ڈیٹا پر (P6) کی خاصیت میں تبدیلی کریں
مقننہ ترکی قومی اسمبلی[4]  ویکی ڈیٹا پر (P194) کی خاصیت میں تبدیلی کریں
قیام اور اقتدار
تاریخ
یوم تاسیس 29 اکتوبر 1923  ویکی ڈیٹا پر (P571) کی خاصیت میں تبدیلی کریں
عمر کی حدبندیاں
شادی کی کم از کم عمر
لازمی تعلیم (کم از کم عمر)
لازمی تعلیم (زیادہ سے زیادہ عمر)
شرح بے روزگاری
دیگر اعداد و شمار
کرنسی ترکی لیرہ  ویکی ڈیٹا پر (P38) کی خاصیت میں تبدیلی کریں
منطقۂ وقت متناسق عالمی وقت+03:00 (معیاری وقت)  ویکی ڈیٹا پر (P421) کی خاصیت میں تبدیلی کریں
ٹریفک سمت دائیں[5]  ویکی ڈیٹا پر (P1622) کی خاصیت میں تبدیلی کریں
ڈومین نیم tr.  ویکی ڈیٹا پر (P78) کی خاصیت میں تبدیلی کریں
سرکاری ویب سائٹ باضابطہ ویب سائٹ  ویکی ڈیٹا پر (P856) کی خاصیت میں تبدیلی کریں
آیزو 3166-1 الفا-2 TR  ویکی ڈیٹا پر (P297) کی خاصیت میں تبدیلی کریں
بین الاقوامی فون کوڈ +90[6]،  +36[6]  ویکی ڈیٹا پر (P474) کی خاصیت میں تبدیلی کریں
Map

ترکیہ کی سرحدیں8 ممالک سے ملتی ہیں جن میں شمال مغرب میں بلغاریہ، مغرب میں یونان، شمال مشرق میں گرجستان (جارجیا)، مشرق میں آرمینیا، ایران اور آذربائیجان کا علاقہ نخچوان اور جنوب مشرق میں عراق اور شام شامل ہیں۔ علاوہ ازیں شمال میں ملکی سرحدیں بحیرہ اسود، مغرب میں بحیرہ ایجیئن اور بحیرہ مرمرہ اور جنوب میں بحیرہ روم سے ملتی ہیں۔

ترکیہ ایک جمہوری، لادینی، آئینی جمہوریت ہے جس کا موجودہ سیاسی نظام 1923ء میں سقوط سلطنت عثمانیہ کے بعد مصطفٰی کمال اتاترک کی زیر قیادت تشکیل دیا گیا۔ یہ اقوام متحدہ اور موتمر عالم اسلامی کا بانی رکن اور 1949ء سے یورپی مجلس اور 1952ء سے شمالی اوقیانوسی معاہدے کا رکن ہے۔جبکہ یورپی اتحاد میں شمولیت کے لیے مذاکرات طویل عرصے سے جاری ہیں۔

یورپ اور ایشیا کے درمیان میں محل وقوع کے اعتبار سے اہم مقام پر واقع ہونے کی وجہ سے ترکیہ مشرقی اور مغربی ثقافتوں کے تاریخی چوراہے پر واقع ہے۔

نام ترمیم

ترکی کا نام گیارھویں صدی کے آخر کے بعد مغربی ذرائع میں ظاہر ہوتا ہے، جو اناطولیہ اور مشرق قریب میں سلجوق کے زیر کنٹرول زمینوں کا حوالہ دیتا ہے۔ انگریزی نام Turkey (قرون وسطی کے لاطینی Turchia/Turquia سے) کا مطلب ہے "ترکوں کی سرزمین"۔ ترکی کے درمیانی انگریزی کے استعمال کا ثبوت جیفری چاسر کی "دی بک آف دی ڈچس" ( 1363ء) میں ملتا ہے۔ جدید ہجے ترکی کی تاریخ کم از کم 1719ء کی ہے۔ ترکی کا نام سلطنت عثمانیہ کی وضاحت کے لیے متعدد بین الاقوامی معاہدوں کے متن میں استعمال ہوا ہے۔ بازنطینی ذرائع میں، نام ٹورکیا (یونانی: Τουρκία) دو قرون وسطیٰ کی ریاستوں کی وضاحت کے لیے استعمال کیا گیا تھا: جیسے ہنگری (ویسٹرن تورکیا)؛ اور خضریہ (مشرقی تورکیا)۔

سلطنت عثمانیہ کے ٹوٹنے کے بعد، Türkler için Türkiye ("ترک کے لیے ترکی") کا جذبہ ابھرا۔ الیگزینڈروپول کے معاہدے کے ساتھ، نام Türkiye پہلی بار بین الاقوامی دستاویزات میں داخل ہوا۔ 1921ء میں افغانستان کے ساتھ طے پانے والے معاہدے میں، دولت عالیہ ترکیہ کا لفظ استعمال کیا گیا تھا، جسے سلطنت عثمانیہ کے نام سے تشبیہ دی گئی تھی۔ دسمبر 2021ء میں، صدر رجب طیب ایردوان نے ایک سرکلر جاری کیا، جس میں برآمدات پر "Made in Türkiye" کا لیبل لگانے کا حکم دیا گیا۔ سرکلر میں یہ بھی کہا گیا ہے کہ دیگر سرکاری مواصلات کے سلسلے میں، "Turkey (انگریزی میں) جیسے فقرے کی بجائے 'Türkiye' کے فقرے کے استعمال پر ضروری حساسیت دکھائی جائے گی"۔ اس کی وجہ یہ تھی کہ Türkiye "ترک قوم کی ثقافت، تہذیب اور اقدار کی بہترین انداز میں نمائندگی اور اظہار کرتا ہے"۔ مئی 2022ء میں، ترکی کی حکومت نے اقوام متحدہ اور دیگر بین الاقوامی اداروں سے انگریزی میں سرکاری طور پر Türkiye استعمال کرنے کی درخواست کی، جسے اقوام متحدہ نے فوری طور پر قبول کر لیا۔

تاریخ ترمیم

جدید ترکیہ کا موجودہ علاقہ دنیا کے ان قدیم ترین علاقوں میں سے ہے جہاں مستقلاً انسانی تہذیب موجود ہے۔ چتل خیوک، چایونو، نیوالی جوری، خاجی لر، گوبکلی تپہ اور مرسین کے علاقے انسان کی اولین آبادیوں میں سے ایک ہیں۔

ترکیہ کے اناطولیہ خطہ کی تاریخ بہت قدیم ہے۔ یہاں پتھر کے زمانے سے انسان موجود ہے۔ بحر اسود کے ارد گرد کے علاقے میں اب سے دس ہزار سال پہلے آبادی کے آثار ملتے ہیں۔ آسانی کے لیے ہم ترکیہ کی تاریخ کو ان ادوار میں تقسیم کر سکتے ہیں:

· زمانہ قبل ازتاریخ: 2500 ق م سے پہلے

· کانسی کا دور: 2500 ق م سے 700 ق م

· لوہے کا دور: 700 ق م سے 330 ء

· رومن بازنطینی دور: 330 ء سے 1453ء

· سلجوقی دور: 1071ء سے 1300ء

· عثمانی دور: 1299ء سے 1923ء

· ری پبلکن دور: 1923ء سے تا حال قبل از تاریخ کا زمانہ۔

قبل از تاریخ: 2500 ق م سے پہلے ترمیم

ترکیہ میں قبل از تاریخ کے زمانے کے آثار ملتے ہیں۔ بحراسود کی تہ میں انسانی آبادی کے آثار ملے ہیں جن سے یہ معلوم ہوتا ہے کہ کسی زمانے میں یہ علاقے پانی سے باہر تھے۔ کسی جغرافیائی حادثے کے نتیجے میں بحراسود کی سطح بلند ہوئی اور یہ علاقے زیر آب آ گئے۔ قدیم زمانے میں اناطولیہ کا بڑا حصہ عراق کی قدیم اکدانی سلطنت کے زیر اثر رہا ہے۔تاریخی تحقیقات سے معلوم ہوتا ہے کہ سیدنا نوح علیہ الصلوۃ والسلام کے طوفان کا زمانہ بھی یہی ہے۔ عین ممکن ہے کہ انہی کے طوفان کے باعث بحراسود کی سطح بلند ہوئی ہو۔

کانسی کا زمانہ: 2500 ق م سے لے کر 700 ق م ترمیم

اس دور کو کانسی کا دور اس وجہ سے کہا جاتا ہے کہ اس زمانے میں آلات اور برتنوں کا بڑا حصہ کانسی سے بنایا جاتا تھا۔ 2500 ق م کے بعد حتیوں نے اناطولیہ میں قدم جمانے شروع کر دیے۔ یہ ہند یورپی نسل کے کسان تھے۔ انھوں نے اناطولیہ کے علاقے میں ایک عظیم سلطنت قائم کی۔ ان کے قوانین معاصر تہذیبوں کی نسبت زیادہ انسان دوست تھے۔ ان کے پورے دور میں دیگر اقوام اناطولیہ پر حملے کرتی رہیں۔حتیوں کا مذہب مشرکانہ تھا جس میں وہ متعدد خداؤں کی پرستش کیا کرتے تھے۔ بادشاہ کو پجاریوں کا سربراہ مانا جاتا تھا۔ حتی سلطنت 1400 ق م کے لگ بھگ اپنے عروج کو پہنچی۔ آہستہ آہستہ اسے زوال آ گیا اور اس کی جگہ متعدد تہذیبوں نے لے لی۔

حتیوں کے ساتھ ساتھ اناطولیہ کے کچھ حصے پر آشوری (Assyrians) بھی قابض رہے۔ ان کا اصل وطن دجلہ اور فرات کے درمیان میں کی زرخیز وادی تھی جسے میسوپوٹیمیا (Mesopotamia) کہا جاتا ہے۔ یہاں سے یہ دجلہ و فرات سے اوپر کی جانب سفر کرتے ہوئے اناطولیہ پر قابض ہوئے۔

اس پورے عرصے میں ترکیہ کے مختلف علاقوں میں چھوٹی چھوٹی ریاستیں قائم رہیں۔ مغرب کی جانب سے یہ یونانی اقوام کے زیر اثر رہا جبکہ مشرقی جانب سے یہ عراق کی قدیم سلطنتوں کے زیر اثر رہا۔ اس زمانے میں مغربی ترکیہ میں آئیونیا تہذیب، فرائ جیا تہذیب اور ٹرائے کی تہذیب غالب رہی۔

لوہے کا دور: 700 ق م سے 330 ء ترمیم

لوہے کے دور کا آغاز سیدنا داؤد علیہ الصلوۃ والسلام سے ہوا۔ قرآن مجید کے مطابق اللہ تعالی نے ان کے ہاتھ میں لوہے کو نرم کر دیا تھا جس کے باعث انھوں نے لوہے کی وسیع سلطنت قائم کی۔ ان کے بیٹے سیدنا سلیمان علیہ الصلوۃ والسلام کے زمانے میں لوہے کے علاوہ دیگر قسم کی صنعتوں کے غیر معمولی ترقی کی۔ ہواؤں کو مسخر کیا گیا۔ سمندر کے خزانوں کو تلاش کیا گیا۔ عظیم الشان عمارتیں تعمیر کی گئیں۔ ان کی سلطنت میں سائنسی ترقی کا یہ عالم تھا کہ یمن جیسے ترقی یافتہ ملک کی ملکہ بھی ان کے محل میں پہنچ کر خود کو دیہاتی دیہاتی سا محسوس کرنے لگی۔ یہ ترقی اسرائیل سے نکل کر دیگر قوموں تک بھی پہنچی۔

اس دور میں مغربی ترکیہ لڈیا کی سلطنت اور مشرقی ترکیہ ایران کی ہخا منشی سلطنت کے زیر اثر آ گیا۔ 334 ق م میں اس علاقے کو یونان کے اسکندر نے فتح کر لیا مگر اس کے جانشین اتنی بڑی سلطنت کو سنبھال نہ سکے اور یہ ٹکڑوں میں تقسیم ہو گئی۔ اس کے بعد یہاں طویل عرصے تک یونانیوں کی سلوقی سلطنت کی حکومت رہی جو 63ء تک قائم رہی۔ درمیان میں کچھ عرصے کے لیے آرمینیوں کی حکومت بھی یہاں قائم رہی۔

اس کے کچھ عرصے بعد رومیوں کو عروج نصیب ہوا اور ان کے فاتحین نے پورا اناطولیہ فتح کر کے اسے روم کا حصہ بنا دیا۔ ابتدا میں یہ ایک جمہوری حکومت تھی لیکن بعد میں یہ بادشاہت میں تبدیل ہو گئی۔ انھوں نے ترکیہ کے علاوہ موجودہ شام، اردن، فلسطین اور مصر پر قبضہ جما لیا۔ اسی دور میں سیدنا عیسی علیہ الصلوۃ والسلام کی بعثت ہوئی۔ آپ کے بعد آپ کے ماننے والوں کی بڑی تعداد نے ترکیہ کو اپنا مسکن بنایا اور یہاں دعوتی و تبلیغی سرگرمیاں جاری رکھیں۔

رومی دور: 330 ء سے 1453ء ترمیم

300ء کے لگ بھگ اس پورے علاقے کی اکثریت مسیحی مذہب اختیار کر چکی تھی۔ 330ء میں رومی شہنشاہ قسطنطین نے مسیحیت قبول کر کے اسے سرکاری مذہب قرار دیا۔ یہی وہ بادشاہ ہے جس نے موجودہ استنبول کے مقام پر عظیم شہر قسطنطنیہ بسانے کا حکم دیا جو اس کا دار الحکومت قرار پایا۔ اس سے پہلے یہ ایک چھوٹا سا شہر تھا جو بازنطین کہلاتا تھا۔

قرونِ وسطیٰ ترمیم

ساتویں صدی کے دوران مسلمانوں نے شام اور مشرقی ترکیہ کو فتح کر لیا جس کے نتیجے میں رومی سلطنت صرف اناطولیہ کے مغربی علاقوں تک محدود ہو گئی۔ 1037ء میں اس علاقے میں طغرل بیگ نے سلجوقی سلطنت کی بنیاد رکھی۔ مشرقی اور وسطی اناطولیہ پر سلجوقوں اور مغربی ترکیہ پر رومنوں کی حکومت رہی۔ سلجوقی سلطنت کے زوال پر اس کی باقیات سے عثمانی ترکوں نے جنم لیا اور مشرقی ترکیہ پر اپنی حکومت قائم کر لی۔

18 ویں سے 13 ویں صدی قبل مسیح میں یہاں حطیوں نے پہلی بڑی ریاست تشکیل دی۔

 
افسس کے کتب خانہ کے کھنڈر، 135ء

عہد عتیق (Ancient Age) میں یہ علاقہ یونانیوں اور فارسیوں کے درمیان میں جنگوں کا مرکز بنا رہا۔ کبھی فارسی اس علاقے پر قابض ہو جاتے اور کبھی یونانی۔ پہلی صدی قبل مسیح میں یہ علاقہ رومیوں کے قبضے میں آ گیا جن کے حکمران قسطنطین اول نے 324ء میں قسطنطنیہ (موجودہ استنبول) کا شہر بسایا اور اسے سلطنت روما کا دار الحکومت قرار دیا۔ بعد ازاں سلطنت روما کی تقسیم کے بعد یہ مشرقی رومی سلطنت یعنی بازنطینی سلطنت کا دار الحکومت بنا۔

مسلمانوں نے ابتدائی فتوحات ہی میں موجودہ ترکیہ کے مشرقی علاقوں کو اپنے زیر نگیں کر لیا تھا لیکن اناضول (اناطولیہ) کے وسطی علاقے 9 ویں صدی میں سلجوقوں کی آمد تک مسلم ریاست نہ بن سکے۔ بلاد اسلامیہ پر چنگیز خان کی یلغار کے بعد ترکوں نے وسط ایشیا سے ہجرت کرکے اناضول کو اپنا وطن بنایا۔ جنگ ملازکرد میں رومیوں پر سلجوقیوں کی عظیم فتح نے اس علاقے کے مستقبل کا فیصلہ کر دیا اور یوں ترکیہ کا بیشتر علاقہ ہمیشہ کے لیے بلاد اسلامیہ کا حصہ بن گیا۔ سلجوقیوں کے زوال کے بعد ترکیہ کے سیاسی منظر نامے پر عثمانی ابھرے جنھوں نے اسلامی تاریخ کی سب سے عظیم ریاست "سلطنت عثمانیہ" تشکیل دی۔

 
ادرنہ کی عظیم جامع سلیمیہ مسجد، عثمانی دور کی ایک خوبصورت یادگار

سلطنت عثمانیہ 631 سال تک قائم رہی اور 16 ویں اور 17 ویں صدی میں دنیا کی سب سے طاقتور سیاسی قوت تھی۔ عثمانیوں کی فتوحات ہی کے نتیجے میں اسلام وسط یورپ تک پہنچا اور مشرقی یورپ کا علاقہ عرصہ دراز تک مسلمانوں کے زیر نگیں رہا۔ زوال کے دور کے بعد سلطنت عثمانیہ نے پہلی جنگ عظیم میں جرمنی کا ساتھ دیا اور بالآخر شکست کھا کر خاتمے کا شکار ہو گئی۔ جنگ کے بعد طے پانے والے معاہدۂ سیورے (Treaty of Sèvres) کے مطابق فاتح اتحادی قوتوں نے سلطنت عثمانیہ کو مختلف ٹکڑوں میں بانٹ کر آپس میں تقسیم کر لیا۔

19 مئی 1919ء کو ترکوں نے اتحادی جارحیت کے خلاف تحریک آزادی کا اعلان کیا جس کی قیادت ایک عسکری کمان دار مصطفٰی کمال پاشا کر رہے تھے۔ 18 ستمبر 1922ء کو تمام جارح افواج کو ترکیہ سے نکال باہر کیا اور ایک نئی ریاست تشکیل دی گئی جو جمہوریہ ترکیہ کہلائی۔ یکم نومبر 1922ء کو ترک مجلس (پارلیمان) نے خلافت کا خاتمہ کر دیا اور یوں اس طرح 631 سالہ عثمانی عہد کا خاتمہ ہو گیا۔ 1923ء کو معاہدہ لوزان کے تحت بین الاقوامی برادری نے نو تشکیل شدہ جمہوریہ ترکیہ کو تسلیم کیا۔

جدید تاریخ ترمیم

اگلے چند سالوں میں مصطفٰی کمال نے، جسے ترکوں نے عظیم خدمات پر اتاترک (ترکوں کا باپ) کا لقب دیا تھا، وسیع پیمانے پر اصلاحات کیں۔ جدیدیت کے نام پر کی گئی یہ اصلاحات دراصل ملک کے مذہبی تشخص کے خاتمے کی کوشش تھیں۔ ترکی زبان کے رسم الخط کی عربی سے لاطینی کی جانب منتقلی اور لادینیت (Secularism) اختیار کرنے کا اعلان قابل ذکر ہیں۔

مصطفٰی کمال، جنہیں عظیم خدمات کے صلے میں قوم نے اتاترک (ترکوں کا باپ) کا خطاب دیا تھا، 1938ء میں انتقال کر گئے۔ ان کے نائب عصمت انونو ملک کے دوسرے صدر بنے اور ان کے دور میں اتاترک کی اصلاحات کو جاری رکھا گیا۔

دوسری جنگ عظیم میں ابتدائی طور پر ترکیہ غیر جانبدار رہا لیکن آخری مراحل میں محض خیر سگالی کے تحت اتحادیوں کا ساتھ دیا اور بعد ازاں اقوام متحدہ کا بانی رکن بنا۔ دوسری جنگ عظیم کے بعد اشتراکی بغاوت سے نمٹنے میں یونان کی مشکلات اور ترکیہ کی آبناؤں (در دانیال و آبنائے باسفورس) میں عسکری اڈے قائم کرنے کے سوویت مطالبات کے نتیجے میں ترکیہ کا جھکاؤ امریکا اور مغرب کی جانب ہو گیا۔ اس سلسلے میں مغرب کی جانب سے بڑے پیمانے پر ترکیہ کی عسکری و اقتصادی مدد کی گئی۔

کوریائی تنازع میں اقوام متحدہ کی افواج میں شرکت کے بعد 1952ء میں ترکیہ نے شمالی اوقیانوسی معاہدے کی تنظیم (نیٹو) میں شمولیت اختیار کی۔

جولائی 1974ء میں قبرص میں ترک مسلمانوں پر مسیحی یونانی آبادی کے وسیع مظالم پر ترکیہ نے قبرص میں جارحیت کی جس کے نتیجے میں ترک جمہوریہ شمالی قبرص قائم ہوئی جسے اب تک ترکیہ کے علاوہ کسی ملک نے تسلیم نہیں کیا۔ آج بھی قبرص کا جزیرہ دو حصوں میں منقسم ہے۔ (دیکھیے: مسئلہ قبرص)

ترکیہ آئین کے تحت مسلح افواج کو ترک آئین و ملکی سلامتی کا محافظ قرار دیا گیا ہے۔ اس طرح فوج کو مختلف مواقع پر بغاوت کر کے جمہوریت کو تہ و بالا کرنے کا موقع ملا ہے اور انھوں نے متعدد بار جمہوری حکومتوں کا تختہ الٹا ہے جن میں 1960ء کی بغاوت سب سے اہم ہے، جو وزیر اعظم عدنان میندریس کی اصلاحات کے خلاف تھی جنھوں نے ملک کو لادینیت کے نئے مفاہیم سے روشناس کرایا اور مذہب خصوصاً اسلام پر لگائی گئی بے جا پابندیاں اٹھائیں۔ فوج نے اقتدار پر قبضہ کر کے عدنان اور ان کے ساتھیوں کو تختۂ دار پر چڑھا دیا۔

1970ء کے عشرے میں ملک میں امن و امان قائم رکھنے میں ناکام مخلوط حکومتوں سے بیزار ہوکر ستمبر 1980ء میں فوج نے ایک مرتبہ پھر میں اقتدار سنبھال لیا۔ مارشل لائی ضوابط کے تحت کئی ہزار افراد پکڑ دھکڑ کی زد میں آئے۔ ان میں سے کئی ہزار کو تخریب کاری کا مجرم قرار دے کر قید و بند کی صعوبتوں جھیلنا پڑیں اور کئی کو سزائے موت بھی دی گئی۔

1982ء میں ترکیہ میں نیا آئین نافذ کیا گیا۔ 1989ء میں فوجی سربراہ کی جگہ طورغوت اوزال صدر بنے۔ صدر اوزال نے ترک معیشت کو جدید خطوط پر استوار کیا اور بین الاقوامی سطح پر ترکیہ کے رتبے کو کافی بلند کیا۔ وہ 1993ء میں انتقال کر گئے۔

مئی 1993ء میں وزیر اعظم سلیمان دیمرل صدر منتخب ہوئے۔ جون 1993ء میں سابق وزیر معیشت تانسو چلر دیمرل کی جگہ راہ حق پارٹی کی سربراہ منتخب ہوگئیں اور یوں وہ ترکیہ کی پہلی خاتون وزیر اعظم بنیں۔

اسلام پسندوں کو دبانے کے لیے استعمال کیے گئے تمام ہتھکنڈوں کے باوجود ترکیہ میں ان کی قوت بڑھتی چلی آ رہی ہے اور 1995ء کے انتخابات میں پہلی بار اسلام پسند رفاہ پارٹی سب سے بڑی جماعت کے طور پر ابھری اور واضح اسلامی نقطۂ نظر رکھنے والے نجم الدین اربکان ترکیہ کے وزیر اعظم بنے۔ رفاہ پارٹی کے اسلام پسند نظریات کے بعد قومی سلامتی کونسل کے ساتھ ان کے تعلقات میں بدمزگیاں پیدا ہوگئیں۔ یہ اندیشے بھی سر اٹھانے لگے کہ کہیں نئی حکومت ترکیہ کے لادین نظام اور مغرب کی طرف التفات کی پالیسی کو تباہ ہی نہ کر دے۔ آخر کار قومی سلامتی کونسل کے دباؤ میں آکر جون 1997ء میں اربکان کو مستعفی ہونا پڑا اور ان پر عمر بھر کے لیے سیاست میں حصہ لینے پر پابندی عائد کر دی گئی۔ اس کے باعث ہونے والی سیاسی اکھاڑ پچھاڑ کا سب سے زیادہ فائدہ بلند ایجوت کی جمہوری بائیں پارٹی کو ہوا اور انھوں نے پہلے مادر وطن پارٹی اور آگے چل کے راہ حق پارٹی کے ساتھ اتحادی حکومتی بنائی۔

18 اپریل 1999ء کو ہونے والے قومی اور بلدیاتی انتخابات کے نتیجے میں جمہوری بائیں پارٹی، مادر وطن پارٹی اور دیولت باہ چلی کی قوم پرست ایکشن پارٹی کے اتحاد نے حکومت بنائی جس میں بلند ایجوت ہی بدستور وزیر اعظم رہے۔ ترکیہ کی آئینی عدالت (سپریم کورٹ) کے سابق سربراہ احمد نجدت سیزر کو 5 مئی 2000ء کو ترکیہ کا صدر منتخب کیا گیا۔ انھوں نے 16 مئی کو اپنے عہدے کا حلف اٹھایا۔

اس حکومت نے پہلے ہی برس آئینی و اقتصادی اصلاحات کا ایک منصوبہ بنایا۔ اس میں وہ نکات بالخصوص شامل تھے جن کے باعث یورپی اتحاد میں ترکیہ کی رکنیت کے امکانات بہتر ہوجاتے لیکن ان اصلاحات کو عملی شکل دینے کے بارے میں حکومت کی صلاحیت سے متعلق شکوک کے ساتھ ساتھ ایک اقتصادی جعل سازی کے باعث فروری 2001ء میں ترکیہ ایک اقتصادی بحران میں پھنس گیا۔ جیسے جیسے یہ بحران سخت ہوتا گیا، کھلے بازار میں ترک لیرا کی فروخت بڑھ گئی۔ جس کے باعث حکومت کو لیرا کی قیمت میں 40 فیصد تک کمی کرنا پڑی ساتھ ہی سود کی شرح اور اشیائے صرف کی قیمتوں میں تیزی سے اضافہ ہونے لگا اور روزگار کے مواقع بھی کم ہونے لگے۔ اس بحران کا اثر جن دیگر معاملات پر پڑا ان میں اقتصادی استحکام کے لیے بلند ایجوت حکومت کے بے نظیر اقدامات اور بین الاقوامی مالیاتی فنڈ کے 11 ارب ڈالر کے قرض کی مدد سے چلنے والا مہنگائی توڑ پروگرام سرفہرست تھے۔

ان حالات سے نمٹنے کے لیے وزیر اعظم نے عالمی بینک کے ایک سابق نائب صدر کمال درویش کو مارچ 2001ء میں وزیر اقتصادیات مقرر کیا۔ متعدد اقتصادی و عملی اصطلاحات اور نچلی سطح پر اقتصادی استحکام اور میزانیہ سازی میں حکومت کو سہارا دینے کے لیے انھوں نے مئی 2001ء تک مجموعی طور پر بین الاقوامی مالیاتی فنڈ سے 10 ارب ڈالرز کے قرضوں کا انتظام کیا۔ فروری 2002ء میں عالمی مالیاتی فنڈ نے 9 ارب ڈالرز کے مزید قرضے منظور کر دیے اور اس شرط پر سال بھر کے دوران میں چند قسطوں پر مشتمل مزید 5 ارب ڈالرز کا وعدہ بھی کیا کہ ترکیہ اپنی اقتصادی اصطلاحات ان کے مشوروں کی روشنی میں مرتب کرے گا۔

تاہم حکومتی اتحاد میں کشیدگی چلتی رہی۔ عالمی مالیاتی فنڈ (آئی ایم ایف) کی شرائط (بالخصوص سرکاری اداروں کی نجکاری) اور سیاسی اصطلاحات کی سست روی تنازعات کی بڑی وجوہ تھیں۔ مئی 2002ء میں خرابی صحت کے آثار سامنے آنا شروع ہونے کے باوجود بلند ایجوت کے مستعفی نہ ہونے کے باعث وزیر اعظم کی اپنی جمہوری بائیں پارٹی کے 60 ارکان اسمبلی، نائب وزیر اعظم اور وزیر خزانہ سمیت کئی وزراء نے بھی استعفے دے دیے۔

ان استعفوں کے ساتھ ساتھ حزب اختلاف کی دونوں جماعتوں اور حکومتی اتحاد میں شامل دیگر جماعتوں کی طرف سے دباؤ کے نتیجے میں ترک پارلیمان کو مقررہ وقت سے 18 ماہ قبل 3 نومبر 2002ء کو نئے انتخابات کرانے کا فیصلہ کرنا پڑا۔

 
موجودہ ترک صدر رجب طیب اردوغان

ان مالیاتی گھپلوں، نظم و نسق میں کمزوری اور بد عنوانی کے باعث سیکولر طبقوں کی ساکھ شدید متاثر ہوئی۔ ان کے مقابلے میں مقامی بلدیاتی انتخابات میں فتوحات حاصل کرنے والی اسلام پسند قوتیں انتہائی ایمانداری کے ساتھ اپنا کام کر رہی تھیں۔ یہی وجہ ہے کہ رفاہ پارٹی کے بعد ان سے نکلنے والا ایک دھڑا عدالت و ترقی پارٹی نمایاں ہو کر سامنے آیا اور اس نے مسلسل دو انتخابات جیت کر اب تک دائیں بازوں کی سب سے بھرپور قوت کے طور پر ابھری ہے۔ 2002ء اور 2007ء کے انتخابات میں کامیابی حاصل کرنے والی عدالت و ترقی پارٹی نے آخری انتخابات میں سادہ اکثریت حاصل کر لی۔ اِس وقت رجب طیب اردوغان صدر ہیں، جن کی بیگم امینہ ایردوان سر ڈھانپتی ہیں۔

2002ء کے انتخابات کے موقع پر انصاف و ترقی پارٹی کے سربراہ رجب طیب اردوغان کو 1998ء میں اپنی کسی تقریر میں اسلام کے حق میں کلمات ادا کرنے کے باعث انتخابات و وزارت عظمی کے لیے نااہل قرار دیا گیا نتیجتا ان کی جگہ ان کے نائب عبداللہ گل وزیر اعظم بنائے گئے تاہم بعد میں ایک آئینی ترمیم کے ذریعے اس پابندی اور اس کی وجہ سے ہونے والی سزا کو ختم کر دیا گیا۔ 9 مارچ کو ایک ضمنی انتخاب کے ذریعے اردوغان پارلیمنٹ کے رکن منتخب ہوئے اور ان کو حکومت میں لانے کی خاطر عبد اللہ گل وزارت عظمی سے دستبردار ہو گئے۔ انھیں بعد ازاں پہلے دور میں وزیر خارجہ اور دوسرے دور حکومت میں صدر جمہوریہ کا عہدہ دیا گیا۔

انصاف و ترقی پارٹی کے پہلے دور اقتدار میں جنگ عراق شروع ہو گئی۔ پارلیمان نے امریکا کے اتحادی ممالک کی افواج کے دستوں کو ترکیہ سے گذرنے کی اجازت نہیں دی البتہ اپنے دستے بھیجنے کی منظوری دے دی لیکن امریکا اور ترکیہ بعد میں اس بات پر متفق ہو گئے کہ ترکیہ کی اس پیشکش سے فائدہ نہیں اٹھایا جائے گا۔

انصاف و ترقی پارٹی کے سیاسی مقاصد کی فہرست میں عراق، کردستان، یورپی اتحاد کی رکنیت، مسئلہ قبرص اور معیشت کی بہتری زیادہ نمایاں نکات ہیں۔

مارچ 2004ء میں انصاف و ترقی پارٹی نے بلدیاتی انتخابات میں 42 فیصد ووٹ حاصل کرکے اپنی پوزیشن مستحکم کرلی۔

نومبر 2007ء میں ہونے والے دوسرے انتخابات میں انصاف و ترقی پارٹی نے سادہ ترین اکثریت حاصل کر لی اور بغیر کسی جماعت سے اتحاد کے حکومت قائم کرنے میں کامیاب ہو گئی۔ اس دور میں سابق وزیر خارجہ عبد اللہ گل کو صدارت کا عہدہ دیا گیا۔

اگست 2014ء سے رجب طیب اردوغان ترکیہ کے 12ویں صدرکی حیثیت سے خدمات سر انجام دے رہے ہیں۔

بین الاقوامی تعلقات ترمیم

مسئلہ قبرص ترمیم

قبرص کے سیاسی حالات کے باعث 1950ء کے عشرے کے وسط سے ترکیہ اور یونان کے تعلقات میں کشیدگی چلی آرہی ہے۔ 1960ء میں قبرص کی آزادی کے بعد یہ کشیدگی اتنی بڑھ گئی کہ دسمبر 1963ء میں وہاں سنگین نوعیت کے مسیحی مسلم فسادات پھوٹ پڑے۔ یہ فسادات 1974ء تک جاری رہے۔ ترک قبرصی 1964ء میں اقوام متحدہ کی پناہ گاہوں میں چھپنے پر مجبور ہو گئی۔ یونان میں اقتدار پر قابض فوج کی پشت پناہی کے ساتھ انتہا پسندوں کے ہاتھوں جولائی 1974ء میں قبرص کے منتخب صدر کا تختہ الٹے جانے کے بعد ترکیہ نے قبرص میں اپنی فوجیں اتار دیں۔ اس کے بعد سے پورا جزیرہ عملا کسی ایک حکومت کے زیر نگیں نہیں ہے۔ نصف جزیرہ ترک جمہوریہ شمالی قبرص اور نصف یونان نواز جمہوریہ قبرص کہلاتا ہے۔

منصفانہ، دیرپا اور ہمہ گیر سمجھوتے کی تلاش میں 1974ء کے بعد سے اقوام متحدہ کی زیر نگرانی مذاکرات کی کئی کوششیں کی جاچکی ہیں تاہم یہ مقصد تاحال حاصل نہیں کیا جاس کا۔ مسئلہ قبرص کے حل کی تلاش میں اقوام متحدہ کی نگرانی کی آخری کوشش 24 اپریل 2004ء کو ختم ہو گئی۔ جس کے مطابق اقوام متحدہ جزیرے پر استصواب کروانا چاہتا تھا۔ اس پر جزیرے کے دونوں حصوں میں بیک وقت استصواب کروایا گیا۔ یونانی قبرصیوں نے اس منصوبے کے خلاف اور ترک قبرصیوں نے اس کے حق میں ووٹ دیے۔ نتیجتا یکم مئی کو یورپی اتحاد نے قبرص کو منقسم حالت میں ہی اپنا رکن بنالیا۔ جزیرے کا شمالی یعنی ترک حصہ یورپی اتحاد کا رکن نہیں۔

یونان سے تعلقات ترمیم

طویل جدوجہد کے بعد 1830ء میں سلطنت عثمانیہ سے آزاد ہونے والے یونان اور عثمانی حکومتوں کے درمیان میں تعلقات ہمیشہ تناؤ رہا لیکن 1950ء کے عشرے کے وسط میں قبرص کے مستقبل کے سوال پر بین الاقوامی تنازع کھڑے ہونے تک یونان اور جمہوریہ ترکیہ کے تعلقات ہمیشہ دوستانہ رہے۔ قبرص کے سوال پر جاری اختلاف کے علاوہ بھی ترکیہ اور یونان کے تعلقات بحیرہ ایجین کی خود مختاری کے حوالے سے بھی کئی امور پر الجھے رہے۔

لیکن 1999ء میں ترکیہ اور یونان میں آنے والے زلزلے نے دونوں ملکوں کو ایک دوسرے کی جانب دوستی کا ہاتھ بڑھانے میں مدد فراہم کی۔ یونان اور ترکیہ کے تعلقات میں بہتری دسمبر 1999ء میں ہیلسنکی میں ہونے والے یورپی مجلس کے اجلاس میں یورپی اتحاد کی رکنیت کے بارے میں ترکیہ کی درخواست پر ہمدردانہ غور کے لیے آمادہ کرنے کی ایک بڑی وجہ تھی۔ اس سے ترکیہ کے یورپی اتحاد اور یونان کے ساتھ تعلقات کی ایک نئی بنیاد فراہم ہو گئی۔ یورپی یونین کی رکنیت کے سوال پر یونان اب ترکیہ کی حمایت کررہا ہے۔

یورپ کے ساتھ تعلقات ترمیم

ترکیہ دوسرا ملک ہے جس نے 1963ء میں یورپی اتحاد بنانے سے متعلق معاہدے پر دستخط کیے تھے۔ اس کی بنیاد پر یورپی مجلس اور ترکیہ کی کسٹم یونین بنی۔ پھر دونوں کے درمیان میں کسٹم قوانین اور ضوابط سے متعلق ایک معاہدہ ہوا جو بالآخر یکم جنوری 1996ء کو نافذ کر دیا گیا۔ اس معاہدے میں بھی آخر کار ترکیہ کے یورپی مجلس کا رکن بننے کی گنجائش رکھی گئی تھی۔ اس کے لیے ترکیہ نے 1987ء میں رسمی درخواست دی۔ 1989ء میں یورپی کمیشن نے یہ درخواست نہ ماننے کا فیصلہ دیتے ہوئے کہا کہ ترکیہ میں ابھی مزید سیاسی اور اقتصادی اصطلاحات کی ضرورت ہے۔

اکتوبر 2005ء میں یورپی اتحاد نے ترکیہ کو اتحاد کی مکمل رکنیت کا امیدوار قرار دیا۔

پاکستان سے تعلقات ترمیم

ترکیہ پاکستان کے ساتھ دوطرفہ تجارت کا ہدف پانچ ارب ڈالر سالانہ تک لے جانا چاہتا ہے جبکہ دونوں ممالک کے درمیان میں 2009میں صرف 782ملین ڈالر کی دوطرفہ تجارت ہوئی جو دونوں کی صلاحیت سے بہت کم ہے۔ پاک ترک بزنس کونسل پاکستان اور ترکیہ کے درمیان میں باہمی تجارت کو 2012تک 2ارب ڈالر تک لے جانے کا ہدف مقرر کیا ہوا ہے لیکن ترکیہ کی خواہش ہے کہ دونوں کے درمیان میں تجارتی ہدف کو بڑھا کر چار یا پانچ ارب ڈالر سالا نہ تک لے جایا جائے جس کے لیے دونوں ممالک کو کوششیں تیز کرنا ہوں گی۔ ترکیہ میں پاکستان کے تونائی کے شعبے میں سرمایہ کاری کرنے کے بارے میں گہری دلچسپی پائی جاتی ہے۔ ترکیہ کی ایک کمپنی نے پہلے ہی سندھ میں ہوا کے ذریعے بجلی پیدا کرنے کے لیے ایک ونڈ مل یونٹ لگا رکھا ہے جبکہ کچھ کمپنیاں پاکستان میں ہائیڈرو پاور کی صلاحیت کا بھی جائزہ لے رہی ہیں تا کہ وہ پاکستان سے پانی سے بجلی پیدا کرنے کے لیے سرمایہ کاری کر سکیں۔ ترکیہ نے اسلام آباد چیمبر کے ایگزیکٹیو ارکان کو پانچ سال تک کا ملٹیپل ویزا دینے کا بھی اعلان کیا جن کے پاس ایسے ویزے کے لیے پاسپورٹ موجود ہوں تا کہ وہ ترکیہ میں جب چاہیں آسانی کے ساتھ جا کر وہاں کاروبار کے مزید مواقع تلاش کر سکیں۔پاکستان اور ترکیہ بہت سے شعبوں میں ایک دوسرے کی مدد کر سکتے ہیں۔

حکومت ترمیم

ترکیہ کا حکومتی نظام پارلیمانی جمہوری ہے جس میں حکومت کا سربراہ وزیر اعظم ہوتا ہے۔ انتظامی اختیارات حکومت اور قانونی اختیارات حکومت و قومی مجلس کے پاس ہیں۔

سربراہ مملکت کے فرائض صدر جمہوریہ (جمہور بشکانی) انجام دیتا ہے۔ صدر کو قومی مجلس سات سال کے لیے منتخب کر تی ہے تاہم اس کا مجلس کا رکن ہونا ضروری نہیں ہے۔ موجودہ صدر عبد اللہ گل ہیں جنہیں 28 اگست 2007ء کو منتخب کیا گیا۔ انتظامی اختیارات وزیر اعظم (بش بکان) اور وزراء کی مجلس (بکان لر کورولو) کے ہاتھ میں ہوتے ہیں۔

وزیر اعظم کا انتخاب مجلس میں اراکین کے اظہار اعتماد کی رائے (Vote of confidence) پر ہوتا ہے اور عموماً انتخابات میں جیتنے والی جماعت کا سربراہ ہوتا ہے۔ موجودہ وزیر اعظم رجب طیب اردوغان ہیں جو مسلسل دوسری بار وزیر اعظم بنے ہیں۔ ان کی جماعت نے 2002ء اور 2007ء کے عام انتخابات میں کامیابی حاصل کی تھ۔۔

ترکیہ کی مجلس ترکیہ بیوک ملت مجلسی کہلاتی ہے جس کے اراکین کی تعداد 550 ہ، جو انتخابات میں کم از کم 10 فیصد ووٹ حاصل کرنے والی جماعت میں متناسب طور پر تقسیم کی جاتی ہیں۔ ہر رکن 5 سال کے لیے منتخب کیا جاتا ہے۔ ترکیہ کے 85 انتخابی اضلاع ہیں جو ملک کے 81 انتظامی صوبوں کی نمائندگی کرتے ہیں (استنبول تین اور انقرہ و ازمیر اپنی بڑی آبادیوں کے باعث دو انتخابی اضلاع میں تقسیم کیے گئے ہیں)۔ معلق پارلیمان کی تشکیل کو روکنے کے لیے پارلیمان میں صرف انہی جماعتوں کو نمائندگی دی جاتی ہے جو کم از کم 10 فیصد قومی ووٹ حاصل کریں۔ آزاد امیدوار بھی انتخابات میں حصہ لے سکتے ہیں، لیکن ان کے لیے اپنے انتخابی ضلع میں کم از کم 10 فیصد ووٹ حاصل کرنا ضروری ہیں۔ لادینیت کی مخالف یا علیحدگی پسند سیاسی جماعتوں کو معطل یا پابندی کا نشانہ بنا دیا جاتا ہے۔ ترکیہ ایک کثیر الجماعتی نظام کا حامل ہے، جس میں دائیں و بائیں بازو کی متعدد اہم سیاسی جماعتیں موجود ہیں۔

مسلح افواج ترمیم

مسلح افواج روایتی طور پر ایک مضبوط سیاسی قوت ہیں جنہیں اتاترک کی جمہوریہ کا محافظ سمجھا جاتا ہے۔ ترک آئین اور ملکی سالمیت کا تحفظ قانوناً مسلح افواج کو تفویض کیا گیا ہے جو قومی سلامتی مجلس کے ذریعے باضابطہ اپنا سیاسی کردار ادا کرتی ہے۔ لادینیت، جمہوریت اور اتاترک کی اصلاحات کی حفاظت فوج کا نصب العین ہے۔ یہی وجہ ہے کہ 1960ء، 1980ء اور 1997ء میں تین مرتبہ فوج نے حکومتوں کا تختہ الٹا ہے۔ ان میں سے 1960ء میں عدنان میندریس اور 1997ء میں نجم الدین اربکان کی اسلام پسند حکومتوں کو ٹھکانے لگایا گیا۔ عدنان میندریس کو سزائے موت اور نجم الدین اربکان کو تاحیات سیاست پر پابندی کا سامنا کرنا پڑا۔

انتظامی تقسیم ترمیم

ترکیہ 81 صوبوں (ایلر، واحد ایل) میں تقسیم ہے اور ہر صوبہ مزید چھوٹی اکائی اضلاع (الچہ لر، واحد: الچہ) میں تقسیم ہے۔ عام طور پر صوبہ اپنے صوبائی دار الحکومت کے نام پر ہی ہوتا ہے۔ بڑے صوبوں میں صوبہ استنبول، صوبہ انقرہ، صوبہ ازمیر، صوبہ بورصہ، صوبہ قونیہ اور صوبہ ادانا شامل ہیں۔ صوبہ اردو بھی ترکیہ کا ایک صوبہ ہے۔

شہر ترمیم

ترکیہ کا دارالحکومت انقرہ ہے لیکن تاریخی دار الحکومت استنبول بدستور ملک کا مالیاتی، اقتصادی و ثقافتی مرکز ہے۔ دیگر اہم شہروں میں کاستامانو ازمیر، بورصہ، ادانا، طرابزون، غازی عنتب، ارض روم، قیصری، ازمیت، قونیہ، مرسین، اس کی شہر، دیار باکر، انطالیا اور سامسون شامل ہیں۔ ملک کی 68 فیصد آبادی شہروں میں قیام پزیر ہے۔ مجموعی طور پر ملک میں 5 لاکھ سے زائد آبادی کے 12 اور ایک لاکھ سے زائد آبادی کے 48 شہر ہیں۔

بڑے شہر ترمیم

ترکیہ کے بڑے صوبے بلحاظ آبادی
درجہ مرکزی شہر صوبہ آبادی درجہ مرکزی شہر صوبہ آبادی

 
استنبول

انقرہ

ازمیر

1 استنبول استنبول 12,573,836 11 دیار بکر دیار بکر 1,460,714
2 انقرہ انقرہ 4,466,756 12 ازمیت خوجا لی 1,437,926
3 ازمیر ازمیر 3,739,353 13 انطاکیہ حطائے 1,386,224
4 بورصہ بورصہ 2,439,876 14 منیسا منیسا 1,319,920
5 ادانا ادانا 2,006,650 15 سامسون سامسون 1,228,959
6 قونیہ قونیہ 1,959,082 16 قیصری قیصری 1,165,088
7 انطالیہ انطالیہ 1,789,295 17 بالیکیسر بالیکیسر 1,118,313
8 مرسین مرسین 1,595,938 18 قہرمان مارش قہرمان مارش 1,004,414
9 غازی عنتب غازی عنتب 1,560,023 19 وان وان 979,671
10 شانلی اورفا شانلی اورفا 1,523,099 20 آیدن آیدن 946,971
آبادی بمطابق مردم شماری 2007ء[7]


جغرافیہ ترمیم

ترکیہ ایک بین البر اعظمی ملک ہے تاہم اس کا بیشتر حصہ ایشیا میں واقع ہے۔ ملک کا کل رقبع 814،578 مربع کلومیٹر (314،510 مربع میل) ہے جس میں سے 790،200 مربع کلومیٹر (305،098 مربع میل) مغربی ایشیا میں جزیرہ نما اناضول (ایشیائے کوچک) پر مشتمل ہے اور بقیہ 3 فیصد یعنی 24،378 مربع کلومیٹر (9،412 مربع میل) یورپ میں واقع ہے۔ ترکیہ کی زمینی سرحد 2573 کلومیٹر (1599 میل) اور ساحلی سرحد 8333 کلومیٹر (5178 میل) ہے۔ ترکیہ اپنے رقبے کے اعتبار سے دنیا کا 37 واں سب سے بڑا ملک ہے۔

ترکیہ کو جغرافیائی طور پر عموماً سات حصوں میں تقسیم کیا جاتا ہے: مرمرہ، ایجین، بحیرہ روم، وسطی اناضول، مشرقی اناضول، جنوب مشرقی اناضول اور بحیرہ اسود کا علاقہ۔

ترکیہ یورپ اور ایشیا کے درمیان میں ایک پل کی حیثیت سے قائم ہے اور دونوں براعظموں کے درمیان یہ تقسیم بحیرہ اسود سے آبنائے باسفورس، بحیرہ مرمرہ اور دردانیال سے ہوتی ہوئی بحیرہ ایجین تک جاتی ہے۔ جزیرہ نما اناضول (جسے انگریزی ہجوں کے باعث اردو میں اناطولیہ کہا جاتا ہے) تنگ ساحلی پٹیوں اور وسط میں وسیع سطح مرتفع پر مشتمل ہے۔ اس سطح مرتفع کے شمال میں بحیرہ اسود کے پہاڑی سلسلے اور جنوب میں کوہ طوروس واقع ہے۔ مشرق میں پہاڑی سلسلے مزید بلند ہیں جو دریائے فرات و دجلہ جیسے اہم دریاؤں کا منبع ہیں۔ اس کے علاوہ ترکیہ کی سب سے بڑی جھیل وان اور سب سے بلند پہاڑ کوہ ارارات (بلندی 5137 م) بھی مشرقی علاقوں میں واقع ہیں۔

ترکیہ کا یہ متنوع جغرافیہ دراصل زمین کی پرتوں کی حرکت کا نتیجہ ہے جو ہزاروں سالوں میں اس خطے کو یہ شکل دی ہے اور اب بھی یہاں کا علاقہ زلزلوں کا سامنا کرتا رہتا ہے۔ باسفورس اور دردانیال بھی دراصل انہی پرتوں کی حرکت کا نتیجہ ہے۔

ترکیہ کا موسم بحیرہ روم کے روایتی موسم جیسا ہے جہاں گرم و خشک موسم گرما اور سرد و نم موسم سرما ہوتا ہے تاہم یہ موسم زیادہ بنجر علاقوں میں اور زیادہ سخت ہو جاتا ہے۔ ترکیہ کے مشرق کے پہاڑی علاقوں میں موسم سرما میں درجہ حرارت منفی 30 سے منفی 40 درجہ سینٹی گریڈ تک پہنچ جاتا ہے۔۔ مغرب میں موسم سرما کا درجہ حرارت اوسط 1 درجہ سینٹی گریڈ رہتا ہے۔ موسم گرما گرم اور خشک رہتا ہے جب درجہ حرارت 30 درجہ سینٹی گریڈ سے اوپر ہی رہتاہے۔ سالانہ بارشوں کا تناسب 400 م م ہے۔ ملک کا خشک ترین حصہ قونیہ اور ملاطیہ کی سطح مرتفع ہیں، جہاں سالانہ بارش 300 م م سے بھی کم ہوتی ہے۔ مئی سال کا نم ترین مہینہ اور جولائی و اگست خشک ترین مہینے ہیں۔

مزید دیکھیے ترمیم

حکومت عظیم قومی ایوان

حوالہ جات ترمیم

  1.     "صفحہ ترکیہ في خريطة الشارع المفتوحة"۔ OpenStreetMap۔ اخذ شدہ بتاریخ 17 مارچ 2024ء 
  2. Brockhaus Enzyklopädie online ID: https://brockhaus.de/ecs/enzy/article/turkei — اخذ شدہ بتاریخ: 31 مئی 2021
  3. باب: 3
  4. https://global.tbmm.gov.tr/index.php/EN/yd/
  5. http://chartsbin.com/view/edr
  6. https://www.mistikalem.com/bilim/teknoloji/turkiyenin-uluslararasi-telefon-kodu-neden-36-iken-90-oldu-haberi-16868
  7. "REPUBLIC OF TURKEY, PRIME MINISTRY TURKISH STATISTICAL INSTITUTE (TURKSTAT):"۔ 25 اگست 2009 میں اصل سے آرکائیو شدہ۔ اخذ شدہ بتاریخ 11 نومبر 2009