صارف:AbdurRahman299/تختہ مشق/کامیاب زندگی (کتاب)

AbdurRahman299/تختہ مشق/کامیاب زندگی

سرورق کامیاب زندگی (دورِ نوبلوغت کے سوالات)
مصنف	عبدالستار منہاجین
ملک	پاکستان
زبان	اردو
موضوع	فلسفۂ موت و حیات، اخلاق و آداب، شرم و حیاء اور جنسی تعلیم
تاریخ اشاعت	19 فروری 2023ء
طرز طباعت	لطیف اور کثیف جلد
صفحات	312

’’کامیاب زندگی‘‘ اپنی نوعیت کی منفرد کتاب ہے۔ دورِ نَوبلوغت کے سوالات پر مبنی اِس کتاب میں فکری و نظریاتی اِصلاح اور اِسلامی عقائد میں پختگی کیلئے اِنتہائی آسان انداز میں سائنسی و عقلی دلائل کے ساتھ مستشرقین کے اِعتراضات اور غلط فہمیوں کا اِزالہ پیش کیا گیا ہے۔ یہ کتاب زندگی اور موت کے بارے میں بنیادی تصورات یوں واضح کرتی ہے کہ قاری نئی دنیا میں کھو جاتا ہے۔ بالخصوص پہلے باب کا ایک ہی نشست میں مکمل مطالعہ کرنے والے قارئین اِس کتاب کے سحر سے نہیں نکل پاتے۔ اِس کتاب کے مطالعہ سے قرآن مجید کو ترجمہ کے ساتھ پڑھنے کی ترغیب ملتی ہے۔ زبانی یاد کرنے کیلئے چھوٹی چھوٹی سیکڑوں آیات و احادیث بھی دی گئی ہیں۔ جسمانی پاکیزگی کیلیے وضو اور غسل جیسے بنیادی فقہی اَحکام کے ساتھ ساتھ روحانی پاکیزگی کیلیے ایمان اور اَخلاق و آداب سے متعلقہ ابواب میں بچوں کیلئے بہترین تربیتی مواد موجود ہے۔

نسلِ نَو کو اَخلاقی بے راہروی سے بچانے کیلئے اِسلامی تعلیمات کی روشنی میں بنیادی جنسی تعلیم اور بچوں کو اِستحصال سے بچانے کیلئے عملی تربیت پر مشتمل مواد اس کتاب کا خاص حصہ ہے۔ آخری باب میں بچوں کی دلچسپی کیلئے سبق آموز قرآنی واقعات بھی پیش کئے گئے ہیں۔

تبویب

کتاب پانچ ابواب پر مشتمل ہے، جن کی تفصیل اِختصار کے ساتھ درج ذیل ہے:

باب اول: زندگی اور موت

پہلے باب کا خلاصہ یہ ہے کہ انسان کا اصل وطن جنت ہے اور موت اُسی اصل وطن کی طرف کھلنے والا دروازہ ہے، جس سے گزر کر مسلمان واپس اپنے اصل وطن کو لوٹتا ہے۔ اس باب میں مصنف نے دنیا کے فریبِ نظر ہونے پر دلائل دیتے ہوئے اسلامی تعلیمات کے مطابق فلسفۂ موت و حیات پیش کیا ہے۔ نیز اس باب میں کامیابی کا راز، کون سا علم حاصل کریں، کون سا پیشہ اپنائیں، وقت کی قدروقیمت، صبح خیزی، وہم کا علاج، مایوسی سے نجات، محنت میں عظمت اور روزِ قیامت ہاتھ پاؤں کی گواہی جیسے موضوعات بھی شامل ہیں۔

باب دوم: جسمانی پاکیزگی

دوسرے باب میں طہارت اور جسمانی پاکیزگی کے اُس معیار کا بیان ہے جو اصل وطن یعنی جنت میں داخلے کیلئے ضروری ہے۔ جسمانی نجاستیں اور جسمانی پاکیزگی کے حصول کے طریقے، یعنی وضو، غسل اور تیمم کے فقہی مسائل بھی شامل کئے گئے ہیں۔

باب سوم: روحانی پاکیزگی

تیسرے باب میں ایمان، آداب اور اخلاق کے اُس اعلیٰ معیار کا بیان ہے جو اصل وطن یعنی جنت میں داخلے کیلئے درکار ہے۔ ایمان والے حصے میں ایمان باللہ، ایمان بالملائکہ، ایمان بالرسالت، ایمان بالکتب، ایمان بالآخرت، ایمان بالقدر اور ختم نبوت جیسے موضوعات شامل ہیں۔ جبکہ آداب والے حصے میں نعمتوں کے آداب، جسم کے آداب، کھانے پینے کے آداب، لباس کے آداب، سونے کے آداب، واش روم کے آداب، والدین کے آداب، بہن بھائیوں کے آداب، راستے کے آداب اور عمومی معاشرتی آداب شامل ہیں۔ اسی طرح اخلاقِ حسنہ والے حصے میں 92 قسم کے مختلف اخلاق شامل کئے گئے ہیں۔

باب چہارم: شرم و حیاء

چوتھے باب میں شرم و حیاء کے اِسلامی اُصولوں کو بڑے سادہ اور دلنشیں انداز میں بیان کرتے ہوئے شرم وحیاء سے وابستہ اُس خودساختہ تصور کا قلع قمع کیا گیا ہے جس کے سبب والدین اپنی اولاد کی تربیت میں کوتاہی کے مرتکب ہوتے ہیں۔ اس باب میں پردہ، بدنظری، اختلاطِ مردوزن، تنہائی میں ملاقاتیں، ہم جنس پرستی، خود لذتی، آثارِ بلوغت، شادی کیوں کی جائے، شادی کب کی جائے، شادی کس کے ساتھ کی جائے، پسند کی شادی کیسے کی جائے، بےحیائی اور مغربی تہذیب، حقوق نسواں کے حوالے سے غلط فمہیوں کا ازالہ، اسلام میں چار شادیاں کیوں اور اللہ رب العزت کے نزدیک نسب کی اہمیت جیسے موضوعات شامل ہیں۔ نیز اس کا ایک حصہ بچوں کو اِستحصال سے بچانے کیلئے مختص ہے، جس میں خطرناک حالات میں اپنا دفاع، غیرمتوقع حالات کا مقابلہ، خوداعتمادی، مسائل پر قابو پانا، احساس کمتری پر قابو پانا، دوسروں سے رابطہ رکھنا، حاضر دماغی اور بیدار مغزی، مضبوط قوتِ ارادی اور پراُمید رہنے جیسے موضوعات شامل ہیں۔ اس باب میں ہر قسم کے حالات میں والدین کو اپنا محرمِ راز بنانے کے ساتھ ساتھ سوشل میڈیا پر ضروری احتیاطیں بھی شامل کی گئی ہیں۔

باب پنجم: سبق آموز واقعات

پانچویں باب میں انبیاء اور صلحاء کے واقعات بیان کرتے ہوئے ان میں شامل تربیتی پہلوؤں کو شامل کیا گیا ہے۔ اس باب میں قصۂ سیدنا آدمؑ و حواؑ، قصۂ سیدنا یوسفؑ و زلیخاؑ، قصۂ یوسف میں اللہ رب العزت کی حکمتیں، قصۂ سیدہ مریمؑ اور قصہ سیدنا لوطؑ شامل ہیں۔

ضمیمہ

کتاب کے آخر میں شامل کئے گئے ضمیمہ میں والدین کیلئے عمر کے مختلف ادوار میں اپنے بچوں کی تربیت کے حوالے سے کچھ رہنماء اُصول بھی پیش کئے گئے ہیں۔

حوالہ جات

زمرہ:اسلامی کتب زمرہ:اسلام سے متعلق کتابیں زمرہ:منہاج القرآن