فرہنگ اصطلاحات طب یونانی

طب یونانی اصطلاحات کی فرہنگ دراصل طب یونانی اور اس کی ذیلی شاخوں اور متعلقہ شعبہ جات کی تعریفوں کی ایک فہرست ہے۔

ا

• اکسیر:۔ اکسیر اس دوا کو کہتے ہیں جو نہ صرف فوراً خون میں جذب ہو کر اپنا اثر شروع کر دے بلکہ ایک مدت تک اپنے شفائی اثر جسم میں قائم رکھے۔

ایسی ادویات کی ضرورت اس وقت ہوتی ہے جب کوئی مرض مستقل یا دائمی صورت اختیار کرجائے۔ مثلاً شوگر، دائمی قبض، چھپاکی، سوزاک، خارش اور چنبل وغیرہ ایسی علامات اس وقت ظاہر ہرتی ہیں جب کوئی خلط خون میں جمع ہوجائے اور پھر تکلیف کا سبب بن جائے۔

• اطریفل: (انگریزی:Triphala) یونانی زبان کے لفظ اطریفال اور طریفلن سے معرب کیا گیا ہے ۔ چونکہ اِس مرکب میں ہلیلہ، بلیلہ اور آملہ جز و لازم کے طور پر شامل ہیں ۔ لہٰذا اِس کو اطریفل کا نام دیا گیا۔ بعض اطِبَّاء کی رائے ہے کہ اطریفل ہندی زبان کے لفظ ترپھلہ کا معرّب ہے جس سے تین پھل ہلیلہ، بلیلہ اور آملہ مراد ہیں چنانچہ داؤد ضریر انطاکی کے یہاں اِس کی وضاحت بھی ملتی ہے ۔ اُس نے اِس کو ’’اطریفال‘‘ لکھا ہے۔ ہندی کا لفظ تری اور لاطینی و یونانی زبان کا لفظ طری (Tri ) بھی تین کے ہیں.
• اثاناسیا اثاناسیا یونانی زبان کا لفظ ہے۔ اِس کے دو معانی بیان کیے جاتے ہیں ۔

(1) مرض سے چھٹکارا دِلانے والا (2) بھیڑئے کا جگر ۔ چونکہ اِس نسخہ میں بھیڑیئے کا جگر اور بکری کا سینگ بطور اجزاء شامل ہیں ۔ اِس لیے اِس کو ’’دواء الذئب و الماعز‘‘ بھی کہتے ہیں۔اِس کے دو نسخے ہیں : ’’اثاناسیائے کبیر‘‘ اور’’ اثاناسیائے صغیر‘‘۔

• اثیر: طبّی نظریہ کے مطابق اثیر ایسے مادّہ کو کہتے ہیں جو دانتوں کی جڑوں میں ڈالا جائے یا وہ دواء جو حلق یا خلائے دہن میں پھونکی جائے ، اِس کا تعلق وجورات سے ہے، وجور حلق میں ڈالی جانے والی دوا کو کہتے ہیں ۔

[[طبیب|اطِبّاء نے اثیر کی یہ تعریف کی ہے کہ یہ ایک بے رنگ خوشبو دار سیال ہے جو بطور محلل و مخدر مستعمل ہے۔

اثیر کا استعمال سب سے پہلے دانتوں کی جڑوں اور خلاؤں (cavities) میں ڈالنے کے لیے ہی کیا گیا تھا۔ یہ Oral Route سے استعمال ہونے والی قدیم ترین دواء ہے۔

• انفحہ: دودھ پینے والے جانوروں کے معدہ اور آنتوں سے حاصل شدہ منجمد دودھ، جس کو پیدا ہونے کے بعد کسی جانور کے بچے نے پہلی دفعہ پیا ہو، اُس کو حاصل کر لیا جاتا ہے۔یہی پنیر مایہ ہے۔ اِس کو پنیر مایہ اور انفحہ بھی کہتے ہیں۔ جن جانوروں کے دودھ سے پنیر مایہ حاصل کیا جاتا ہے ، اُن میں سے چند یہ ہیں : بارہ سنگھا، بکری، بھیڑ، بھینس، پاڑہ، خرگوش، ریچھ ، شتر خر مادہ، گورخر، گائے، گھوڑی، نیل گائے اور ہرن وغیرہ۔
• انوشدارو:انوشدارو یا نوشدارو فارسی زبان کا لفظ ہے، جس کا معنی ’’دوائے ہاضم‘‘ ہے۔ یہ معجون کی قسم کا مرکب ہے جس کا جزءِ خاص آملہ ہے۔اِس کا معنی ’’بے ذائقہ‘‘ بھی بیان کیا گیا ہے۔ بعض محققین نے لکھا ہے کہ لفظ ’’نوش‘‘ ہلیلہ ، بلیلہ ، []آملہ]] ، خبث الحدید اور شہد کے لیے وضع کیا گیا ہے ، چنانچہ اِسی لیے اِس پانچ اجزاء کے مرکب کو ’فنجنوش‘ بھی کہا جاتا ہے۔ چونکہ اِس معجون کا جزءِ خاص آملہ ہے اِس لیے اِس کا نام انوشدارو رکھا گیا ہے۔

انوشدارو ایک ہندی ترکیب ہے۔ یونانی عہد میں اِس کا استعمال نہیں ملتا ،البتہ عرب اطِبّاء میں سب سے پہلے ابو یوسف یعقوب ابن اسحا‍ق الکندی نے اِس کا نسخہ لکھا ہے۔ اِس لیے نوشدارو کو جوارش کندی کے نام سے بھی جانا جاتا ہے۔

• ایارج: ایارج یونانی زبان کے لفظ ’’ایارہ‘‘ کا معرب ہے جس کا معنی دوائے الٰہی ، دوائے شریف اور مصلح بیان کیا گیا ہے، مگر اکثر محققین کے نزدیک ایارج ، دواء مسہل کو کہتے ہیں کیونکہ ایارج ہی مسہلات میں پہلا مرکب ہے جسے اہلِ یونان نے اسہال بلغم اور تنقیہ دماغ کے لیے مرتب کیا تھا۔ اسہال و اخراج بلغم میں ایارج تریاقی افادیت رکھتا ہے۔

ایارجات میں ایارج فیقرا کے علاوہ ایارج بقراط، ایارج جالینوس ، ایارج لوغاذیہ، ایارج روفس اور ایارج ارکاغانیس مشہور ہیں۔

• انقردیا: (Anacardium) رومی زبان کا لفظ ہے۔ جس کے معنی ’’شبیہ قلب‘‘ کے ہیں۔ چونکہ بلا در صنوبری یعنی دِل کی شکل کا ہوتا ہے اور وہ اِس کی ترکیب میں داخل ہے، اِس لیے اِس کو انقردیا کہا گیا ہے۔ متاخرین کی بعض کتابوں میں انقرویا ’’واو‘‘ سے لکھا گیا ہے جو صحیح نہیں ہے۔اِس مرکب کا موجد بقراط ہے۔

ت

• تریاق:۔ اس دوا کو کہتے ہیں جو کسی زہر کو باطل کر دے یا پہلی حالت کو یک دم نئی حالت میں تبدیل کر دے ۔ ایلوپیتھی اور ہومیو پیتھی میں اسے اینٹی ڈوٹ کہتے ہیں۔ مثلاً کھار (الکلی) کے مقابلہ میں ترشی (ایسڈ) ہے۔ اسی طرح افیون کے زہر کو کچلہ زائل کردیتا ہے۔ تریاق قسم کی ادیات کی ضرورت اس وقت پڑتی ہے جب کسی زہر سے یا کسی عضو میں ہونے والی مشینی تحریک سے موت واقع ہونے کا خطرہ ہو۔ مثلاً ہیضہ، نمونیا، سرسام اور خونی قے وغیرہ۔

ش

• شدید: محرک سے ذرا تیز اثر رکھنے والی ادویات کو شدید کہتے ہیں

ف

فلونیا رومی زبان کا لفظ ہے۔ اِس کو افلونیا بھی کہتے ہیں۔ یہ حکیم افلن رومی طرسوسی کے نام سے منسوب ہے۔ اِس حکیم کو فیلن اور افلن بھی کہا جاتا ہے۔ افلن نامی حکیم نے اِسے اوّلاً ترتیب دیا تھا۔ جو ایک نشہ آور مرکب ہے۔ افلونیا کے متعدد نسخے ہیں۔ مثلاً افلونیائے فارسی، افلونیائے محمودی (تالیف، حکیم عماد الدین محمود شیرازی ) افلونیائے مرد افگن (جو بادشاہ جہانگیر کے دور میں ایجاد ہوا ) اور افلونیائے احمدی۔

ق

• قرابادین ’’ایک ایسی جامع دستوری کتاب یا دستور جس میں ادویہ مفردہ کو مرکب کرنے کے مختلف اصول و ضوابط سے بحث کی گئی ہو اور اُس کے لیے واضح اصول و قوانین طے کیے گئے ہوں ۔‘‘
• قوامی ادویہ: قوامی ادویہ سے مراد وہ دوائیں ہیں جو شکر، شہد، نبات سفید (مصری) قند سیاہ، راب، شکر سرخ اور کھانڈ وغیرہ کے قوام میں شامل کر کے تیار کی جاتی ہیں ، مثلاً اطریفلات، جوارِشات، معاجین، لعوقات خمیرہ جات اور مربہ جات وغیرہ۔
• قوامی مرکبات: وہ مرکبات جن کو قوام میں شامل کر کے محفوظ کیا جاتا ہے ، اُن میں خاص خاص مرکبات درج ذیل ہیں ۔ شربت، سکنجبین، لعوق، خمیرہ، معجون ، انوشدارو، جوارش، اطریفل، لبوب، مربی، گلقند وغیرہ.

م

• محرک: محرک ایسی غذا، دوا کو کہتے ہیں۔ جو کسی مفرد عضو کو سکون سے فعل میں لے آئیں۔
• ملین: وہ دوا ہوتی ہے جس میں محرک و شدید اثرات کے ساتھ ساتھ فضلات کو خارج کرنے کی قوت بھی ہو۔
• مسہل: مسہل دوا میں محرک شدید، ملین اثرات کے علاوہ جلاب آور بھی ہوں۔ ہم مسہل دوا کی مقدار کو کم کرکے محرک ، شدید اور ملین اثرات بھی حاصل کرسکتے ہیں۔
• مقوی: ایسی اشیاء کو کہتے ہیں جو کسی عضو کی طرف خون کو آہستہ آہستہ جذب کرنا شروع کر دیں۔ ان میں اغذیہ، ادویہ اور زہر تک شامل ہیں۔ مثلاً اغذیہ میں گوشت۔ ادویہ میں فولاد۔ اور زہروں میں سنکھیا اور کچلہ، مقویات شامل ہیں۔ چونکہ ہر عضو کا علاحدہ علاحدہ مزاج ہوتا ہے اس لیے ان کی طبیعت رکھنے والی اشیاء ہی مقوی ہو سکتی ہیں۔

مزید دیکھیے

• طب یونانی
• قانون طب

بیرونی روابط

• دیکھیے دستور المرکبات حصہ اولآرکائیو شدہ بذریعہ lib.bazmeurdu.net
• دیکھیے دستور المرکبات حصہ دومآرکائیو شدہ بذریعہ lib.bazmeurdu.net
• دیکھیے دستور المرکبات حصہ سومآرکائیو شدہ بذریعہ lib.bazmeurdu.net
• دیکھیے دستور المرکبات حصہ چہارمآرکائیو شدہ بذریعہ lib.bazmeurdu.net
• ڈاؤن لوڈ کتاب دستور المرکبات