ابن کلیم

معروف اُردو و سرائیکی ادیب، شاعر، خطاط، کالم نگار (وِلادت:3 جنوری 1946ء  وفات:  12 مارچ 2017ء ملتان)

حافظ محمد اِقبال المعروف اِبنِ کلیم احسن نظامی ملتان کے معروف خطاط"احسنُ التحریر" محمد حسن خان کلیم رقم (خطاطِ ایشیا) کے گھر پیدا ہوئے۔ حفظِ قرآن کے بعد ایم اے عربی کی تعلیم مکمل کی اور ساتھ ہی خطاطی کی تمام مروّجہ اصناف پر عبور حاصل کیا۔ خطاطِ  ہفت قلم ہونے کے ساتھ ساتھ آپ کو ایک نئے طرزِ تحریر ’’خطِ رعنا‘‘ کی ایجاد کا اعزاز حاصل ہے جسے دُنیا بھر کے صاحبانِ علم و فن اور معروف اِداروں کی جانب سے  خطِ نستعلیق کی ایجاد کے 700 سال بعد ایک با ضابطہ خط تسلیم کیا گیا ۔ 1960ء میں دبستان فروغِ خطاطی رجسٹرڈ کے نام سے پاکستان میں خطاطی کی ترویج کا پہلا اِدارہ قائم کیا جس کے تحت دُنیا بھر میں خطاطی کے فن کی نمائشیں، مقابلے اور معروف جامعات میں ورکشاپس کیں۔ آپ نے فنِ خطاطی کے موضوع پر متعدد مقالات اور 30 معرکہ آرا کتب تخلیق کیں۔ آپ نے اپنے فن کی 60 سے زائد قومی و بین الاقوامی نمائشیں کیں اور 80 سے زائد قومی و بین الاقوامی اجتماعی نمائشوں میں حصہ لیا۔ آپ کو فن اور خدمات کے اعتراف میں قومی و بین الاقوامی اِداروں کی طرف سے 35 سے زائد ایوارڈز و اعزازات سے نوازا جا چکا ہے۔ خصوصاً ترکی کے معروف اِدارہ آرسیکا نے آپ کو 1982 ء  میں ’’نادر القلم‘‘ کے اعزاز سے نوازا۔

ابن کلیم نے تقریباً 1964ء میں مشہور و معروف پاکستانی مصنف ابن صفی صاحب کی تخلیق کردہ مشہور و معروف عمران سیریز اور جاسوسی دنیا "فریدی حمید سیریز" میں سے عمران سیریز کے کئی مشہور ناول لکھے اور یہ سلسلہ تقریباً 1973ء تک چلتا رہا۔ مزید تفصیلات اسی جگہ آخری پیراگرافس میں درج ہیں۔

ابنِ کلیم احسن نظامی (1946 تا 2017)

پیدائشی نام

حافظ محمد اقبال خان لنگاہ

معروف نام

ابنِ کلیم احسن نظامی

ولادت

3-جنوری- 1946

وفات

12-مارچ - 2017

جائے ولادت و وفات

مدینۃ الاولیاء ملتان شریف

والدِ کانام

محمد حسن خان کلیم رقمؔ (خطاطِ ایشیا)

تعلیم

حفظِ قرآن، ایم اے عربی

تصانیف:

فنِ خطاطی سے متعلق تصانیف:

• تاریخ فن خطاطی (1977ء) ==
• اِسلامی خطاطی کی مفصّل تاریخ (بحوالہ برِ صغیر)، اساتذۂ متقدمین کے خطاطی کے فن پاروں / شہ پاروں کے عکس سے آراستہ۔ تحقیقی و تاریخی مضامین پر مشتمل تصنیف۔
• ابن کلیم احسن نظامی کی یہ کتاب 1977ء کے بعد پاکستان میں فن خطاطی سے متعلق شائع ہونے والی تقریباً تمام کتب میں ایک تاریخی حوالہ کے طور پر پیش کی جاتی ہے۔

نقوشِ رعنا (موسوم مرقع خطاطی) (1978ء، 1980ء، 1996ء)

• اسلامی فن خطاطی کے مروّجہ سات (7) خَطوں (خط نستعلیق، خط نسخ، خط رقعہ، خط ثلث، خط کوفی، خط دیوانی، خط رعنا) کی با ضابطہ تعلیم مع خطاطی کے فن پاروں کے عکس اور خط رعنا کا مختصر تعارف و تختی حروفِ مفردات۔

جلوت رعنائے خطاطی (1981ء)

• فن خطاطی کے سات مروّجہ خطوں و خطِ رعنا کی تاریخ اور قرآنی خطاطی کے فن پارے شامل ہیں۔

کاپی سِلپ خطِ نستعلیق (1982ء)

• خوشخطی سیکھنے کے لیے ابتدائی اسباق قواعد و ضوابط برائے خط نستعلیق۔

= قلم اور اہلِ قلم (1986ء)

• نامور خطاط حضرات کے تعارف اور ان کے فن کے شہہ پارے۔

مرقع رعنائی (1993ء)

• ابنِ کلیم احسن نظامی کے نَو ایجاد کردہ خط رعنا کی تربیت کے لیے قواعد و ضوابط۔
• اِسلامی فن خطاطی کے اَساتذہ کے عظیم فن پاروں کا عکس۔
• مذہب اور طب و حکمت کی معروف عہد ساز شخصیت اور سابق گورنر سندھ حکیم محمد سعید بانی ہمدرد فاؤنڈیشن جمالیاتی ذوق سے "مرقع رعنائی" پر تبصرہ کرتے ہوئے کچھ یوں رقمطراز ہیں:

’’ اسلامی فنون میں خطاطی کو بڑی اہمیت حاصل ہے۔ اور اگر ہم کسی ایک فن کو اسلامی ثقافت کی روح سے تعبیر کرنا چاہیں تو وہ یقیناً خطاطی کا فن ہی ہوگا، جس کی وجہ شاید یہ ہے کہ اسلام نے سب سے پہلے زیادہ زور علم پر دیا ہے اور حصولِ علم کا کوئی تصور تحریری کتابت کے بغیر ممکن نہیں ہے۔ کتابت کی اس اہمیت کے پیشِ نظر مسلمان فنکاروں نے خطاطی میں نت نئے کمالات کا مظاہرہ کیا ہے۔ مسلمان حضرات کی مسلسل تخلیقی کاوشوں کے نتیجے میں چھ مختلف اسالیبِ خطاطی یعنی خطِ کوفی، خطِ نسخ، خطِ ثلث، خطِ دیوانی، خطِ رقعہ اور خطِ نستعلیق وجود میں آئے اور بتدریج ارتقا کے تمام مراحل طے کیے۔ ابنِ کلیم صاحب کے خلاقانہ ذہن نے ایک نیا اسلوبِ خطاطی ایجاد کیا، انھوں نے پہلے مروّجہ اسالیبِ خطاطی میں کمال پیدا کیا اور آخر کار ایک نیا اسلوب ایجاد کیا جسے وہ ’’خطِ رعنا‘‘ کہتے ہیں۔ ان کی اس ایجاد نے فنِ خطاطی میں قابلِ قدر اضافہ کیا ہے۔ اس نئے اسلوبِ خطاطی کے نمونے ’’مرقعِ رعنائی ‘‘ کے نام سے شائع ہو گئے ہیں۔ ابنِ کلیم صاحب کا یہ کارنامہ فنِ خطاطی میں انقلاب کی حیثیت رکھتا ہے۔ یہ امر نہایت دل خوش کن ہے کہ ’’مرقعِ رعنائی ‘‘ نہایت نفاست اور خوش سلیقگی سے شائع کی گئی ہے جس پر میں جنابِ ابنِ کلیم کو مبارکباد پیش کرتا ہوں۔ ‘‘

محاسنِ خطِ رعنا]] (2007ء)

• دُنیا بھر کے اہلِ علم و فن، فکر و نظر کے خط رعنا کی جمالیاتی و فنی اعتبار سے تبصرے مع اِسلامی فن خطاطی کے فن پاروں کے عکس اور کلامِ حضرت خواجہ غلام فرید پس منظر کے ساتھ شامل ہیں۔
• وطنِ عزیز پاکستان کے نامور شاعر و ادیب اور منتظم جناب افتخار عارف کا کتاب سے متعلق جامع تبصرہ پیش ہے:

 "ابنِ کلیم صاحب ! آپ کی کتاب  'محاسنِ خطِ رعنا '  موصول ہوئی اپنے موضوع کے اعتبار سے اس نوع کی کتاب پہلے کبھی نظر سے نہیں گذری۔ اللہ تعالیٰ آپ کے لفظ کو تاثیر کی دولت سے مالا مال رکھے ۔ آمین "

عمران سیریز

عمران سیریز اور جاسوسی دنیا (فریدی حمید سیریز) اردو ادب اور اردو جاسوسی ادب کے بین الاقوامی شہرت یافتہ مصنف ابن صفی صاحب کے تخلیق کردہ دو مشہور و معروف سلسلے ہیں، ابن صفی صاحب کے تخلیق کردہ عالمی شہرت یافتہ کردار کرنل فریدی، کیپٹن حمید و علی عمران وغیرہ ہیں، ابن صفی کے دونوں سلسلوں پر بہت سارے مصنفین نے بغیر اجازت لکھا اور کئی مصنفین نے شہرت حاصل کی ان میں ابن کلیم بھی شامل ہیں۔

ابن کلیم نے تقریباً 1964ء کے بعد عمران سیریز ناول لکھنے کا آغاز کیا اور تقریباً 1973ء کے بعد تک جاسوسی ادب ملتان، ایوب اکیڈمی کراچی، جمال پبلشرز بوہر گیٹ ملتان وغیرہ کے اشاعتی اداروں سے عمران سیریز کے بہت سارے ناول لکھے جنہیں بہت شہرت ملی اور بہت پسند کیا گیا۔ ایوب اکیڈمی کراچی کے اشاعتی ادارے کو چلانے والے ایس قریشی تھے جبکہ جمال پبلشرز بوہڑ گیٹ ملتان کے ادارے کو چلانے والے بی اے جمال تھے۔

ایک تحقیق کے مطابق اظہر کلیم اور ابن کلیم کے ناموں کی پیروی میں چند دوسرے عمران سیریز مصنفین بھی سامنے آئے جن کے ناموں میں ’’کلیم‘‘ نام شامل تھا ان ناموں میں سے عمران سیریز کے ایک مصنف مظہر کلیم کا نام کافی مشہور ہوا، ان کے علاوہ اسد کلیم وغیرہ نام بھی عمران سیریز مصنفین میں سامنے آئے۔ مزید تفصیلات کے لیے عمران سیریز کے مصنفین دیکھ سکتے ہیں۔

ابن کلیم کی عمران سیریز کے چند مشہور ناولوں میں سے ڈیڈ لینڈ، برفانی عفریت، ڈاکٹر زلار، انوکھا پلان، ڈاکٹر برناڈ، ویران جزیرہ، موت کا تعاقب، پراسرار فارمولا، عمران اور موت، اپریشن ٹُو ایسٹ، خوفناک تصادم، شیطان کی جنت، موت کے مقاصد، روح کے آنسو، خونی پُل وغیرہ وغیرہ شامل ہیں۔ عمران سیریز لکھنے والے چند مصنفین کے ناول آپ کی زیر نگرانی اور نظر ثانی میں بھی شائع ہوئے۔

وجہ شہرت

اسلامی خطاطی کے فن میں تحقیقی و تخلیقی خدمات اَنجام دیں اور ہزاروں فن پارے تخلیق کیے۔ بحیثیت شاعر ، اَدیب و صحافی بھی معروف ہیں، اس سے پہلے ابن صفی کی تخلیق کردہ جاسوسی دنیا اور عمران سیریز میں سے عمران سیریز لکھنے سے بھی مشہور تھے۔

فنی خصوصیات

خطاط  ہفت قلم، موجدِ خطِ رعنا  (خطِ نستعلیق کی ایجاد کے سات سو سال بعد آپ نے  خطِ رعنا ایجاد کیا۔ یہ نیا باضابطہ طرزِ تحریر عربی، فارسی، اُردو، پنجابی و سرائیکی زبانوں کی تحریر کا نمائندہ خط ہے). اُردو کے معروف دانشور ڈاکٹر گوپی چند نارنگ نے فن اور فن کار سے متعلق تبصرے کے دوران خطِ رعنا کی حیثیت کو اس طرح تسلیم کیا ہے:

’’اِس زمانے میں جب خطاطی کے فن کی طرف زیادہ توجہ نہیں ہے اور ہم اپنی اس عظیم الشان ثقافتی روایت سے محروم ہوتے جاتے ہیں، ابنِ کلیم نے اس فن میں درجۂ کمال بہم پہنچا کر اس فن کی تجدید کی ہے اور ’’خطِ رعنا‘‘ ایجاد کر کے تاریخ میں اپنی جگہ محفوظ کر لی ہے۔ ان کے نمونے ایک ایسے فنکار کو پیش کرتے ہیں جس نے خونِ جگر صَرف کیا ہے اور اَساتذۂ قدیم کی یاد کو تازہ کر دیا ہے۔ ‘‘

چیف آرگنائزرـ

1960ءسے اسلامی و قرآنی خطاطی کی ترویج و ترقی کا ادارہ ’’دبستان فروغِ خطاطی رجسٹرڈ‘‘ آرگنائز کیا۔

مقالہ جات

مختلف موضوعات پر 200کے قریب آپ کے تحریر کردہ مقالہ جات /آرٹیکلز قومی و بین الاقوامی اخبارات و جرائد میں شائع ہوئے۔

اعزازی لقب

’’نادرُالقلم‘‘ (بین الاقوامی کمیشن اسلامی ثقافتی وِرثہ ترکی ، کی طرف سے)، شاہ خالد گولڈ میڈل (پاکستان سوسائٹی فار یونیٹی آف مسلم ورلڈ لاہور کی جانب سے)

فنِ خطاطی میں نمایاں خدمات

گذشتہ نصف صدی سے دبستان فروغِ خطاطی رجسٹرڈ و دیگر خطاطی کی تنظیموں سے وابستگی کے ساتھ فن خطاطی (اسلامک کیلی گرافی) کی تعلیم و تربیت اور ترویج کا فریضہ انجام دے رہے ہیں۔اس ضمن میں مختلف مقامات پر بارہا خطاطی کی نمائشیں اور ورکشاپس (ڈیمونسٹریشن) کا اہتمام بھی کیا۔ فنِ خطاطی میں آپ کی خدمات سے مستفیض ہونے والے شاگردوں کی تعداد ہزاروں میں ہے۔

تخلیقات کی نمائشیں

ایک سو بیس سے زائد پاکستان کے بیشتر شہروں میں، غالب اَکیڈمی نیو دہلی میں 1982, 1980اور 1997ء میں صرف اِبنِ کلیم کے فن پاروں پر مشتمل نمائشیں۔ اس کے علاوہ دمشق، استنبول، اسٹاک ہولم (سویڈن)، کوپن ہیگن (ڈنمارک) تہران، مشہد (ایران) اور جدہ ، ریاض (سعودی عرب ) و دیگر ممالک میں نمائش ہائے خطاطی۔

سند و ٹرافی

• ’’بارانِ غدیر ایوارڈ‘‘ حوزہ ہنری ایران 2012ء
• لیگ آف عرب اسٹیٹس نیو دہلی و عرب کلچرل سنٹر نیو دہلی 1980ء
• ہجویری ایوارڈ (پاکستان کیلی گراف آرٹسٹس گلڈ کی جانب سے)2004ء

گولڈ میڈلسٹ

قومی مقابلۂ خطاطی 1984ء میں، پاکستان نیشنل کونسل آف دی آرٹس اسلام آبادکی جانب سے، خطِ رعنا کی ایجاد پر بین الاقوامی آرٹ بینال میں اوّل انعام 1987ء میں منعقدہ الحمرا آرٹ گیلری لاہور میں دیا گیا۔