صلاح الدین ایوبی
الناصر صلاح الدین بن یوسف بن ایوب (عربی: الناصر صلاح الدين يوسف بن أيوب؛ (کردی: سەلاحەدینی ئەییووبی)) جنہیں عام طور پر صلاح الدین ایوبی کے نام سے جانا جاتا ہے ایوبی سلطنت کے بانی تھے۔[8] وہ نہ صرف تاریخ اسلام بلکہ تاریخ عالم کے مشہور ترین فاتحین و حکمرانوں میں سے ایک ہیں۔ وہ 1138ء میں موجودہ عراق کے شہر تکریت میں پیدا ہوئے۔[9] ان کی زیر قیادت ایوبی سلطنت نے مصر، شام، یمن، عراق، حجاز اور دیار باکر پر حکومت کی۔ سلطان صلاح الدین ایوبی رحمۃ اللّٰہ علیہ کو بہادری، فیاضی، حسن خلق، سخاوت اور بردباری کے باعث نہ صرف مسلمان بلکہ مسیحی بھی عزت کی نگاہ سے دیکھتے ہیں۔[10] صلاح الدین ایوبی اپنے کارناموں میں نور الدین زنگی پر بھی بازی لے گئے۔ ان میں جہاد کا جذبہ کوٹ کوٹ کر بھرا ہوا تھا اور بیت المقدس کی فتح ان کی سب سے بڑی خواہش تھی۔ صلاح الدین کو فاتح بیت المقدس کہا جاتا ہے جنھوں نے 1187ء میں یورپ کی متحدہ افواج کو عبرتناک شکست دے کر بیت المقدس ان سے آزاد کروا لیا تھا۔صلاح الدین ایوبی 1193 ء میں دمشق میں انتقال کر گئے ، انہوں نے اپنی ذاتی دولت کا زیادہ تر حصہ اپنی رعایا کو دے دیا۔ وہ مسجد بنو امیہ سے متصل مقبرے میں مدفون ہیں۔ مسلم ثقافت کے لئے اپنی اہمیت کے ساتھ ساتھ ، صلاح الدین کو کرد ، ترک اور عرب ثقافت میں نمایاں طور پر احترام کیا جاتا ہے۔ انہیں اکثر تاریخ کی سب سے مشہور کرد شخصیت کے طور پر بیان کیا جاتا ہے۔[11]
صلاح الدین ایوبی | |||||||
---|---|---|---|---|---|---|---|
(عربی میں: صلاح الدين الأيوبي) | |||||||
معلومات شخصیت | |||||||
پیدائشی نام | (عربی میں: يُوسُف أبن أيوب بن شاذي بن مروان بن يعقوب الدُويني التكريتي) | ||||||
پیدائش | سنہ 1138[1] تکریت[2][3] |
||||||
وفات | 4 مارچ 1193 (54–55 سال)[4] دمشق[5] |
||||||
وجہ وفات | متعدی امراض | ||||||
مدفن | مسجد امیہ | ||||||
شہریت | ![]() ![]() |
||||||
نسل | کردی زبان[6] | ||||||
مذہب | اسلام[7] | ||||||
زوجہ | عصمت الدین خاتون | ||||||
اولاد | الافضل بن صلاح الدین، العزیز عثمان، الظاہر غازی | ||||||
والد | نجم الدین ایوب | ||||||
والدہ | ست الملک خاتون | ||||||
بہن/بھائی | |||||||
خاندان | ایوبی خاندان | ||||||
مناصب | |||||||
فاطمی وزیر[7] | |||||||
برسر عہدہ 1169 – 1174 |
|||||||
| |||||||
سلطان مصر | |||||||
برسر عہدہ 1169 – 1193 |
|||||||
| |||||||
سلطان دمشق | |||||||
برسر عہدہ 1174 – 1193 |
|||||||
| |||||||
امیر | |||||||
برسر عہدہ 1185 – 1193 |
|||||||
عملی زندگی | |||||||
پیشہ | فوجی افسر، عسکری قائد | ||||||
پیشہ ورانہ زبان | عربی، کردی زبان | ||||||
عسکری خدمات | |||||||
لڑائیاں اور جنگیں | مصر پر صلیبی یلغاریں، محاصرہ الکرک، مرج عیون کی لڑائی، کوکب ھوہ کی لڑائی، جنگ الفولہ، عین جوزہ کی لڑائی، حطین کی لڑائی، فتح بیت المقدس، محاصرہ صور، محاصرہ عکہ، ارسوف کی لڑائی، یافا کی لڑائی، ہما کی لڑائی | ||||||
درستی - ترمیم ![]() |
ابتدائی دور
سلطان صلاح الدین نسلاً کرد تھے اور 1138ء میں کردستان کے اس حصے میں پیدا ہوئے جو اب عراق میں شامل ہے۔ شروع میں وہ سلطان نور الدین زنگی کے یہاں ایک فوجی افسر تھے۔ مصر کو فتح کرنے والی فوج میں صلاح الدین بھی موجود تھے اور اس کے سپہ سالار شیر کوہ صلاح الدین کے چچا تھے۔[12] مصر فتح ہو جانے کے بعد صلاح الدین کو 564ھ میں مصر کا حاکم مقرر کر دیا گیا۔ اسی زمانے میں 569ھ میں انہوں نے یمن بھی فتح کر لیا۔ نور الدین زنگی کے انتقال کے بعد صلاح الدین حکمرانی پرفائز ہوئے۔[13]
کارنامے
صلاح الدین اپنے کارناموں میں نور الدین زنگی پر بھی بازی لے گئے۔ ان میں جہاد کا جذبہ کوٹ کوٹ کر بھرا ہوا تھا اور بیت المقدس کی فتح ان کی سب سے بڑی خواہش تھی۔[14]
مصر کے بعد صلاح الدین نے 1182ء تک شام، موصل، حلب وغیرہ فتح کرکے اپنی سلطنت میں شامل کر لیے۔ اس دوران میں صلیبی سردار رینالوڑا کے ساتھ چار سالہ معاہدہ صلح ہو چکا تھا جس کی رو سے دونوں ایک دوسرے کی مدد کرنے کے پابند تھے لیکن یہ معاہدہ محض کاغذی اور رسمی تھا۔ صلیبی بدستور اپنی اشتعال انگیزیوں میں مصروف تھے اور مسلمانوں کے قافلوں کو برابر لوٹ رہے تھے۔[15]
ناکام مذاکرات
صلاح الدین کی زیر قیادت شام و مصر کی افواج صور کے ناکام محاصرے کے بعد 20 ستمبر 1187ء کو بیت المقدس پہنچ گئیں۔
صلاح الدین اور بیلین کے درمیان مذاکرات ہوئے۔ صلاح الدین بغیر خون خرابے کے شہر حاصل کرنا چاہتے تھے لیکن شہر کے مسیحیوں نے بغیر لڑے مقدس شہر چھوڑنے سے انکار کر دیا اور دھمکی دی کہ وہ پرامن طور پر شہر دشمن کے حوالے کرنے پر اسے تباہ کرنے اور خود مر جانے کو ترجیح دیں گے۔
محاصرہ بیت المقدس
مذاکرات میں ناکامی پر صلاح الدین نے شہر کا محاصرہ کر لیا۔ صلاح الدین کی افواج برج داؤد اور باب دمشق کے سامنے کھڑی ہو گئی اور تیر اندازوں نے حملے کا آغاز کیا۔ اس کے علاوہ منجنیقوں کے ذریعے شہر پر سنگ باری کی گئی۔ صلاح الدین کی افواج نے کئی مرتبہ دیواریں توڑنے کی کوشش کی لیکن مسیحیوں نے اسے ناکام بنادیا۔ 6 روزہ محاصرے کے بعد صلاح الدین نے افواج کو شہر کے دوسرے حصے کی جانب منتقل کر دیا اور حملہ جبل زیتون کی جانب سے کیا جانے لگا۔ 29 ستمبر کو مسلم افواج شہر کی فصیل کا ایک حصہ گرانے میں کامیاب ہوگئیں تاہم وہ فوری طور پر شہر میں داخل نہ ہوئیں اور دشمن کی عسکری قوت کو ختم کرتی رہیں۔
جنگ حطین
1186ء میں مسیحیوں کے ایک ایسے ہی حملے میں رینالڈ نے یہ جسارت کی کہ بہت سے دیگر مسیحی امرا کے ساتھ مدینہ منورہ پر حملہ کی غرض سے حجاز مقدس پر حملہ آور ہوا۔ صلاح الدین ایوبی نے ان کی سرگرمیوں کی روک تھام کے لیے اقدامات کیے اور فوراً رینالڈ کا تعاقب کرتے ہوئے حطین میں اسے جالیا۔ سلطان نے یہیں دشمن کے لشکر پر ایک ایسا آتش گیر مادہ ڈلوایا جس سے زمین پر آگ بھڑک اٹھی۔ چنانچہ اس آتشیں ماحول میں 1187ء کو حطین کے مقام پر تاریخ کی خوف ناک ترین جنگ کا آغاز ہوا۔[16] اس جنگ کے نتیجہ میں تیس ہزار مسیحی ہلاک ہوئے اور اتنے ہی قیدی بنا لیے گئے۔ رینالڈ گرفتار ہوا اور سلطان نے اپنے ہاتھ سے اس کا سر قلم کیا۔ دراصل رینالڈ حضرت محمد صلى الله عليه وسلم کی شان میں برملا طور پر گستاخی کیا کرتا تھا اور سلطان ایوبی نے اسے اپنے ہاتھوں سے مارنے کی قسم کھائ تھی. یہی وجہ ہے کہ اس کے اتحادی بادشاہ کے ساتھ وہی سلوک کیا جیسا ایک بادشاہ دوسرے بادشاہ کے ساتھ کرتا ہے۔لیکن رینالڈ کے جرائم بہت سنگین تھے۔اس جنگ کے بعد اسلامی افواج مسیحی علاقوں پر چھا گئیں۔[17]
فتح بیت المقدس
حطین کی فتح کے بعد صلاح الدین نے بیت المقدس کی طرف رخ کیا ایک ہفتہ تک خونریز جنگ کے بعد مسیحیوں نے ہتھیار ڈال دیے اور رحم کی درخواست کی۔ بیت المقدس پورے 88 سال بعد دوبارہ مسلمانوں کے قبضہ میں آیا اور تمام فلسطین سے مسیحی حکومت کا خاتمہ ہو گیا۔ بیت المقدس کی فتح صلاح الدین ایوبی کا عظیم الشان کارنامہ تھا۔ اس نے مسجد اقصٰی میں داخل ہوکر نور الدین زنگی کا تیار کردہ منبر اپنے ہاتھ سے مسجد میں رکھا۔ اس طرح نور الدین زنگی کی خواہش اس کے ہاتھوں پوری ہوئی۔ صلاح الدین ایوبی وہ پہلے حکمران تھے جو دو مقدس مساجد کے نگہبان کہلائے گئے تھے۔
صلاح الدین نے بیت المقدس میں داخل ہوکر وہ مظالم نہیں کیے جو اس شہر پر قبضے کے وقت مسیحی افواج نے کیے تھے۔ صلاح الدین ایک مثالی فاتح کی حیثیت سے بیت المقدس میں داخل ہوا۔ اس نے زر فدیہ لے کر ہر مسیحی کو امان دے دی اور جو غریب فدیہ نہیں ادا کر سکے ان کے فدیے کی رقم صلاح الدین اور اس کے بھائی ملک عادل نے خود ادا کی۔[18]بیت المقدس پر فتح کے ساتھ یروشلم کی وہ مسیحی حکومت بھی ختم ہو گئی جو فلسطین میں 1099ء سے قائم تھی۔ اس کے بعد جلد ہی سارا فلسطین مسلمانوں کے قبضے میں آ گیا۔[19]
بیت المقدس پر تقریباً 761 سال مسلسل مسلمانوں کی حکومت رہی۔ تاآنکہ 1948ء میں امریکہ، برطانیہ، فرانس کی سازش سے فلسطین کے علاقہ میں یہودی سلطنت قائم کی گئی اور بیت المقدس کا نصف حصہ یہودیوں کے قبضے میں چلا گیا۔ 1967ء کی عرب اسرائیل جنگ میں بیت المقدس پر اسرائیلیوں نے قبضہ کر لیا ۔[20]
تیسری صلیبی جنگ
جب بیت المقدس پر قبضے کی خبر یورپ پہنچی تو سارے یورپ میں کہرام مچ گیا۔ ہر طرف لڑائی کی تیاریاں ہونے لگیں۔ جرمنی، اٹلی، فرانس اور انگلستان سے فوجوں پر فوجیں فلسطین روانہ ہونے لگیں۔ انگلستان کا بادشاہ رچرڈ جو اپنی بہادری کی وجہ سے شیر دل مشہور تھا اور فرانس کا بادشاہ فلپ آگسٹس اپنی اپنی فوجیں لے کر فلسطین پہنچے۔ یورپ کی اس متحدہ فوج کی تعداد 6 لاکھ تھی جرمنی کا بادشاہ فریڈرک باربروسا بھی اس مہم میں ان کے ساتھ تھا۔[21]
مسیحی دنیا نے اس قدر لاتعداد فوج ابھی تک فراہم نہ کی تھی۔ یہ عظیم الشان لشکر یورپ سے روانہ ہوا اور عکہ کی بندرگاہ کا محاصرہ کر لیا اگرچہ سلطان صلاح الدین نے تن تنہا عکہ کی حفاظت کے تمام انتظامات مکمل کر لیے تھے لیکن صلیبیوں کو یورپ سے مسلسل کمک پہنچ رہی تھی۔ ایک معرکے میں دس ہزار مسیحی قتل ہوئے مگر صلیبیوں نے محاصرہ جاری رکھا لیکن چونکہ کسی اور اسلامی ملک نے سلطان کی طرف دست تعاون نہ بڑھایا اس لیے صلیبی ناکہ بندی کی وجہ سے اہل شہر اور سلطان کا تعلق ٹوٹ گیا اور سلطان باوجود پوری کوشش کے مسلمانوں کو کمک نہ پہنچا سکا۔ تنگ آکر اہل شہر نے امان کے وعدہ پر شہر کو مسیحیوں کے حوالہ کر دینے پر آمادگی ظاہر کی۔ فریقین کے درمیان معاہدہ طے ہوا جس کے مطابق مسلمانوں نے دو لاکھ اشرفیاں بطور تاوان جنگ ادا کرنے کا وعدہ کیا اور صلیب اعظم اور 500 مسیحی قیدیوں کی واپسی کی شرائط طے کرتے ہوئے مسلمانوں نے ہتھیار ڈال دیے۔ مسلمانوں کو اجازت دے دی گئی۔ وہ تمام مال اسباب لے کر شہر سے نکل جائیں لیکن رچرڈ نے بدعہدی کی اور محصورین کو قتل کر دیا۔[22]
عکہ کے بعد صلیبیوں نے فلسطین کی بندرگاہ عسقلان کا رخ کیا۔ عسقلان پہنچنے تک مسیحیوں کا سلطان کے ساتھ گیارہ بارہ بار مقابلہ ہوا سب سے اہم معرکہ ارسوف کا تھا۔ سلطان نے جواں مردی اور بہادری کی درخشندہ مثالیں پیش کیں لیکن چونکہ کسی بھی مسلمان حکومت بالخصوص خلیفہ بغداد کی طرف سے کوئی مدد نہ پہنچی۔ لہذا سلطان کو پسپائی اختیار کرنی پڑی۔ واپسی پر سلطان نے عسقلان کا شہر خود ہی تباہ کر دیا۔ اور جب صلیبی وہاں پہنچے تو انہیں اینٹوں کے ڈھیر کے سوا کچھ بھی حاصل نہ ہوا۔ اس دوران میں سلطان نے بیت المقدس کی حفاظت کی تیاریاں مکمل کیں کیونکہ اب صلیبیوں کا نشانہ بیت المقدس تھا۔ سلطان نے اپنی مختصر سی فوج کے ساتھ اس قدر عظیم لاؤ لشکر کا بڑی جرات اور حوصلہ سے مقابلہ کیا۔ جب فتح کی کوئی امید باقی نہ رہی تو صلیبیوں نے صلح کی درخواست کی۔ فریقین میں معاہدہ صلح ہوا۔ جس کی رو سے تیسری صلیبی جنگ کا خاتمہ ہوا۔[23]
اس صلیبی جنگ میں سوائے عکہ شہر کے مسیحیوں کو کچھ بھی حاصل نہ ہوا اور وہ ناکام واپس ہوئے۔ رچرڈ شیردل، سلطان کی فیاضی اور بہادری سے بہت متاثر ہوا جرمنی کا بادشاہ بھاگتے ہوئے دریا میں ڈوب کر مرگیا اور تقریباً چھ لاکھ مسیحی ان جنگوں میں کام آئے۔[24]
معاہدہ کے شرائط مندرجہ ذیل تھیں:
- بیت المقدس بدستور مسلمانوں کے پاس رہے گا۔
- ارسوف، حیفہ، یافہ اور عکہ کے شہر صلیبیوں کے قبضہ میں چلے گئے۔
- عسقلان آزاد علاقہ تسلیم کیا گیا۔
- زائرین کو آمدورفت کی اجازت دی گئی۔
- صلیب اعظم بدستور مسلمانوں کے قبضہ میں رہی ۔
تیسری صلیبی جنگ میں سلطان صلاح الدین نے ثابت کر دیا کہ وہ دنیا کا سب سے طاقتور ترین حکمران ہے ۔[25]
سیرت
صلاح الدین بڑے بہادر اور فیاض تھے۔ لڑائیوں میں انھوں نے مسیحیوں کے ساتھ اتنا اچھا سلوک کیا کہ مسیحی آج بھی ان کی عزت کرتے ہیں۔
ان کو جہاد کا اتنا شوق تھا کہ ایک مرتبہ ان کے نچلے دھڑ میں پھوڑے ہو گئے ان کی وجہ سے وہ بیٹھ کر کھانا نہیں کھا سکتا تھے لیکن اس حالت میں بھی جہاد کی سرگرمی میں فرق نہ آیا۔ صبح سے ظہر تک اور عصر سے مغرب تک برابر گھوڑے کی پیٹھ پر رہتے۔ ان کو خود تعجب ہوتا تھا اور کہا کرتا تھے کہ جب تک گھوڑے کی پیٹھ پر رہتا ہوں ساری تکلیف جاتی رہتی ہے اور اس سے اترنے پر پھر سے تکلیف شروع ہوجاتی ہے ۔[26]
مسیحیوں سے صلح ہو جانے کے بعد صلاح الدین نے مسیحیوں کو بیت المقدس کی زیارت کی اجازت دے دی۔ اجازت ملنے پر یورپ کے زائرین جو برسوں سے انتظار کر رہے تھے اس کثرت سے ٹوٹ پڑے کہ شاہ رچرڈ کے لیے انتظام قائم رکھنا مشکل ہو گیا اور اس نے سلطان سے کہا کہ وہ اس کی تحریر اور اجازت نامے کے بغیر کسی کو بیت المقدس میں داخل نہ ہونے دے۔ سلطان نے جواب دیا ”زائرین بڑی بڑی مسافتیں طے کرکے زیارت کے شوق میں آتے ہیں ان کو روکنا مناسب نہیں“۔ سلطان نے نہ صرف یہ کہ ان زائرین کو ہر قسم کی آزادی دی بلکہ اپنی جانب سے لاکھوں زائرین کی مدارات، راحت، آسائش اور دعوت کا انتظام بھی کیا۔
صلاح الدین کا غیر مسلموں سے سلوک عین اسلامی تعلیمات کے مطابق تھا اور یہ اس کا ثبوت ہے کہ اسلامی حکومت میں غیر مسلموں کے حقوق بھی اسی طرح محفوظ ہوئے ہیں جس طرح مسلمانوں کے ۔ نور الدین کی طرح صلاح الدین کی زندگی بھی بڑی سادہ تھی۔ ریشمی کپڑے کبھی استعمال نہیں کیے اور رہنے کے لیے محل کی جگہ معمولی سا مکان ہوتا تھا۔ سلطان ایک سچے اور پکے مسلمان تھے۔[27]
رفاہ عامہ کے کام
قاہرہ پر قبضے کے بعد جب آپ نے فاطمی حکمرانوں کے محلات کا جائزہ لیا تو وہاں بے شمار جواہرات اور سونے چاندی کے برتن جمع تھے۔ صلاح الدین نے یہ ساری چیزیں اپنے قبضے میں لانے کی بجائے بیت المال میں داخل کرادیں۔ محلات کو عام استعمال میں لایا گیا اور ایک محل میں عظیم الشان خانقاہ قائم کی گئی۔[28]
فاطمیوں کے زمانے میں مدرسے قائم نہیں کیے گئے شام میں تو نورالدین زنگی کے زمانے میں مدرسے اور شفاخانے قائم ہوئے لیکن مصر اب تک محروم تھا۔ صلاح الدین نے یہاں کثرت سے مدرسے اور شفاخانے قائم کیے۔ ان مدارس میں طلبہ کے قیام و طعام کا انتظام بھی سرکار کی طرف سے ہوتا تھا۔
قاہرہ میں صلاح الدین کے قائم کردہ شفاخانے کے بارے میں ایک سیاح ابن جبیر لکھتا ہے کہ یہ شفاخانہ ایک محل کی طرح معلوم ہوتا ہے جس میں دواؤں کا بہت بڑا ذخیرہ ہے۔ اس نے عورتوں کے شفاخانے اور پاگل خانے کا بھی ذکر کیا ہے ۔ صلاح الدین سلطنت غوریہ کے حکمران شہاب الدین غوری اور مراکشی حکمران یعقوب المنصور کا ہم عصر تھا اور بلاشبہ یہ تینوں حکمران اپنے وقت میں دنیا کے عظیم ترین حکمرانوں میں سے تھے ۔
انتقال
589ھ میں صلاح الدین انتقال کر گئے۔ انہیں شام کے موجودہ دار الحکومت دمشق کی مسجد امیہ کے نواح میں سپرد خاک کیا گیا۔ صلاح الدین نے 20 سال حکومت کی۔ مورخ ابن خلکان کے مطابق ان کی موت کا دن اتنا تکلیف دہ تھا کہ ایسا تکلیف دہ دن اسلام اور مسلمانوں پر خلفائے راشدین کی موت کے بعد کبھی نہیں آیا۔ [29]
موجودہ دور کے ایک انگریز مورخ لین پول نے بھی سلطان کی بڑی تعریف کی ہے اور لکھتا ہے کہ ان کے ہمعصر بادشاہوں اور ان میں ایک عجیب فرق تھا۔ بادشاہوں نے اپنے جاہ و جلال کے سبب عزت پائی اور ایوبی نے عوام سے محبت اور ان کے معاملات میں دلچسپی لے کر ہردلعزیزی کی دولت کمائی۔
صلاح الدین ایوبی کی قائم کردہ حکومت ان کے والد نجم الدین ایوب کے نامم پر ”ایوبی“ کہلاتی تھی۔
صلاح الدین اگرچہ ایک دانشمند اور قابل حکمران تھے لیکن وہ خود کو رواجی تصور سے آزاد نہ کرسکے۔ خلافت کے حقیقی تصور کو اب مسلمان معاشرہ اس حد تک بھلا چکا تھا کہ نور الدین اور صلاح الدین جیسے حکمران بھی ملوکیت کے انداز میں سوچتے تھے۔ جانشینی کے معاملے میں صلاح الدین نے وہی غلطی کی جو سب سے پہلے ہارون الرشید نے کی تھی اور سلجوقیوں کے بعد سے تمام حکمران کرتے چلے آ رہے تھے۔ انہوں نے زمانے کے غلط رواج کے تحت اپنی سلطنت تین لڑکوں میں تقسیم کردی۔ نتیجہ یہ ہوا کہ طاقتور سلطنت تقسیم ہوکر کمزور پڑ گئی۔ پھر بھی ایوبی خاندان کے ان چند لائق حکمرانوں جن میں صلاح الدین کا بھائی ملک عادل اور اس کا لڑکا ملک کامل قابل ذکر ہیں، مصر، شام، حجاز اور یمن کو تقریباً 60 سال تک بڑی حد تک متحد رکھا۔ 648ھ میں ایوبی خاندان کی حکومت ختم ہو گئی اور ان کی جگہ ترک غلاموں کی حکومت قائم ہوئی جو مملوک کہلاتی تھی۔[30]
حوالہ جات
- ↑ NE.se ID: https://www.ne.se/uppslagsverk/encyklopedi/lång/saladin — بنام: Saladin — اخذ شدہ بتاریخ: 9 اکتوبر 2017 — عنوان : Nationalencyklopedin
- ↑ http://www.theguardian.com/world/2003/mar/20/iraq.rorymccarthy
- ↑ http://www.britannica.com/EBchecked/topic/595715/Tikrit
- ↑ دائرۃ المعارف بریطانیکا آن لائن آئی ڈی: https://www.britannica.com/biography/Saladin — بنام: Saladin — اخذ شدہ بتاریخ: 9 اکتوبر 2017 — عنوان : Encyclopædia Britannica
- ↑ ربط : https://d-nb.info/gnd/118604988 — اخذ شدہ بتاریخ: 30 دسمبر 2014 — اجازت نامہ: CC0
- ↑ https://encyklopedia.pwn.pl/haslo/Salah-ad-Din;3971363.html
- ^ ا ب مکمل کام یہاں دستیاب ہے: https://archive.org/details/TheFatimidVizierate9691172 — عنوان : The Fatimid Vizierate (979-1172) — صفحہ: 170 — ISBN 3-922968-82-1
- ↑ "Salahuddin Ayyubi, the great warrior of Islam". https://www.worldbulletin.net/ (بزبان ترکی). اخذ شدہ بتاریخ 10 مئی 2023. روابط خارجية في
|website=
(معاونت) - ↑ "Roznama Dunya: اسپیشل فیچرز :- فاتح بیت المقدس :سلطان صلاح الدین ایوبی". Roznama Dunya: اسپیشل فیچرز :- (بزبان انگریزی). اخذ شدہ بتاریخ 10 مئی 2023.
- ↑ "Saladin (Salah ul-Din Ayubi) - Madain Project (en)". madainproject.com. اخذ شدہ بتاریخ 10 مئی 2023.
- ↑ "سلطان صلاح الدین ایوبی". Nawaiwaqt. 2015-03-06. اخذ شدہ بتاریخ 10 مئی 2023.
- ↑ "Sultan Salahuddin Ayubi — the great warrior of Islam". Daily Times (بزبان انگریزی). 2020-01-02. اخذ شدہ بتاریخ 10 مئی 2023.
- ↑ "سلطان صلاح الدین ایوبی". Nawaiwaqt. 2015-03-06. اخذ شدہ بتاریخ 10 مئی 2023.
- ↑ Library، Pakistan Virtual (2022-01-17). "سُلطان صلاحُ الدین ایوبی شخصیت و کارنامے جلد دوم از مولانا محمد اسماعیل ریحان" (PDF). Pakistan Virtual Library (بزبان انگریزی). اخذ شدہ بتاریخ 11 مئی 2023.
- ↑ ڈیسک، ویب (2019-03-26). "صلیبی جنگوں کے فاتح صلاح الدین ایوبی نے آج مصرکی حکومت سنبھالی تھی -". ARYNews.tv | Urdu - Har Lamha Bakhabar. اخذ شدہ بتاریخ 11 مئی 2023.
- ↑ "Saladin - New World Encyclopedia". www.newworldencyclopedia.org. اخذ شدہ بتاریخ 11 مئی 2023.
- ↑ Hamadani، Safdar؛ admin. "دو اکتوبر 1187ء صلاح الدین ایوبی کے ہاتھوں فتح بیت المقدس | Aalmi Akhbar" (بزبان انگریزی). اخذ شدہ بتاریخ 11 مئی 2023.
- ↑ "سلطان صلاح الدین ایوبی رحمہ اللہ فتح بیت المقدس تحریر: رانا محمد عامر خان". Baaghi TV. اخذ شدہ بتاریخ 11 مئی 2023.
- ↑ "Saladin defeated the crusaders and re-took Jerusalem in 1187". Le Mauricien (بزبان فرانسیسی). اخذ شدہ بتاریخ 11 مئی 2023.
- ↑ علی، ڈاکٹر ساجد (2022-03-01). "آج بیت المقدس کی فتح کا دن ہے". ہم سب. اخذ شدہ بتاریخ 11 مئی 2023.
- ↑ "PROFILE - Salahuddin: Iconic Muslim ruler, commander". www.aa.com.tr. اخذ شدہ بتاریخ 11 مئی 2023.
- ↑ "صلاح الدین ایوبی نے یروشلم کیسے فتح کیا؟". BBC News اردو. اخذ شدہ بتاریخ 11 مئی 2023.
- ↑ www.coursehero.com https://www.coursehero.com/file/48521571/Biography-salahudin-al-ayyubidocx/. اخذ شدہ بتاریخ 11 مئی 2023. مفقود أو فارغ
|title=
(معاونت) - ↑ انٹرنیشنل، مراۃالعارفین. "صلیبی جنگوں کے مہذب فاتح | مراۃالعارفین انٹرنیشنل". www.mirrat.com. اخذ شدہ بتاریخ 11 مئی 2023.
- ↑ Hamadani، Safdar؛ admin. "چار جولائی1187ء صلیبی جنگ :صلاح الدین ایوبی نےشاہ یروشلم کو شکست دی | Aalmi Akhbar" (بزبان انگریزی). اخذ شدہ بتاریخ 11 مئی 2023.
- ↑ "www.islamicboard.com/islamic-history-and-biographies/924-salahuddin-ayyubi-saladin-al-din.html".
- ↑ "Sultan Salah Ud Din Ayubi - The Great Warrior Of Islam". Dunya Blog (بزبان انگریزی). 2019-12-30. اخذ شدہ بتاریخ 11 مئی 2023.
- ↑ "share the history of famous peoples - CSS Forums". www.cssforum.com.pk. اخذ شدہ بتاریخ 11 مئی 2023.
- ↑ ""فاتح القدس" صلاح الدین ایوبی کی دولت جاننا چاہیں گے | TRT اردو". www.trt.net.tr. اخذ شدہ بتاریخ 11 مئی 2023.
- ↑ Sohail، History With. "سلطان صلاح الدین ایوبی ؒ کیسے مسلمانوں کے ہیرو بنے؟". www.historyinurdu.com (بزبان انگریزی). اخذ شدہ بتاریخ 11 مئی 2023.