بلال اصغر دیوبندی

بلال اصغر دیوبندی (1335 – 1444ھ بہ مطابق 1935 – 2023ء) ایک ہندوستانی دیوبندی عالم، مبلغ، مصنف اور مترجم قرآن تھے۔ ان کو براہِ راست حسین احمد مدنی، محمد ابراہیم بلیاوی، محمد زکریا کاندھلوی، اعزاز علی امروہی اور محمد طیب قاسمی جیسے اکابر علمائے دیوبند سے شرفِ تلمذ حاصل تھا اور ان کا ایک روحانی سلسلہ چار واسطے سے سید احمد شہید بریلوی سے جا ملتا ہے۔

بلال اصغر دیوبندی
معلومات شخصیت
پیدائش	10 دسمبر 1935ء   دیوبند، ضلع سہارنپور، برطانوی ہند
تاریخ وفات	19 جنوری 2023ء (88 سال)
مدفن	قاسمی قبرستان
شہریت	برطانوی ہند ڈومنین بھارت بھارت
عملی زندگی
مادر علمی	دار العلوم دیوبند
استاذ	حسین احمد مدنی ،  محمد ابراہیم بلیاوی ،  محمد اعزاز علی امروہوی ،  محمد زکریا کاندھلوی
پیشہ	فاضل ،  مصنف ،  معلم ،  واعظ
پیشہ ورانہ زبان	اردو ،  عربی
کارہائے نمایاں	واقعۃ الصحابہ شرح اردو حیاۃ الصحابہ، قصص القرآن (ہندی ترجمہ)
باب ادب

ابتدائی و تعلیمی زندگی

ولادت اور خاندانی پس منظر

بلال اصغر دیوبندی 13 رمضان المبارک 1354ھ (بہ مطابق 10 دسمبر 1935ء) کو دیوبند، ضلع سہارنپور، اترپردیش (اس وقت کے صوجات متحدہ، برطانوی ہند) میں پیدا ہوئے تھے۔ بلال اصغر ان کا تاریخی نام ہے، جس سے ان کا ہجری سنہ ولادت نکلتا ہے۔

ان کے والد عبد الاحد دیوبندی (1911–1979ء) اور ان کے دادا عبد السمیع دیوبندی (1878–1947ء) نے بھی دار العلوم دیوبند میں تدریسی خدمات انجام دی ہیں۔ ان کے نانا عبد الشکور دیوبندی (متوفّٰی: 1963ء) مدرسہ علوم الشرعیہ، مدینہ منورہ میں مدرس تھے اور جنت البقیع میں خلیفۂ ثالث عثمان بن عفان کے مرقد کے نزدیک مدفون ہیں۔

ان کے پر دادا ظہور الدین دیوبندی مجلس شوریٰ دار العلوم کے ابتدائی ارکان میں سے تھے اور وہ 1894 سے 1905ء تک مجلس شوریٰ دار العلوم کے رکن رہے۔ ان کے نانا عبد الشکور دیوبندی کے دادا عبد الخالق دیوبندی؛ شہرِ دیوبند کی مرکزی جامع مسجد کے شریک بانی اور عبد الخالق دیوبندی کے والد شمس الدین دیوبندی؛ سید احمد شہید بریلوی کے خلیفہ و مُجاز، اور شریعت کا لٹھ نامی کتاب کے مصنف تھے۔

بلال اصغر دیوبندی کے پرنانا نور الحسن دیوبندی مدرسہ امینیہ، دہلی کے استاذ حدیث رہے ہیں۔ نیز دار العلوم وقف دیوبند کے سابق شیوخِ حدیث نعیم احمد دیوبندی اور خورشید عالم دیوبندی بالترتیب ان کے سسر اور ہم زُلف تھے۔ وہ اپنے بھائیوں محمد سالم دیوبندی مرحوم اور محمد غانم قاسمی فاضلِ مدینہ یونیورسٹی و سابق مبعوث رابطۂ عالم اسلامی میں سب سے بڑے تھے۔

تعلیم و تربیت

بلال اصغر دیوبندی نے بغیر دیکھے قرآن کے دس پارے اپنے دادا عبد السمیع دیوبندی کے پاس حفظ کیے، اردو کی تعلیم اپنی والدہ مومنہ خاتون سے حاصل کی، پھر حفظ قرآن کی تکمیل شریف احمد گنگوہی کے پاس کی۔

ابتدا تا انتہا انھوں نے عالمیت کی تعلیم دار العلوم دیوبند میں حاصل کی اور 1375ھ بہ مطابق 1956ء میں دار العلوم سے سندِ فراغت حاصل کی، اس کے بعد ایک سال افتا کیا اور پھر اپنے والد عبد الاحد دیوبندی کے حکم سے ایک سال تبلیغی جماعت میں لگایا۔

ان کے اساتذہ و شیوخ میں حسین احمد مدنی، محمد ابراہیم بلیاوی، اعزاز علی امروہی، محمد زکریا کاندھلوی، بشیر احمد خان بلند شہری، عبد السمیع دیوبندی، فیض علی شاہ ہزاروی، محمد طیب قاسمی، عبد الشکور دیوبندی مہاجر مدنی، ظہور احمد دیوبندی، عبد الاحد دیوبندی، فخر الحسن مرادآبادی، اختر حسین دیوبندی، سید حسن دیوبندی، جلیل احمد کیرانوی، مبارک علی نگینوی، اصغر علی سہسپوری اور محمد حسین بہاری شامل ہیں۔

بیعت و خلافت اور روحانی سلسلہ

بلال اصغر دیوبندی؛ حسین احمد مدنی کے مشہور خلیفہ محمد علی باسکنڈی آسامی سے بیعت تھے اور تصوف میں ان کے خلیفہ و مُجاز بھی تھے، اسی طرح انھیں ان کے نانا عبد الشکور دیوبندی مہاجر مدنی سے بھی اجازت و خلافت حاصل تھی، جن کا روحانی سلسلہ ان کے والد نور الحسن دیوبندی، پھر ان کے دادا عبد الخالق دیوبندی، پھر ان کے پردادا شمس الدین دیوبندی سے جا ملتا ہے، جو سید احمد شہید بریلوی کے مرید و مُجاز تھے۔ عبد الشکور دیوبندی کے پوتے محمد فوزان دیوبندی بن محمد نعمان دیوبندی؛ دار العلوم دیوبند میں درجۂ حفظ کے استاذ اور سید احمد بریلوی کے سلسلے سے بلال اصغر دیوبندی کے خلیفہ و مُجاز ہیں۔

تدریس و دیگر خدمات

بلال اصغر دیوبندی نے ابتدا میں کٹیسرہ، ضلع مظفر نگر کے کسی مدرسے میں تدریسی خدمات انجام دیں، اس کے بعد 1383 تا 1386ھ دار العلوم دیوبند کے شعبۂ تبلیغ میں، پھر 1386 تا 1402ھ شعبۂ تنظیم و ترقی میں بحیثیت مبلغ خدمات انجام دیں۔ پھر انقلابِ دار العلوم دیوبند ہی کے زمانے یعنی 1402ھ بہ 1982ء سے دار العلوم میں ان کا تدریسی سلسلہ شروع ہوا اور 1444ھ بہ مطابق 2022ء یعنی وفات سے چند ماہ قبل تک انھوں نے دار العلوم دیوبند میں تقریباً بیالیس سالہ تدریسی عرصے کے اندر صرف، نحو، منطق، فقہ، تاریخ اور تفسیر کی کتابیں پڑھائی ہیں۔ ان کے خاندان نے مجموعی طور پر اب تک 111 سال دار العلوم میں تدریسی خدمات انجام دی ہیں۔ اخیر زمانے میں وفات سے پہلے چند ماہ سے آن لائن بیرونِ ہند؛ یہاں تک کہ شام و مصر جیسے عرب ممالک کے علما و طلبہ بھی ان کے سامنے کتبِ حدیث و فقہ کی سماع کے ذریعے ان سے اجازتِ حدیث و فقہ حاصل کر رہے تھے۔ حج/ عمرہ کے موقع پر بھی مکہ و مدینہ میں ہند و بیرون ہند کے علما نے ان سے اجازتِ حدیث حاصل کی ہوئی ہے۔

وفات و اظہار تعزیت

بلال اصغر دیوبندی کا انتقال اسلامی تقویم کے لحاظ سے تقریباً 90 سال اور گریگوری کیلنڈر کے مطابق 87 سال کی عمر میں 26 جمادی الاخری 1444ھ بہ مطابق 19 جنوری 2023ء کو طبیعت بگڑنے پر بغرضِ علاج مظفر نگر ہسپتال لے جاتے ہوئے راستے میں ہوا، اگلے دن بہ روز جمعہ 27 جمادی الاخری 1444ھ بہ مطابق 20 جنوری 2023ء کو دار العلوم دیوبند کے احاطۂ مولسری میں مہتمم دار العلوم دیوبند ابو القاسم نعمانی نے ان کی نماز جنازہ پڑھائی اور ان کے بھائی محمد غانم قاسمی فاضلِ مدینہ یونیورسٹی کے حکم و مشورے سے قبرستانِ قاسمی میں اپنے دادا عبد السمیع دیوبندی کے ہی قبر میں سپردِ خاک کیے گئے۔

بلال اصغر دیوبندی کی غائبانہ نماز جنازہ مصر میں بھی ادا کی گئی۔ نیز ان کی وفات پر ابو القاسم نعمانی، سید ارشد مدنی، محمد سفیان قاسمی، عبد الخالق مدراسی، قمر عثمانی، ندیم الواجدی، احمد خضر شاہ مسعودی، محمود اسعد مدنی، خالد سیف اللہ گنگوہی، شاہ عالم گورکھپوری، عبید اقبال عاصم، محمد ساجد کُھجناوَری، فاروق اعظم قاسمی کے علاوہ شہرِ دیوبند کے علما و دانشوران اور ہند و بیرون ہند سے علما و تلامذہ نے غم و افسوس کا اظہار کیا۔

قلمی خدمات

بلال اصغر دیوبندی کی قلمی خدمات میں مندرجۂ ذیل کتابیں شامل ہیں:

• الورود المسعود شرح سنن ابی داؤد
• المنار پر عربی حاشیہ
• قلیوبی کا اردو ترجمہ
• واقعۃ الصحابہ اردو ترجمہ حیاۃ الصحابہ
• قصص القرآن مصنفہ: حفظ الرحمن سیوہاروی کا ہندی ترجمہ
• ترجمۂ قرآن – جس میں اردو ترجمہ کے ساتھ مکمل قرآن کی ترکیب کی گئی ہے۔ (کمپیوٹرائزڈ، غیر مطبوعہ)